England men’s player of the year Palmer

England men’s player of the year Palmer
Chelsea forward Cole Palmer chu 2023-24 England men’s Player of the Year atan Thawhlehni khan Football Association chuan a puang a; he chawimawina hi mipuiin vote hmanga an thlanchhuah thin a nih angin England fans’ Player of the Year tia sawi thin a ni bawk.
2023-24 England women’s player of the year award dawngtu chu tun thla tawp lama puan chauh tur a ni thung.
England men’s player of the year trophy dawngtu Palmer hian Three Lions tana vawikua lek a la khelh atangin goal hnih a tilut tling tawh a; he award dawng tur thlannaah hian a hnuai chiahah Real Madrid midfielder Jude Bellingham leh Arsenal forward Bukayo Saka-te chu vote hmu tam pahnihna leh pathumna an ni.
Kum 22 mi lek la ni Palmer hi kum 2010-a dawngtu Ashley Cole dawta he chawimawina dawng leh thei hmasaber niin, Blues player zingah Frank Lampard pawhin he award hi a lo dawng ve tawh bawk.
English defender awm tawh zinga a tha ber pawl ni pha thin Ashley Cole hi tunah England assistant coach a ni mek.
Season hnuhnung pahnih men’s player of the year thlannaa vote hmu hnem ber ni zawn chu Arsenal player Saka niin, he award dawng tawhte zingah Harry Kane, Wayne Rooney leh David Beckham an tel.
Nikum November thlaa Wembley khelmuala sihnih faia Malta an hneh tum khan Palmer hian England national team tan a khel tan ve chiah a; tun thlenga ram tana vawikua a khelh tawhah vawihnih chiah starting eleven a la chang a; Euro 202-ah khan match nga khel tlingin, final-a Spain laka Gareth Southgate-a team 2-1-a an tlawm tum khan England goal neihchhun khungtu a ni.
Kha goal langsar avang khan August thlaah PFA young player of the year for 2023-2024 atan thlan niin, he chawimawina hi ropui taka a Chelsea debut season hman rahchhuah a ni tel.
Club lamah pawh nikum nipui thawt laia Manchester City a chhuahsan hnu khan a club thar Blues tan inelna hrang hrangah goal 25 a thun tling der tawh!
Tun season bikah hian Premier League game sarih lek a khelh tawh atangin goal ruk a khawl tling tawh bawk!
Zanin Nations League fixture-a Greece an sut tur leh Pathiannia Finland an hmachhawn turah pawh hian Chelsea forward Palmer hi tlarhma lama England innghahna lian tur a nih leh a rinawm.