Eng hri leng nge tih hriat loh vangin mi 79 thi tawh

Eng hri leng nge tih hriat loh vangin mi 79 thi tawh
Democratic Republic of Congo (DR Congo) chhim chhak lamah hri leng, eng hri nge a nih la hriatchhuah si loh avangin mi 79 an thi tawh a, health ministry chuan thi zinga a tam zawk chu kum 15 leh 18 inkar an nih thu a sawi.
Mi 300 chuang chu khawsik, lu na, khuh leh thawk lama harsatna neiin an awm niin an sawi a, hri leng hi a nasa hle niin sawi a ni.
Sorkar chuan Kwango province-ah response team tir tawhin, a natna tuar tamna hmunte chu hriselna lama enkawl dan tur leh a natna awm dante chhui turin a hriattir.
Hri kai hi an tam belh zel avangin hmalak thiam a la har hle niin an sawi a, hmun tam tak hi thingtlang hmun kilkhawr zawkte an nih avangin damdawi supply kawngah harsatna a awm deuh niin an sawi a ni.
Africa ram lailia awmte hian mpox hri leng na tak an hmachhawn mek bawk a, kumin January atanga July thla inkar chhung ringawt pawh khan hri vei 14,500 chuang an chhinchhiah a ni.
Tin, DR Congo hian kum tam tak chhung chu Ebola natna an lo tuar tawh bawk a, tuna hri leng thar an hriat pawh hi hri leng pahnih an lo hmachhawn tawhte ang maia hlauhawm a nih dawn leh dawn loh an finfiah mek thu sawiin, ngaihtuahna an sen mek thu sorkar chuan a sawi bawk.