England an chak zo lo

UEFA European Under-21 Championship khelh mekah champion lai England chu Pathianni zan khan an chak zo lo. England an chak zawh loh lai hian Germany in hnehna an chang a, table chung ber an luah nghal bawk. Germany chak laiin Netherlands an lo tlawm ve bawk.
Champion lai England hian Stadión Pod Zoborom-ah Slovenia an hmachhawn. Inkhel hmuhnawm takah chak zawk an awm thei lova, goal awm lovin an inhnehtawk. Slovenia lakah an chak zawh loh vangin England hian Germany lakah an hmahruaina an hloh zui nghal.
England an chak zawh loh lai hian champion tura rinkai zinga mi Germany chuan 4-2 in Czechia an lo hneh ve thung. Germany hian Czechia lakah bul an tan tha viau a, dar kar khat an khelh tlin hmain goal li ngawt an thun hman. Germany tan hian Nicolo Tresoldi chuan minute 34-naah hmahruaina goal a thun a. Paul Nebel chuan minute 41-naah an goal hnihna a thn belh zui leh bawk a, si hnih faia hmahruai chungin chawlhlawk an hmang.
Chawlhlawk hnu lamah Germany an khel tha chhunzawm a, goal hnih an thun belh leh thuai. Minute 54-na lekah Nick Woltemade chuan an goal thumna a thun a. Minute 58-na lekah Eric Martel chuan an goal lina thun belh lehin an hmahruaina a tizau. Si li ngawt phur tawh Czechia hian an si phurh sut tumin thapui an thawh a, minute 60-naah vanneihthlak ang reng takin goal an thun a,, Bright Arrey-a’n an lamah a tih goal vangin an si phurh an sut then. An goal khatna an thun hnuin minute 66-naah Karel Spácil chuan an goal hnihna a thun zui leh. Goal hnih an thun zawn vangin phur viau mah se hun tawp thlengin goal dang an thun belh thei tawh lova, Gemany in 4-2 in hnehna an chang zui ta a ni.
Germany hian vawi hnih khel zawnin hnehna an chang ve ve a, point ruk hmuin Group B-ah hma an hruai. Champion lai England in khelh hnih atanga point li hmuin pahnihna an luah a, Slovenia in point khat an hmu tawh a, Czechia in point an la hmu ve lo thung. Khelh hnih an tlawm zawn tawh vangin Czechia hi an tlachiang tawh a, vawi hnih chak zawn tawh Germany in last 16 an lut chiang tawh thung.
Pathianni zana inkhel dangah Netherlands an tlawm leh a, Denmark an hneh lo. Netherlands hian point khat chauh an la hmuh vangin tlak an hnaih. Hetihlai hian Netherlands lehthaltu Denmark in last 16 an lut nghal thung.
Netherlands hian Denmark lakah bul an tan tha a, inkhel tan atanga minute 16-na lekah Oliver Provstgaard Nielsen own-goal hmangin hma an hruai. Denmark tan hian William Osula chuan goal hnih a thun a, Netherlands lakah hnehna pawimawh tak a chanpui.
Pathianni zana inkhel dangah Ukraine in si hnih faiin Finland an hneh a, point thum hlu tak an hmu. Group D-ah hian khelh hnih chak zawn tawh Denmark in table chung ber an luah a, last 16 an lut chiang tawh bawk. Group D-ah hian Ukraine in point thum hmuin pahnihna an luah a, Netherlands leh Finland ten point 1 ve ve an hmu mek bawk.