Environment laka rilru puthmang

Scientist-te chuan kan khawvel leilungah hian thil nung (plants & animals) chi (species) hrang hrang maktaduai riat leh nuai khat chuang a awm an ti a. Heng thilnungte hian khawmual leh tui an dap chhuak vek a, khawsak phung hran theuh nei ni mah se, mahnia dam khawchhuak thei bik hi eng mah an awm lo va, inmamawh leh inringtawn vek turin Siamtuin a lo siam a. He inrintawnna ‘ecological balance’ hi tihchhiat emaw, khawih danglam nasat a nih chuan nunphung a lo buai a, chu chuan tawrhna a lo thlen ta thin a ni.
Kan ram dinhmun hi han thlir ila, pi leh pute hun lai khan sik leh sa thawh dan kha kum tin a ngaiin a lo thleng dik chat chat a. Kum khat chhunga fur ruahtui tlak hun leh a tlak hun chhung an chhinchhiah a, khua a ro hun lai an chhinchhiah a, khua a vawh hun lai te, khua a lum hun lai te an chhinchhiah a, hming an vuah thliah thliah a, chumi hmang chuan khawsak phung an rel a, ruahmanna an siam a, chu chuan an khawsak phung a rel fel thin.
Tunah chuan pi leh pute hun laia sik leh sa thleng dik thin ang kha a thleng dik hleithei ta lo va, planning lamah kan lo buai phah ta a. Kan mamawh bak chham, duhamna avanga ramngaw, thing leh mau kan suasam nasat avangin tuihna a lo kang a, lui tui a lo kâm a, tui in tur tlachham dawn dawnin kan awm ta a. Ruahsurin hun bi a neih tak loh avangin thlaiin an tuar a, developmental work pawhin a tuar a, nunphung a lo khaihlak a. Nunphung a khaihlak satliah mai a ni lo va, harsatna kan tawk a, hreawm kan tuar ta a ni.
He tawrhna, hreawmna kan tawh mek hi a thlentirtu chu tu dang ni lovin keimahni mihringte hi kan ni ber a. Siamtuin inmamawh tawn leh inring tawn tura thilnungte min duan anga kan khawsak tak loh avanga heng tawrhna thleng mekte hi kan haider lui tlat a nih chuan, tun aia nasa zawk hi kan tuar chho zel dawn. Tun khawvela cheng mekte hian keimahni hun lai chauh hi ngaihtuah lovin, kan tu leh tuchhuan lo awm zel turte kan hnutchhiah tur hi kan ngaihtuah a ngai a, tun atanga environment laka kan rilru puthmang hi kan siam that loh chuan, kan ram hi thlah kal zelte tan thlalerah kan chan mai ang tih hlauhawm tak a ni tawh.