EPL a hmahruaitu thar City

April 23, Nilaini zan khan English Premier League 2025-26 khelh chhunzawm a ni a, inkhel ngaihven hlawh takah Manchester Cityy in Burnley an hneh a, Arsenal lehpelin table chung ber an luah. City in table chung ber an luah laiin an muala tlawm Burnley erawh EPL-a an inhamtang zo lova, championship lamah an tlahniam ve thung. Turf Moor ah champion tum City leh tlahniam Burnley te boruak tawn a danghlei hle.
EPL table-ah pahnihna luah mektu Manchester City hian Pathianni zan khan an chunga awm Arsenal an hneh a, champion theih beiseina sang zwk an nei. Arsenal hi point thumin la thlau mah se khel tlem zawk an nih vangin Arsenal nihrual theihna hun tha an nei. Nilai zana an len luhna Turf Moor-ah an chak a nih chuan Arsenal lehpelin hmahruaitu thar an ni thei a. Table chung ber luah theihna hun remchang an neih chu Ertling Haaland goal hmangin a takah an chantir a, table a hmahruaitu thar an ni.
Turf Moor ah champion tum Manchester City leh tlakhniam pumpelh tuma thapui thawh Burnley ten inkhel hmuhnawm an lantir a, inkhel tan phat atangin an innawr nghal chat. Mualneitu Burnley in hlauhawm an siam hmasa a, Donnarumma paltlang zo lovin an hun tha neih an hlah. Goal an chhuah teuh viau hnuin City in goal thun theihna hun tha an nei zui ve leh zat a, goal post tih perin an hun tha neih an hlah ve bawk.
Goal thun an tum luatah Burnley an chesual a, City in fuh takin an nawr let thut. Jeremy Doku siamsak tha tak chu palian, tlanchak leh ball thiam Erling Haaland chuan fuh zetin a um tlang a. Burnlet si nghak Martin Dubravka chuan angle khar tha viau mah se a hun tha neih hlah duh mang mang lo Haaland chuan chiai lo zetin a pet goal a, minute 5-na lekah a pet goal a, hmahruaina goal a thun.
Chawlhlawk hmain khel thei fu mah se chawlhlawk hnu lamah erawh Burnley an bet deuh reng thung a, City in goal thun theihna hun tha an nei mawlh mawlh. Goal hmahruai thuntu Haaland chuan goal thun belh teuh viau mah se goal post a pet per a, a hun tha neih dang pawh Haaland hian uiawm takin a hlah zui bawk. An hun tha neih dang zawng zawng chhawr tangkai thei lo mah se City hian an goal neih chhun an humhim a, hnehna changin point thum hlu tak an hmu zu ta a ni.
Burnley laka chak City hian khelh 33 atangin point 70 an hmu a, Arsenal nen an point hmuh zat a intluk chiah. Gunners nen hian goal difference-ah intluk chiah bawk mah se head to head a tha zawk an nih vangin table chung ber an luah a. Khelh hmabak game nga an la neihah champion ngei tumin tan an khawh zui ang.
Champion tum City in table chung ber an luah laiin an muala tlawm Burnley chu season thara EPL khel turin an tling zo ta lova, season khat hnuah Championship lamah an kir leh dawn. Burnley leh 17-naa awm mek West Ham te inkarah point 17 zet a tlazep tawh a. Burnley hi 18-naa aia sangah an awm thei tawh lo va, an tlahniam chiang ta a ni. .