EPL champion Manchester City

Khawvela tualchhung league ropui leh sum tamna ber English Premier chuan champion thar a nei a. Champion thar chu vawi hnih champion zawn tawh Manchester City an nbi. Inrinni zana inkhelah pahnihnaa awm mek Arsenal chu Nottingham Forrest lakah an tlawm vangin Manchester City hi champion theihna hun tha an neih hmasak berah an champion nghal a. Inrinni zan khan awmhmuna tha hahdam diai chungin an champion.
Club hausa thar, sum tam tak senga player tha tak tak la khawm City hian English Premier League an thunun hneh rih viau a, season hnuhnung vawi rukah vawinga ngawt an champion a. Tuna an champion hi a zawna vawithum an champion na niin, an elpui lian Manchester United hnung an zui.
Premier League-ah hian vawi thum champion zawn hnuhnung ber chu Manchester United an ni a. United hi kum 2006-07, 2007-08 leh 2008-09 season thum chhung khan an champion zawn. United hnu lamah EPL-a vawi thum champion zawn thei hmasa ber chu Manchester khaw club tho City an ni a. Manager tha Pep Guardiola enkawl City hi EPL-ah 2020-21, 2021-2022, 2022-23 season-ah a zawnin an champion. EPL Champion thar City hi FA Cup leh Champions League-ah champion thei dinhmunah an ding mek a. Trophy lian pahnih a lak belh thei a nih chuan Manchester United lu lamah EPL club zinga treble champion thei hmasa ber an ni a. United hi kum kum 1999 khan treble champion an ni a. Hemi hnu lamah hian EPL club zingah treble champion thei an la awm lo. United leh City te hi FA Cup final-ah an intum dawn a. United hian hnehna changin City in treble champion nih an beiseina tihthlawnsak ngei an tum ang.
EPL 2022-23 ah hian season dang ang lo takin club lian Manchester United, Liverpool, Chelsea leh Tottenham ten beisei an phak lo rual thup a. Beisei loh takin Arsenal an chetha ve thung a, Gunners hian champion theihna hun tha tak an nei hman hial. Hun rei tak chhung hmahruai mah se hun pawimawhah Arsenal an tlo tawk lo va, khel thum an chak theih loh zawn hnuin an elpui lian ber City lakah vawi hnih an tlawm leh bawk a, an hmahruaina an hloh fel. City champion tur chelh khawtlai thei dinhmunah ding mah se Arsenal hi Brighton leh Nottingham Forrest hneh lovin an tlawm zawm leh ringawt a. Dan rual lohin City bawk an champion leh ta nge nge a ni.
EPL champion thar Manchester City hian khelh 35 atangin point 85 an hmu a, khelh hmabak pathum an la neihah an tum ram thlengin an champion. Khelh 35 atang hian an khingpuite lakah goal 92 zet an thun a. Goal 92 an thun zinga goal 36 zet hi Erling Haaland thun a ni a. Goal 31 an chhuah ve tawh bawk.