Enkawltu neilo kum upa-in dan hnuaia enkawltu a neih theih dan inhrilhfiah

Social Welfare, Women & Child Development department leh Regional Resource & Training Centre for Senior Citizen tangdun chuan Nilaini khan Aizawlah Maintenance & Welfare of Parents & Senior Citizens Act chungchang an zirho a. Nu leh pa leh upaten dan hnuaia dikna chanvo an neih leh hamthatna an hmuh theihte inhrilh a ni.
Training hi Maintenance & Welfare of Parents & Senior Citizen Act 2007-in a phut angin, dan kengkawh tura din – Appellate leh Maintenance Tribunals member, district hrang hrang atangin DC, SP, SDPO leh thawktu dang hemi kaihhnawih ho kohkhawm an ni a; tlawmngai pawl leh kohhran lam – MUP, MHIP, CYMA, MKHC leh NGO dangte sawm an nih bakah department official leh staff an tel bawk.
He dan hnuaiah hian kum 60 chunglam enkawltu neilo chu an fate emaw fa neilo chu an chhungte emaw an ro khawmtu in an enkawl tur a ni. He dan hmang hian faten an enkawl loh nu emaw pa/ chhungte/ rokhawmtu chu action lak sak theih an ni a, a enkawl duhlotu an fate/ chhungte/ rokhawmtu chu thla khatah Rs. 10000 thleng an nu leh pa/pi leh pu/ chhungte /ro an khawmsak chu inenkawlna pek tir theih an ni. Inlaichinna awm lo mah se, rokhawm saktu in a rokhawm saka kha a enkawl duh leh si loh chuan, kha ro kha laklet sak theih a ni. District tinah Tribunal hi din tur a ni a, hetah hian complaint thehluh theih a ni.
Kalkhawmte hnenah hian Elderline programme manager Lalbiaksanga’n Elderline chungchang a sawizau a, kum upa tanpui ngai chuan phone number 14567 ah a call in an lo tanpui thei reng tih a sawi. An zir tur dan hi advocate T Lalnunsiama’n chuan a zirtir a ni.