ENG RAU NGE I CHAN VE

Reuben Lalnunthara Hnamte

Mizote hian hmanlai kan pipute hunlai atang tawhin Rau hi kan buaipui tawh a. Eng thlarau rau emaw awm ringin thingbul lungbulte biain an lo phusa viau tawh a ni. Ramhuai thlarau pawh awm ngeiin an lo ring thin a. Mitthite pawhin thlarau an nei ngeia ringin an thlarau kalna turte thlengin an lo zeldin nasa ve hle thin. An damlaia thil ti tha deuh chu Pialralah nuamsa taka khawsaa tura ngaihna an nei a. Misual deuh leh tlangval di nei lote chu Paul-a’n a lo chang anga Sairawkherh lianpuia lo perh turin an suangtuah thin a nih kha. Hmanlai atang tawh rengin mizote hi engemaw rau hian min tibuai tawh viau mai a. Kristian kan han nih hnuah pawh hian engemaw chang ni a inhriatna hian min thlah hleitheilo chu a nih hi. Thil reng reng hian engemaw rau hi chu a nei vek tih theih a ni a, mitin mai hian rau chan lam hi kan nei theuh emaw tih tur a ni. . “Mi dinhmuna i din ve phawt loh chuan sawisel ngawt suh” Rabbi Hillet chuan alo ti a. Mi rau chan han sawisel ngawt pawh hi an dinhmuna din loh chuan thil ngamawm loh tak a ni. Mahse, kan rau chan hi a dik em tih erawh in enfiah fo a tul hle.
Thenkhatin lam thlarau an chang a, khuang a rik hlek tawh chuan awm hle hle thei miah lo tam tak kan awm; mahse, Pathian Thlarau tak a ni em tih erawh kan hre lem hlei lo va. Mi thenkhat chu an lamlai hi an ringtu that lai ber pawh a ni mahna. Thenkhat lahin Zawlnei rau an chang a, thil hrelawk thei ni a inpuangin kan ram awmdan tur leh sorkar rorelna awm dan tur thlengin an puang awl lo va. An thupuan lah chu a dik vek lem hlei lo va, Pathian hriattirna ang chuan an puang vek tho si a, zuitu lah an nei ve zel lehnghal. Chu mai a ni lo, an thupuan lo ringtu leh lo ngaisang fe fe lah an kat nawk thin a, a buaithlak thin ngawt mai. |henkhat chuan ruihhlo duhna thlarau an chang a, kan ram chu ruihhlovin min tibuai hle mai zâwng a nih hi. Kan thalai tamtakte ruihhlo bawihah an tang mek a, chu chuan chhungkua ,khawtlang leh ram thlengin min tibuai mek a ni. Chu mai a ni lo, kan ram chu hurna thlarauvin min chiah mek a, nula tlangval, nu leh pa thlengin, a thenah chuan naupang nia kan ngaihte thlengin hurna bawihah kan tang mek a ni. Chu chuan HIV nasa takin a tipung a, HIV kai hi kan ramah hian an tam tawh awm a sin.
Hurna thlarau hian kan ram min tibuai hle mai, chu chuan a hrinchhuah chu: chhungkaw kehchhia, a hun lova nupui pasal neih; enkawltu tha nei lo naupang leh thalai, uirena, HIV, mahni intihlum thlengin kan pung ta hle a nih hi. Social media-ahte naupang tak tak sex lam hawia intarlang duh, thil tenawm tak tak kan ramah ngei pawh a awm ta fo mai. Chu mai a ni lo, LGBTQ thlengin kan pung hle a nih tawh hi. Tunhma kha chuan nula inti tlangvalte kha an awm nawk thin a, kan sawi huai huai thin a. Tunah chuan tlangval inti nula an tam ta; a sawi pawh hi kan sawi peih meuh tawh lo zawk emaw tih tur a ni. A lang apau hian kan inlar ngam tawh a, zahna reng kan nei tawh lo. Pathian min siam dan lungawilohna hian min tuam mek a, mahni nihna (gender) a lungawi lova, inthlakthleng duh kan pung tual tual ta mai. Heng rau chante hi kei ka hlauh zâwng tak a ni. Amah Pu.Ngurthangvela hlaphuah “Sodom leh Gomora kan iang zo” a tihte kha chu nep tak a ni ta tih mai tur a ni tawh. Tunlai kan rau chan Hurna kan tih hi hurna mai pawh a ni tawh lo, hurna uchuak bawn tuar turu a ni tawh ber zawk.
