EPL 2024-24 tan a ni Team lian an chak nghal
English Premier League 2024-25 season chu Zirtawp zan khan khelh tan a ni a. Zirtawp zan leh Inrinni zana inkhelah champion tura rinkai team lian ten hnehna an chang vek. EPL 2024-25 a hnehna chang hmasa ber chu Manchester United an ni.
United tan Zirkzee a vul nghal
Zirtawp zan khan Manchester United chuan Fulhman hmachhawnin bul an tan a, Old Trafford a mipui 73,297 zet hmaah an player thar Joshua Zirkzee goal thun hmangin hnehna an chang.
Old Trafford-ah Manchester United leh Fulham te an inhnehtawk viau a, goal pawh a lut har hle. Hun rei tak chhung goal lut a awm thei lova, an inhnehtawk tura ngaih a nih hman laiin United player thar Joshua Zirkzee chuan minute 87-naah chakna goal a thun a, United a chakpui. United in Bologna atanga an lak luh Zirkzee hian minute 61-naah Mason Mount thlakin mualchhung a lut a, Argentina rawlthar Alejandro Garnacho nen an lut rual. An luh hnuin United goal nawr a na sauh a, hun tawp dawnah goal an thun zui ta nghe nghe a ni.
Fulham an hmachhawn tum hian United in an lak thar Noussair Mazraoui chuan bul a tan a. Bayern Munich atang veka an lak luh Matthijs de Ligt pawhin minute 81-naah Harry Maguire thlakin Fulham a hmachhawn ve bawk. An player tharte a chetthat nghal vangin United an phur hle a, champion theih beiseina sang zawk an nei thar.
Hnehna nena bul tan Slott
Inrinni zan khan champion tura rinkai zinga mi Liverpool chuan manager thar Arne Slott hnuaiah bul an tan a, si hnih faiin Ipswich Town an hneh. Reds manager thar Arne Slott chuan tualchhung league harsa bera ngaih EPL-ah hnehna nen bul a tan.
Portman Road EPL a kaisang thar Ipswich Town hmachhawn tura lenglut Liverpool an khel tha viau naa goal erawh an thun har viau thung. Darkar khat an khel tling chiah tihah Diogo Jota chuan Liverpool hmahruaina goal a thun. Hmahruaina goal an thun hnuin an khel tha zui viau a, goal pawh an thun belh thuai. Minute 65-naah Mohamed Salah chuan Dominik Szoboszlai siamsak atangin Liverpool goal hnihna a thun a, an hmahruaina a tizau. Reds goal hnihna thuntu Salah hian EPL tanniah vawi kua zet goal a thunna a ni a, hei hi EPL record a ni.
Team hmuhnawm Arsenal
Season hnih chhung EPL a pahnihna ni zawn tawh Arsenal hian Wolves hmachhawnin bul an tan a, an mualah hmuhnawm taka inlanin si hnihin hnehna an chang nghal. Emirates stadium-a inkhel hmuhnawm takah Kai Havertz chuan Saka siamsak tha tak chu minute 25-naah chiang zetin a tauh goal a, hmahruaina goal a thun. An mualah hmuhnawm takin inlan mah se Gunners hian goal an thun belh mai thei bik lo thung. Goal hmahruai siam chhuaktu Bukayo Saka chuan minute 65-naah chiang zeta pet goal in an goal hnihna a thun a, an chakna a nem nghet. Hun tawp thlengin goal dang a luh belh lova, Gunners hian point thum nen season thar bul an tan.
Inrinni zana inkhel dangah Brighton in 3-0 ngawtin mualneitu Everton an hneh. Newcastle United in an mikhual Southampton chu si khat faiin an hneh a. Aston Villa chuan mikhual an nihna hmun London Stadium-ah si khat faiin mual neitu West Ham United an hneh ve bawk.