England in Slovakia an lehthal

Pathianni zan khan Euro 2024 klast 16 khelh chhunzawm a ni a, England an tla teuh hle. Boruak nei lian tak England hian Slovakia lakah hun rei tak chhung si an phur a, hun pek belh tawp dawn tepa Jude Bellingham goal ropui hmangin tlawm an pumpelh hram. 2-1 Slovakia lehthaltu England hian quarter-final-ah Switzerland an hmachhawn zui leh ang.
Mitthi tho leh England
Football in pui tia hiala insawi thin England hian Euro 2024 ah bul an tan tha lova, team lian an hmachhawn lo chungin harsa takin group stage an paltlang thei hram. Beisei anga an khelh that theih loh vangin sawisel an hlawh hle a, an mahni tantute ngei pawhin an auh el hial vangin boruak rit takin a delh. Player hrawl tak tak nei chunga a rem khawm fuh hleihtheih loh vangin manager Gareth Souhgate-a’n sawisel a hlawh viau bawk.
Team lian England in beisei an phak loh viau lai hian Slovakia erawh chuan beisei phak bakin an khel tha ve thung. Group match hmasa berah team lian Belgium an hneh a, football khawvel an barakhaih nghal. Belgium an hnuh hnuin Ukraine lakah an tlawm leh zet phawt a. Group match hnuhnung berah Romania nen an inhnehtawk a, point li hmuin lasat 16 an lut. Last 16-ah team lian England an tum a, fiahna hautak an hmachhawn a ngai
England leh Slovakia te hi Arena AufSchalke-ah an inhmachhawn a, hun pangngaiah chak zawk an awm theih loh vangin extra-time an khelh a ngai. Inkhel hmuhnawm takah hian rinkai lo zawk Slovakia in bul an tan tha a, team lian England an nawr buai. Inkhel tir lamah goal thun theihna hun tha vawi hnih ngawt an neih chu awiawm takin an hlah a, goal an thun thei lawk lo. Huai taka an khingpuite nawr chungin, fuh takin an khingpuite an dang bet bawk. An hun tha hloh bawk mah se Slovakia hian goal an thun ta thuai tho. Fuh zeta England tlarhnung an thiah hnuin Ivan Schranz chuan minute 25-naah a pet goal a, hmahruaina goal a thun. England laka hmahruaina goal thuntu Ivan Schranz hian Euro 2024-ah goal thum a thun a, Jamal Musiala leh Georges Mikautadze te nen top-scorer an ni dun mek.
Hma takah goal chhuah mah se England an insiamtha thei mai lova, ball chang tam zawk ni mah se awmze neiin an khingpuite an nawr tlang thei meuh lo. Slovakia hian awmze nei takin England player te an veng a, hmunawl an pek tam duh loh bakah hlauhawm siam thei lo turin an zim tawt zung zung bawk a, player langsar tak takte hlauhawm siam thei lo turin an dang bet.
Minute 25-naa goal an thun hmanin Slovakia hian hun rei tak chhung hma an hruai. Chawlhlawk hnu lamah England defender chetsual vang leh si nghak Jordan Pickford awmhmun fuh loh vangin goal an thun belh teuh hle a, hla tak atanga an pet chu goal chhungah uiawm takin a lum lut lova, England an him hram. Goal chhuah belh vaih se chuan phum ang hmak an ni ang a, thochhuak tur reng an awm tawh lo ang.
England hian an si phurh sut tumin tan khawh chiam thin mah se goal thun thei lo. Hun pangngai a tawp a, hun pek belh pawh a tawp leh tep tawh. Hun tawp nan minute khat chiah a awm tawh laiin England an vannei ta ta nge nge. Kyle Walker ball vawm na tak chu Eze chuan a tauh pial a, ball thlawk mek hi Jude Bellingham chuan pui zet maiin a lo bin (Back Volley) a, Slovakia si nghak Martin Dubravka dan rual lohin goal-ah a thlawk lut a, minute 90+5-ah goal ropui thunin an si phurh a sut. Bellingham goal ropui hmangin tla ngei tura ngaih England an him a, beiseina an nei thar leh.
Bellingham goal thun hnu lawkah hun a tawp zui a, inelna neih mekah a vawi khat nan extra time khelh a ni. Tlawm an pumpelh vanga phur thar hluai England hian na takin an khingpuite an nawr chhunzawm a, goal pawh an thun leh thuai. Ivan Toney siamsak tha tak chu captain Harry Kane chuan minute 91-naah awlsam takin a tauh goal a, hma an hruai letna goal a thun. Chak ngei tura inngai tawh an nih vangin Slovakia hian an forward thate lachhuakin defender an chhawr tam a. Si phur zawka an tan leh tak si vangin an tlahma an hriam tawk tawh lova, hlauhawm siam khawpin an khingpuite an nawr let hleithei meuh tawh lo. Vanneihthlak ang reng takin goal thun theihna hun tha nei bawk mah se vanduaithlak takin an chhawr tangkai zo lova, uiawm takin England lakah an tlawm a, quarter-final lut zo lovin an tla zui ta a ni.
Mitthi tho leh ang maia nun thar leh nei leh ta England hian quarter-final-ah Switzerland an hmachhawn zui leh dawn a. Champion lai Italy hnehtu Switzerland nen hian Inrinni zan dar 9:30 khian Düsseldorf Arena-ah an inhmachhawn ang. An hunawl neih chhawr tangkaia an insiamtha thei a nih chuan England hian semi-final luh theihna hun tha tak an nei tura ngaih a ni a. Inelna neih meka khel tha, inrintawkna sang tak nena hma lam pan mek Swiss hneh turin inbuatsaih an mamawh thung ang a, manager in player a rem fuh a tul dawn bawk.