Environmental Compensation Vbch 50 kha…

Kum hnih chuang hret liam ta 2022 khan National Green Tribunal, Principal Bench chuan State hrang hrangte hearing a nei a, Mizoram pawh Dec 8, 2022-ah a inlan a.
Hemi chungchang hi, thuthar lakkhawm lama rintlak ber bera ngaih ANI leh PTI te chuan, Mizoram sawrkar chu bawlhhlawh (solid & liquid) sawngbawl kawnga a thawh that loh avangin National Green Tribunal (NGT) chuan Environmental Compensation cheng vbch 50 a chawitir, tiin an tarlang a.
Hemi chungchang hi Mizoram sawrkar hnuaia UD&PA department thuchhuah (3031/2022-2023, Aizawl, 14th December, 2022) ah chuan, ‘NGT hian Mizoram sorkar sum a chawitir lo’ tiin tarlan a ni ve thung a. “National Pollution Control Board leh State sorkar atanga report an dawn te uluk taka an en hnuah NGT chuan Mizoram chhunga bawlhhlawh leh tuichhe sawngbawl nan cheng vaibelchhe 50 mamawh nghal a nih thu leh Mizoram sorkar chu a tul anga sum ruahman turin an hriattir..” tiin UD&PA Deptt thuchhuahah chuan tarlan a ni.
Hemi chungchangah hian, thudawnna pakhat chuan, bawlhhlawh sawngbawl kawnga hmalaknate regular taka report thehlut tura NGT lamin Mizoram a phutna chu tihhlawhtlin that a nih loh avangin Mizoram chuan cheng singli a chawi leh, tih a ni.
Pawisa chawi leh chawi loh chungchang chu eng pawh ni se, hetia han en thuak pawh hian, bawlhhlawh thehthang leh sawngbawl kawngah hi chuan mipui lam a ni emaw sawrkar lam a ni emaw, kan ‘fail’ tlang chu a ni ber lawm ni a tih theih. Sawifiah vak ngai lova ni tina mit ngeia thil thlen dan hmu chiangtu vek kan ni a, kan lui dung te, kan kawmkar leh kawr ruam zawng zawngte, kan khawlaiah te, plastic leh bawlhhlawh dang a tlingkhawm ten tun vek a, environmental compensation hi chu lo chawi ta pawh ni ila, ‘chawi awm reng kan lo ni e’ tih tur chu kan ni.
Sawi leh sawi hnu, dan kan neihte hi a nihna tur anga kenkawh a nih thin loh vanga buai thin kan ni deuh zel. Solid Waste Management Rules, 2016 te hi a nihna tur anga kenkawh that ni se, kan heti em em lo deuh turah chuan a ngaih theih awm e.