England leh Denmark an tlang

Euro 2024 khelh mekah thawh leh zan khan Group C a mite an inching fel a. Chak an awm zawh loh zanah England leh Denmark in last 16 an lut a. Slovenia in mi dang result an ngaihchan laiin Serbia an tla thung.
Group champion England
Group match hnuhnung ber thlenga beisei phak lova inlan England chu Group C champion niin last an lut. Group champion ni mah se England team in lawm an hlawh lova, Slovenia an khelh laiin an mahni tantute ngeiin an auel a. Manager Gareth Southgate phei chu vawm a ni hial nghe nghe.
Inelna neih meka beisei phak lo, team sawisel hlawh England hi Slovenia hneh ngei tumin an inlan a, manager Gareth South Gate-a’n player a siksawi ta bawk. Rinlawk ang ngeiin Trent Alexander Arnold aiah Conor Gallagher a chuan bul a tan ta a, player danga erawh a ngaiin bul an tan. Gallagher hian beisei lawk ang ngeiin a khel tha a, game pawh a siam thawkhat viau. Mah se, an tlarhma player ten beisei anga an khelhchhuah theih loh vangin Three Lions hian goal erawh an thun thei ta bik lo.
England hian Slovenia lakah 73.4% zet ball an chang a, shot on target vawi 4 chauh an nei. Manager Gareth Southgate-a mangangin Mainoo leh Cole Palmer te luhtir hnuhhnawh mah se goal an thawkchhuak thei ta bik chuang lo va, Slovenia nen goal awm lovin an inhnehtawk zui ta a ni.
Player lar tak tak kawl khawmtu England hian beisei phak lo bawk mah se Group C champion an ni tho thung. He thu buatsaih lai thleng hian Netherlands nen inhmachhawn tur an ni a. Nilai zana inkhelin thil a tidanglam thei thung. Netherlands nen an inhmachhawn a nih chuan England tan fiahna hautak a tling ngei tura ngaih a ni.
Denmark an vannei
Team ang a khel thiam, team anga thawk ho tha leh team anga hmuhnawm thin Denmark hian an mahni ang thoa huaisen Serbia an hmachhawn a, goal awm lovin an inhnehtawk.
Point hnih hmu tawh Denmark hian point thum hmuh ngei tumin tan an khawh a, goal thun tumin Serbia an nawr na hle. Na takin an khingpuite nawr thin mah se a hmawr an bawk fuh thei lova, goal an thun thei lo tluan.
Chak mamawh leh zual Serbia pawhin huaisen leh zualin Denmark an hmachhawn a, thih tha tak meuh meuha tang an ni bawk a, an che vel a hmuhnawm hle. Team huaisen pahnih inhmachhawnte hian hun tawp thlengin goal an thun thei lova, goal awm lovin an inhnehtawk.
Denmark lakah an chak zawh loh vangin Serbia chu last 16 lut zo lovin an tla a, group C atanga tla chiang hmasa ber an ni. Serbia an tlak lai hian Denmark an vannei ve thung a, yellow card an hmuh tlem zawk chhawr tangkaiin last 16 an lut.
Group C ah hian Denmark leh Slovenia ten point thum ve ve an hmu. An point hmuhzat a inang a, an intum tuma 1-1 a an inhnehtawk vanging head to head ah chungnung an awm lo. Head to head ah chungnung zawk an awm loh laiih Goal difference ah pawh an intluk leh ta zel. Heti a nih tak zel vang hian displinary action en leh a ni. Denmark hian yellow card vawi ruk an hmu a, Slovenia in yellow vawi 7 an lo hmuh vangin Denmark hian last 16 an lut ta zawk a ni. Slovenia hi tlang chiang nghal lo mah se tlang theihna hun tha an la nei tho thung.
Vanneihthlak taka last 16 lut Denmark hian last 16 ah inelna thlengtu Germany an hmachhawn dawn a, an tan fiahna hautak a ni ang. Denmark hian kum 2007 hnu lamah Germany hi an la hneh ngai lova, an tan an huphurhawm thei viau dawn.
Denmark hi hneh nei lo, vannei taka last 16 lut an ni a. Kum 2016 a champion Portugal kha group match ah chak nei miah lo chunga champion an ni a. Portugal hnungzuiin Denmark hian thil mak thlentir an tum ang.