English Premier League 2024-25 zial fel a ni ta

Khawvela tualchhung league harsa leh sum tamna ber English Premier League 2024-25 chu Pathianni zan khan khelh zawh a ni a. Chin fel ngai zawng zawng chin fel niin zial fel a ni ta. EPL 2024-25 khar nia thil thleng chhinchhiahtlak zual kan tarlang ang.
Liverpool 1-1 Palace
Champion thar Liverpool in an champion hnuin chak an harsat chhunzawm zel a, Anfield-a an mikhual Crystal Palace laka an si phurh sut thei hramin EPL khar nia an match-ah mualphio an pumpelh thei hram chauh.
Anfield a lenglut Crystal Palace hian bul an tan tha viau a, inkhel tan atanga minute 9-na lekah Ismaïla Sarr chuan FA Cup champion Crystal Palace tan hmahruaina goal thun nghal. Hma taka goal an thun vangin Eagles hi phur viau mah se tam zawk ni chungin hnehna an chang thei bik lo.
Champion thar Liverpool hian an mikhual Palace lakah si an phur rei hle a, hnufual zawk an nih lai minute 68-naah midfielder pawimawh Ryan Gravenberch hnawhchhuah a ni. Si phur chungin tlem zawk ni zui leh mah se Reds hian champion zia an lantirr a, minute 84-naa Mohamed Salah goal thun hmangin an si phurh an sut. Hun tawp thlengin goal dang a luh belh thei tawh lova, Anfield-ah 1-1 in an inhnehtawk zui ta a ni.
An mikhual Crystal Palace lakah chak zo lo mah se Liverpool hian inkhel a zawh hnuin EPL trophy an chawi zui a, Anfield-ah hlim takin season an thlah liam zui ta tho thung.
Champions League khel tur te:
EPL 2024-25 khar nia ngaihven hlawh leh boruak ti hot tu ber chu Champions League khelh inchuhna a ni. Club pangain UCL hmunruak pathum an inchuh a, Manchester City, Chelsea leh Newcaslte United te champions league khel turin an tling.
Champions League khel phak tura chak mamawh Manchester City in Craven Cottage-ah Fulham an hmachhawn a, mikhual an nihna hmunah si hnih faia chakin, hnehna hlu tak an chang a, champions league khel turin an tling.
EPL-ah a zawna vawi li champion thei awmchhun City tan hian Ilkay Gündogan chuan minute 21-naah hmahruaina goal a thun a. Hun rei tak chhung goal an thun belh theih loh hnuin Erling Haaland chuan minute 72-naah an goal hnihna a thun a, an chakna a nem nghet. Fulham lakah an chak leh tak vangin City hian pathumna ni chungin season an khar a, bul tan tha lua lo mah se a tawp erawh an khar tha thawkhata ngaih a ni.
Pathianni zana inkhel ngaihven hlawh bera chhal ngamah Chelsea chuan UCL khelh phak tuma an elpui Nottingham Forrest chu minute 50-naa Levi Colwill goal thun hmangin an hneh a, point thum hlu zet mai an hmu. Nottingham Forrest lakah an chak a, inkhel dangah mak tak maia Newcastle United an lo tlawm bawk si vangin Chelsea hian palina ni chungin season an khar a. Season hnih chhung an khelh phak tawh loh Champions League khel turin an tling ve leh ta nawlh.
Season tawp lama rawn chetha tak Newcastle United chuan chak mamawh tak chungin Everton an mikhual a. Chak mamawh tak chungin an mual; St James Park-ah ngei an tlawm tlat thung a, dinhmun derthawngah an ding hman. Everton hian minute 65-naah Carlos Alcaraz goal thun hmangin Newcastle hi an hneh a, chak chungin season an khar.
Newcastle United hi an mikhua Everton hneh lovin tlawm bawk mah se inkhel dangah Manchester United hneh lovin Aston Villa an lo tlawm hlauh a, Villa chak loh chhawr tangkaiin Magpies hian pangana an luah a, champions league khel turin an tling ta tho a ni.
EPL atangin Liverpool, Arsenal, Manchester City, Chelsea, Newcastle leh Tottenham ten Champions League an khel dawn a. FA Cup champion Crystal Palace leh Aston Villa in Europa League an khel ang a. Villa hi United laka an tlawm danah an lungni lo viau a, Si nghak Martinez hnawhchhuah a nih danah an lawm lo hle. EPL thuneitute hnenah complaint an theh lut. Season hmang tha Nottingham Forrest in Europa Conference League an khel ve thung ang.