Enthlatua puhin YouTuber man belh leh

Enthlatua puhin YouTuber man belh leh
Chawlhkar tam lo tak liam taa ram enthlaa puhna avanga travel vlogger man a nih hnuah Punjab-a YouTuber pakhat chu Pakistan tana enthlak hna thawka puhin man leh a ni.
Indian agency-te chuan ramri pela ram chhung thil leh chanchin pawimawh pe chhuak thinte laka beihpui an thlakna kal zelah man a ni.
Jasbir Singh-a hian YouTube channel pakhat, ‘JaanMahal video’ tih neiin subscriber pawh maktaduai khat chuang a nei a. Rupnagar-ah Punjab Police-in an man a ni.
Singh-a hi Pakistan-a Inter-Services Intelligence (ISI) officer pakhat, Shakir-a an tih nen an inbe fo va, thenawm ramah hian vawi thum a zin tawh bawk niin thuneitute chuan an sawi a. Police chuan a phone-ah Pakistani number thahnem tak an hmu bawk.
Delhi-a Pakistani Embassy-a Pakistan National Day hmannaah pawh a tel tawh bawk.
Singh-a hian thla hmasaa YouTuber man tawh, Jyoti Malhotra-i pawh a be fo thin a. Malhotra-i hi ‘Travel with Jo’ tih channel neitu niin Pakistan-ah hian vawi thum vel a zin tawh nia hriat a ni a, Pakistani intelligence official-te nen pawh inbe fo nia puh a ni.
Police chuan an inbiaknaah hian Malhotra-i hian Pakistani biak pawh a nei tih an hre thei a. Kum 33 mi YouTuber hian WhatsApp-a ISI mi a biaknaah Pakistan-ah pasal zawnpui turin a ti bawk niin an sawi.
April 22-a Pahalgam-a mi firfiakten mi 26 an thah hnuah India hian ram enthla leh himna tiderthawng thei thil chhui zui zelin Pakistan hnena thil pawimawh hrilh thin phei chu a man zel a. India awp Kashmir-a firfiakte chetna khan India chuan Pakistan thlawp pawl tihah puhin ram pahnih inkar pawh a khik nasat phah hle a ni.