England squad belhtu Jones leh Livramento
Inhliam Morgan Gibbs-White, Ezri Konsa leh Kobbie Mainoo-te’n zanin atanga Nations League match khel tur England squad an chhuahsan hnuah interim manager Lee Carsley chuan a player inhliamte hmunruak hnawhkhah tumna a nei lo tih media lamin an tarlang zet a, mahse, nimin khan Greece leh Finland hmachhawn turin senior national team tana la khel ngai lo Curtis Jones leh Tino Livramento-te’n squad an belh.
Tarlan tawh angin, Three Lions hian zan hian Wembley khelmualah Greece an mikhual ang a, kartawp Pathianni zanah Finland nen Helsinki khawpuiah an innuai zui leh ang.
England team inbuatsaihna St George’s Park-a in report thar pakhat zawk Liverpool midfielder Jones hi kumin May thla khan Euro 2024 khel tur enchhinna provisional 33-man squad-ah telh niin, kha kha England senior squad luah thei tura koh a hlawh vawikhatna a ni a, mahse, Germany ram tournament khel turin a tling zo lo.
Kum 23 mi hian Young Lions team lamah chuan hnuhma hraw a hnutchhiah tawh a, tuna England interim boss Lee Carsley hnuaiah hian 2023 European Under-21 Championship trophy hlawhchhuaktute zingah a tel.
Hliam vanga hmunawl awm hnawhkhat tura koh thar dang Newcastle full-back Livramento pawh hi thla hmasaa Republic of Ireland leh Finland hmachhawn tur Carsley-a senior squad-ah khan a lo tel tawh a, mahse, ram tana khelhna hmun pek a la ni lo.
Nimin khan captain damkawr Harry Kane chuan St George’s Park-ah a team-mate dangte rualin training a zawm lo mah se amahin a train a, zanin game atan hian a fit hman tho tura ngaih a ni.
Manchester City midfielder Jack Grealish pawhin hliam tenau avangin nimin khan training a zawm lo bawk.
England squad
Goalkeepers: Dean Henderson (Crystal Palace), Jordan Pickford (Everton), Nick Pope (Newcastle United).
Defenders: Marc Guehi (Crystal Palace), John Stones (Manchester City), Trent Alexander-Arnold (Liverpool), Levi Colwill (Chelsea), Rico Lewis (Manchester City), Kyle Walker (Manchester City), Tino Livramento (Newcastle United).
Midfielders: Conor Gallagher (Atletico Madrid), Declan Rice (Arsenal), Cole Palmer (Chelsea), Angel Gomes (Lille), Phil Foden (Manchester City), Jude Bellingham (Real Madrid), Curtis Jones (Liverpool).
Forwards: Jack Grealish (Manchester City), Anthony Gordon (Newcastle United), Harry Kane (Bayern Munich), Noni Madueke (Chelsea), Bukayo Saka (Arsenal), Ollie Watkins (Aston Villa), Dominic Solanke (Tottenham).