English Premier League 2024-25 inchinfel zan

May 25, Pathianni zan khian English Premier League 2024-25 khelh zawh a ni dawn a, chin fel loh la awm zawng zawng chin fel a ni ang a, chiang lo zawng zawng tihchian a ni tawh dawn. EPL 2024-25 tawp zana thil thleng thei, inkhel ngaihven hlawh zual tur kan tarlang ang.
EPL-ah hian Liverpool an champion chiang tawh a, London club lian Arsenal chu pahnihna an chi chiang tawh bawk. Pakhatna leh pahnihna a chian rualin Championship lamah Southampton, Leicester City leh Ipswich Town te an tlahniam chiang tawh bawk. Chiang lo leh ngaihven hlawh ber chu tuten nge European Competition; Champions League, Europa League leh Europa Conference League khel ang a, tuten nge khel phak lo ang tih hi a ni.
Europa League-ah Tottenham Hotspurs an champion vangin EPL club parukin season tharah champions League an khel dawn. UCL khel turin Liverpool, Arsenal leh Tottenham te an tling chiang tawh a. Club panga; Manchester City, Newcastle United, Chelsea, Aston Villa leh Nottingham Forrest ten UCL khelhna tur hmunruak pathum an inchuh hlawm dawn. Pathumnaa awm mek Manchetser City pawh top 5 huan gluah phak lo thei dinhmun derthawngah an la ding a. Pasarihnaa awm mek Nottingham Forrest pawh top 5 huang luah phak thut thei dinhmun duhawmah an ding ve thung.
Manchester City (3)
Pathumnaa awm mek Manchester City hi Pep Guardiola hnuaiah an vul viau a, EPL-ah vawi li champion zawn thei hmasa ber niin record duhawm tak an siam hial tawh. City hian season kal mekah erawh beisei an phak lo tlat thung a, League Cup trophy bak lak an nei lo. EPL-ah Liverpool leh Arsenal te an el phak lova, kum 2016-17 hnu lama a vawi khat nan top 2 huang an luah phak lo. Pathianni zan hian Craven Cottage ah Fulham an luh chilh dawn a, Fulham hi an hneh a nih chuan pathumna ni chungin season an khar ang a, UCL khel turin an tling chiang nghal dawn bawk.
City hi rin loh taka Fulham lakah an tlawm a nih chuan Newcastle United, Chelsea leh Aston Villa ten an lehpel thei dawn. An hnuaia club pathumte nen hian point hnih chiahin an inthlau mek. An tak chak a thain a him ber a, an chak zo ta lo a nih pawhin Fulham nen an inhnehtawk a nih chuan goal difference-a an that vangin top 5 huang an luah thei turin an dinhmun a tha thawkhat. Fulham nen hian an in draw a nih pawhin Aston Villa tan City lehpel turin 17-0 ngawta Manchester United sawp a ngai dawn. 17-0 ngawta United sawp hi thil theih loh a ni lo naa Zawngtah kung pawha lawn thei lo tan siar lak tum ang deuh erawh a ni. Fulham nen inhnehtawk in, Villa in thil mak thlentir tehreng pawh ni se City hi parukna aia hniamah an awm thei tawh lova, a chhe berah pawh Europa League an khel phak ngei dawn.
Opta Supercomputer chuan City in UCL an khelh theihna chance hi 96.9% niin a chhut.
Newcastle United (4)
Newcastle United tan season kal mek hi season tha, an hriat reng tawh tur a ni. Magpies hi Carabao Cup-ah an champion a, kum 70 zet hnuah trophy an chawi ve leh nawlh. Trophy an chawi tawh bakah EPL-ah palina an ni mek a, champions league khel thei dinhmunah an ding mek bawk.
Newcastle United hian St James Park-ah 13-naa awm mek Everton an mikhual dawn a, an mualah an chak theih a beiseiawm hle. An mualah an chak a nih chuan top 5 huang an luah phak ngei dawn a, champions league an khel phak dawn. League Cup-ah an champion vangin Magpies hi Europa Conference League khel turin an tling tawh a. Conference League ai chuan champions league khelh ngei an duh zawk dawn a, an mualah chak tumin tan an khawh nasa hle ngei ang. An mualah an tlawm a nih a, Old Trafford-ah Aston Villa an lo tlawm ve bawk a nih chuan Magpies hi top 5 huang luah pha thei dinhmunah an la ding der der a, Chelsea emaw, Nottingham Forrest emaw zawk zawk hnuaiah an awm ngei a ngaih hmel thung.
Newcastle United in UCL an khelh theihna chance hi Opta Supercomputer chuan 82.7% niah a ngai.
Chelsea (5) & Nottingham Forrest (7)
Pa 5-naa awm mek Chelsea leh pa 7-naa awm mek Nottingham Forrest an inhmachhawn tur hi EPL khar zana inkhel ngaihven hlawh ber a ni hial ang. Season kal mekah beisei phak baka chetha a, pahnihna te, pathumna te ni hman zak zak Nottingham Forrest in pa 5-naa awm mek Chelsea an mikhual dawn a, an muala inkhel an hmachhawn tur hi chhawr tangkai ngei an tum dawn. Chelsea lakah hnehna an chang a nih chuan point 68 hmuin season an khar dawn a. An mualah an chak a nih pawhin Newcastle leh Aston Villa te result-ah an inngah tel a ngai dawn tlat thung.
Tarlan tawh angin Nottingham Forrest hi season kal mekah an khel tha em em a, top 4 huang an luah reng. Season tawp dawn, squad nei chhah tangkai hunah chak an harsat ta tlat a. An mual; City Ground-a an khelh hnuhnung vawi thumah chak an neih miah lova, draw vawi khat neiin vawi hnih ngawt an tlawm. An mualah an khel chhe zawn tlat mai hi an rilru tihah zual tur leh an thin tiphu rangtu tur a ni ang. Champions League leh Europa League an khel phak ta lo thut a nih pawhin Europa Conference League khelh pawh an tan thil thlakhlelhawm a ni ang.
Panganaa awm mek Chelsea hian City Ground-ah Nottingham Forrest an hneh a nih chuan champions League an khel phak ngei dawn a. Forrest nen an inhnehtawk a nih chuan UCL an khelh phak theih nan Newcastle emaw, Aston Villa emaw zawk zawk an lo tlawm ve a ngai dawn a. Forrest lakah an tlawm a nih chuan UCL an khel phak turin an dinhmun a chhe viau dawn a, an mikhual Everton lakah 3-0 chin tala Newcastle United an tlawm a ngai tel dawn.
Nottingham Forrest hi an muala inlan tur ni bawk mah se Opta Supercomputer chuan UCL an khelh phak theihna chance chu 20.4% chauh niin a chhut a. Forrest hi team panga zinga chance nei chhe ber anga ngaih an ni. Hetihlai hian Chelsea in UCL an khelh phak theihna chance chu 57.4% niin a chhut ve thung.
Aston Villa (6)
Aston Villa hi Manchester United hmachhawn turin Old Trafford-ah an leng lut dawn a, an hmabak a hautak hle. Villa hian 16-naa awm mek Manchester United hi hneh tehreng pawh ni se an chunga awm Newcastle United leh Chelsea emaw zawk zawkin point an lo hloh ve a ngai dawn a. Manchester City an tlawm a ngai dawn cheu bawk. United hi EPL a insawp nasa ber record siam a, 17-0 tala an sawp theih erawh chuan an chunga awm ten point hmu vek pawh ni se UCL an khel phak dawn. Villa tan champions league khelh phak a har dawn hle niin a lang.