November 18 khan Uttar Pradesh Government’s Food Security and Drug Administration chuan “halal-certified products te chu siamchhuah, hralh, dahthat leh semdarh khap nghal a ni,” tiin thuchhuah a siam a.
Halal hi Arabic term niin ‘phal’ tihna a ni a, Islam-ah chuan haram tih chu ‘khap’ tihna a ni thung. Halal certificate awmzia chu he thil siam chhuah (product) hi ei tlaka thianghlim a ni tihna a ni a. A bik takin meat item-ah te pawimawh zualin Muslim ram danga export tur chuan halal certificate hi ngai ngeia ngaih a ni. Court-in thupek a chhuah hnuah police-te chuan UP hmun hrang hranga mall te chu dap thutin halal product an man hnem hle a ni.
-- Advertisement --
Eng vangin nge khap a nih?
Mall te police tena an dap thut na chhan hi Bharatiya Janata Party (BJP) youth wing office bearer-in halal certificate petute chuan an hralh a that theih nan certificate lem an pe chhuak tia a zualko vang a ni a. “An chetlak dan hi ‘public trust’ bawhchhiain vantlangah inbakkaihna a thlen a ni, a ti bawk a.
Police-te chetlak dan chu mi tam tak te chuan sorkarin State chhunga Muslim community-te a enhranna kalpuina zel an tih laiin sorkar chuan dan ang thlapin engkim kalpui a inti ve thung.
Eng tiangin nge halal certificate tihchhuah a nih?
Halal certificate hi Jamiat Ulama-i-Hind’s Halal Unit leh Halal Shariat Islamic Law Board te pekchhuah a ni a, an pahnih hian National Accreditation Board for Certification Bodies zawm ve ve an ni. Shariat Islamic Law Board hian food product-ah phalna a pek theih laiin Jamiat unit hi chuan sa chauhah phalna a pe thei.
Heng ageny te hian sorkarin Halal-certified product a khapsak ngawt chu an lawm lo hle a. Jamiat te chuan sorkar chuan hmalakna an kalpui hmain hriattirna emaw engmah pek a nei lo va, awmang lo lutukin thil an kalpui a ni, an ti a.
Dan lam thlenga kalpui an tum thu sawiin sorkar chetlak dan chuan khua leh tui te fundamental right sakhaw rinna behchhana ei phal leh phal loha dikna an neih te chu a bawhchhia a ni an ti bawk a. Jamiat te chuan halal certificate an pekchhuah theih nana sorkarin norms a siamte chu an zawm fai vek an ti bawk a.
“Sorkar regulation kan awm a, Ministry of Commerce and Industry ntification siama Halal certification bodies te NABCB (National Accreditation Board for Certification Bodies under Quality Council of India) a inziak lut tura tihnaah te Jamiat Ulama-i-Hind Halal Trust chuan zawmin a paltlang vek a ni. APEDA (Agricultural Products Exports Development Authority of India) leh khawvel hmun hrang hranga Indian embassy te nen kan thawk ho va, global market-ah Indian halal certified products te kan tilar a ni. Financial transaction kan tih tin te GST leh income taxy payment ti thlak bawkin dan ang thlap leh dan zawm kim vekin kan kalpui a ni,” tiin Jamiat te chuan an sawi.
Export product lam?
Tuna court-in khapna a siam hi chuan Uttar Pradesh chhunga hralh leh siamchhuah leh dah that chauh a khap a, thawnchhuah tur pawh a huam lo. “Tunah rih chuan thawnchhuah tur chuan Halal certification te khap a ni lo. Export atan chiah Halal unit ten certificate an pechhuak a ni” tiin Jamiat official te chuan an sawi a, “Vegetarian product ah Halal certificate kan pe tia sawi te hi ngaihhaina thil zawk a ni, min tihchihat tumna mai a ni,” tiin a sawi.
Sorkarin eng nge a tih?
Khap a nih thu puan karah State sorkar chuan hun remchang a siamsak hlawm a. Retailer te chu ni 15 chhung halal certification te dahbo na hun a pe a. Halal certification la thin manufacturer 92 te chu an bungrua te lakir leh vek turin a hriattir bawk a ni.