England squad-ah Bellingham leh Foden an kir

England squad-ah Bellingham leh Foden an kir
England manager Thomas Tuchel chuan karleh World Cup qualifiers-a Serbia leh Albania hmachhawn tur a squad thar puangin, Euro 2024 final thlenpuitu Jude Bellingham leh Phil Foden-te kha national squad-ah kohkir an ni a; Bournemouth midfielder Alex Scott chu a vawi khatna atan senior squad-ah a lang ve ta bawk.
Tuchel hian Brighton striker Danny Welbeck leh Manchester City aTanga loan-a Everton lama an chhuahtir mek attacking midfielder Jack Grealish bakah right-back Trent Alexander-Arnold a koh nawn duh loh laiin Alexander-Arnold-a Real Madrid team-mate Bellingham leh Foden chuan squad an luahkir leh ta a ni.
Kum 22 mi Bellingham hi dar hliam aTanga a kir hlim kumin October thla khan Tuchel chuan game hnih khel England squad-ah a telh lo a; Manchester City playmaker Foden pawh hi England squad hnuhnung pathuma hmun chang lo fai vek niin, ram tana a khelh hnuhnunber pawh kumin March thlaa Latvia a hmachhawn kha a ni dawrh tawh.
Thla hmasa mai khan Latvia sawp chungin England chu 2026 World Cup khel turin an tling tawh a, tlang tawhsa chungin November ni 13, Ningani khian Serbia an mikhual leh dawn a, ni thum hnuah Albania tum chungin an Group K game hnuhnungber an khel zui leh dawn a ni.
He fixture hnuhnung pahnih hi nakkum nipui thawt huna Canada, Mexico leh United States-te inthlenTawm tur Fifa World Cup hmaa England competitive match hnuhnungber a ni tawh ang.
Tarlan tawh angin, senior squad-a hmun chang ve ta kum 22 mi Scott hi kumin nipui laia European Under-21 Championship-a England champion theihna tura player Tangkai niin, tun season Premier League lamah pawh Bournemouth match 10 khelh tawhah a la inlan kim vek a, table-a pangana lai an luah chhoh theihna kawngah goal khat a thawh ve tawh bawk.
England squad-a kirleh zingah Newcastle goalkeeper Nick Pope, Manchester City defender Nico O’Reilly leh Crystal Palace midfielder Adam Wharton-te an tel bawk.
International break hnuhnungbera hmun chang, tuna squad luah pha ta lo an awm ve thung a, chu’ngte chu – James Trafford, Morgan Gibbs-White, Myles Lewis-Skelly, Ruben Loftus-Cheek leh Ollie Watkins-te an ni.
October thla England game khel ve lo zinga squad luahkir leh langsar pahnih Bellingham leh Foden-te zinga pakhat zawk Bellingham hi dar hliamin a tihbuai vanga ngaih ni pakat mah se khelmual chhunga a khawsak dan avangin Tuchel hian a hrek ve pah bawk a, mahse, England boss hian Bellingham nena harsatna an neih tawh loh thu leh Real player ni mek pawhin a chet dan avanga thupha a chawi tawh thu sawi chungin a midfielder chuan squad-a kirleh a duh tih a tarlang tel.
Season kal mekah Foden hian Manchester City-ah hma a sawn a, a khel Tha a, Nilaini Champions League match pakhata 4-1-a Borussia Dortmund an sawp Tum pawh khan goal hnih khungin, national squad-a kirleh phu khawpin club lamah a khel Tha tlat a ni.

England squad

Goalkeepers: Dean Henderson (Crystal Palace), Jordan Pickford (Everton), Nick Pope (Newcastle Utd)

Defenders: Dan Burn (Newcastle United), Marc Guehi (Crystal Palace), Reece James (Chelsea), Ezri Konsa (Aston Villa), Nico O’Reilly (Manchester City), Jarell Quansah (Bayer Leverkusen), Djed Spence (Tottenham Hotspur), John Stones (Manchester City)

Midfielders: Elliot Anderson (Nottingham Forest), Jude Bellingham (Real Madrid), Jordan Henderson (Brentford), Declan Rice (Arsenal), Morgan Rogers (Aston Villa), Alex Scott (Bournemouth), Adam Wharton (Crystal Palace)

Forwards: Jarrod Bowen (West Ham United), Eberechi Eze (Arsenal), Phil Foden (Manchester City), Anthony Gordon (Newcastle United), Harry Kane (Bayern Munich), Marcus Rashford (Barcelona, loan from Manchester United), Bukayo Saka (Arsenal)