England an chak awlsam

June 19, Thawhtan zan khan Euro 2024 khel tur zawnna UEFA European Championship Qualifying khelh chhunzawm a ni a. England chuan Old Trafford-a an mikhual North Macedonia chu 7-0 ngawtin an sawp. An mualah nuamsa taka hnehna an chan tum hian Arsenal forward Bukayo Saka chuan England tan a vawi khat nan hattrick a siam. Group C a inkhel dangah Ukraine chuan 1-0 in Malta an hneh ve bawk.
An khelh hnuhnung berah 4-0 a Malta sawptu England hi Old Trafford-a an mikhual North Macedonia lakah an khel tha leh viau a, chawlhlawk hmain goal thum ngawt an thun hman. Chawlhlawk hnu lamah goal li thun belh lehin, awlsam takin an chak. Three Lions hian an khelh hnuhnung vawi hnihah goal 11 zet an thun a, goal an chhuah lo.
Old Trafford-a khel tha tak England tan hian minute 29-naah captain Harry Kane chuan hmahruaina goal a thun. England tana goal thun hnem ber Kane hian a record a tihzau belh a, khum har har tur record a siam belh zel. Kane goal thun atanga minute 10 pawh tling loah Kayle Walker siamsak atangin Bukayo Saka chuan an goal hnihna a thun. Si hnih faia hmahruai tawh Three Lions an khel tha chhunzawm zel a, chawlhlawk dawn hnaih minute 45-naah Jordan Henderson siamsak atangin Marcus Rashford chuan an goal thumna a thun a, si thum faia hmahruai chungin Gareth Southgate-a team in chawlhlawk an hmang.
Chawlhlawk hnu lamah England an khel tha chhunzawm a, goal li ngawt an thun belh zui leh. Second half tan atanga minute hnihna lekah Saka chuan Alexander-Arnol siamsak atangin an goal lina a thun a, an hmahruaina a tihzau belh. Si li faiin hmahruai tawh mah se England leh Saka-a’n an duh tawk mai lova, goal an thun belh leh thuai. Minute 51-na lekah Saka chuan Harry Kane siam atangin an goal ngana a thun a, England tan a vawi khat nan hattrick a siam. Arsenal rawlthar duhawm Saka hi Theo Walcott hnu lamah England tan hattrick siam thei naupang ber a ni.
Goal nga ngawt an thun hnuin England in an mikhual North Macedonia an nawr chhunzawm a, goal hnih an thun belh leh. Minute 64-naah Kalvin Phillips chuan an goal rukna a thun a. Goal hmahruai thuntu Harry Kane chuan minute 73-naah penalty atangin an goal sarihna thun zui leh a. Old Trafford-a an mikhual North Macedonia chu 7-0 ngawta sawpin, point thum an hmu zui leh ta a ni.
Group C-ah England hian vawi li khel tawhin an la chak vek a, point 6 zetin an sang fal mek. An hnuai chiaha awm Ukraine chuan point ruk an hmu mek a, Italy leh North Macedonia ten point thum ve ve an hmuh laiin, Malta chuan khelh li atangin point an la hmu ve miah lo thung.
Thawhtan zan khan Ukraine chuan an group-ah a mawngphaha awm mek Malta chu minute 73-naag penalty atanga Viktor Tsygankov goal thun hmangin an hneh a, khelh thum atanga point ruk hmuin pahnihnaah an inhlangkai. Nations League semi-final an khelh vangin Italy chuan vawi hnih chauh an la khel a, point thum hmuin pathumnaah an awm mek a, England um turin chak an mamawhna a sang sawt ta viau.