Kan rau chan zinga engkim bul tih mai tur pakhat chu, tunlai tawngkam lar tak ‘ Thluaka sum lut’ rau hi a ni. Thluaka sumlut rau hian kan chhungkua, khawtlang leh ram thlengin min tibuai nasa hle tawh a nih hi. Pathian thu chuan kan nunna tura rimtaka thawkchhuak turin min duh laiin awlsam taka sum neih duhna leh neih belh zel duhna rau hian min tibuai takzet a ni. Kan neih tawkah kan lungawi lova, kan hlawhah kan lungawi hek lo; a aia tam kan duh a, bawlhhlawh leh tenawm tak a lakluh pawh nise, sum kan hmuhna tur a nih chuan mi tam tak hian tih hreh lah kan nei hek lo. Rimtak leh diktaka thawhchhuah ai chuan hahdam leh dik lo deuha thawhchhuah duh kan pung tual tual a, social media inbumna lah a hluar ta hle mai bawk. He sum duhna rau hian min eichhe mek a ni. Kan sorkar hian kan ram siamthat tumin theihtawpin hma an la mek a, tang rei thei tak maw le? Mipui hi kan dik tawh lo va, midikte hi kan ngaithei lo tan tawh a, hnawk kan ti tawh a nih hi, a rapthlak ngawt mai. Kan sorkar hi tang fan fan se la; thil dik lo hi chu haichhuakin, siam tha zel se, mipuite pawh hian i thlawp tlat teh ang u.
Kan ramah chuan party ruihchilhna rau hi kan kalsan a tul khawp mai. Ram hmangaihna leh siamthatna kawngah hian mipui kan tanrual a tul a; party tinte te pawh hi hemi kawngah hi chuan tangrual tlat se chuan kan ram hi siamthara siamthat theih ala nih ngei a rinawm. Sorkar hi chu an kaldan diklo a lo awm a nih chuan sawisel tur a ni ngei mai, nimahsela, sawiselna tur zawn rikngawt erawh hi chu a khamawm viau. Tunah phei hi chuan kan ramah hian hmeichhia aiin mipa hi an tawngthei tawh zawk mah hian a lang a; an rilru pawh hi hmeichhia ai hian a zim zawk emaw tih tur a ni. Social media lam han luhchilh deuh phei chuan thinrimna khawp hi comment leh post hi a tam thin zu nia. Zoramthar hi kan sawi chamchi a, a mihring chengte kan dik si loh chuan engti kawng mahin zoramthar hi kan nei lovang. DL Moody a chuan “Ka nu ang hi khawvela nu zâwng zâwng hi nisela chuan khawvelah hian tan in a awm a ngai lovang” a lo ti hial a nih kha. Chutiang kan rau chan hi Pathiana chhuak Thlarau dik tak ni sela chuan, kan ramah hian dikna, rinawmna leh taihmak rau hian min chenchilh ngei dawn a ni. Kan rau chan theuh hi inenfiah ang u hmiang, eng rau nge i lo chan ve le?. Tirhkoh Paula chuan “ nimahsela, Eng bawiha mah ka in phal lo” (1 Kor 6:12) sum duhna rau(bawih), hurna thlarau, ruihhlo rauah te kan lo tang em le? Pathian Thlarau Thianghlim hian kan nun theuh min chhungkhat se la; Pathian Thlarau Thianghlim chauh hi kan chan lo ni rawh se.