England in Bosnia an hneh

Thawhtan zan khan Euro 2024 khel tura inbuatsaih England chuan friendly match ah Bosnia-Herzegovina an hmachhawn a, 3-0 in an chak. Bosnia an hneh tum hian England tan a vawi khat nana bul tan Cole Palmer chuan goal a thun nghal. Thawhtan zana inkhel dangah Euro 2024 thengtu tur Germany an chak zo lo.
England hian Newcastle United khelmual St. James’ Park-ah Bosnia-Herzegovina an mikhual a, manager Gareth Southgate chuan an player naupang zawkte enchhin nan a hmang. Ram tana la khel tam lo ni hlawm mah se Three Lions hian an mikhual lakah khel tha viau mah se goal an thar har hle thung. Darkar khat an khel tling chiah tihin Chelsea tana khel tha tak Cole Palmer chuan penalty a pet goal a, hmahruaina goal a thun. Penalty hi captain Harry Kane pet tur a nih laiin penalty an hmuh lai hia Kane hian mual chhung a la lut lova, hei hi Palmer hian a chhawr tangkai a, ram tan bul a tan hmasak berah goal a thun nghal.
Bosnia lakah hmahruaina goal an thun hnuin England an khel tha viau a, goal hnih an thun belh zui leh. Minute 85-naah Liverpool defender Trent Alexander-Arnold chuan goal thunin an hmahruaina a tizau. Arnold goal thun hnu hian minute 62-naah bench atanga lut captain Harry Kane chuan minute 89-naah goal dang a thun belh zui leh a, an mualah si thum faiin hnehna an chang zui ta a ni.
England hi final squad a awm tur la thlifim leh tur an nih vangin manager Gareth Southgate chuan club tana khel tlem leh ram tan la khel tam lo enchhin nan a hmang a. Goal khat thun Cole Palmer bakah man of the match ni zui ta Eberechi Eze, Everton defender Jarrad Branthwaite leh Crystal Palace midfielder Adam Wharton ten a vawi khat nan Englan tan bul an tan hlawm a, an khel tha hlawm viau nghe nghe. England hian June ni 16-ah Serbia hmachhawnin Euro 24-ah bul an tan dawn a. Europa a player tha ber ber an kawlkhawm vangin champion tura rinkai an ni.
Thawhtan zana inkhel dangah Euro 2024 thlengtu tur Germany chuan Max-Morlock-Stadion-ah Ukraine an mikhual a, an mualah an chak zo lo. England leh Ukraine te hi vawi kua an intumna a ni a, Germany hian vawi nga hnehna changin vawi li an inhnehtawk a, Ukraine lakah hian Germany an la tlawm miah lo. Ukraine lakah record nei tha viau mah se an mualah an chak zo lova, Euro thlengtu tur hi an mualah thleng sang thei ang em tih rin thiam an har hle.
Germany an chak zawh loh lai hian Croatia chuan an mikhual North Macedonia chu Lovro Majer goal hnih leh Marco Pasalic goal khat thun hmangin an hneh ve thung.