Daily Newspaper

EPL hmahruaitu thar Liverpool

7

Nilai zana English Premier League khelhah Liverpool leh Tottenham te chuan Anfield-ah hma hruaitu nih an inchuh a. Inkhel hmuhnawm takah mualneitu Reds chuan hun tawp dawn hnaiha Firmino goal thun hmang in hnehna anc chang a, hmahruaitu thar an ni.

Reds an vannei
Anfield-a inkhel hmuhnawm tak tan a nih hmain Liverpool manager hlui boral ta Gerard Houllier suna hun hman a ni. Sunna hun hman zawha nihin season kal meka EP a team tha pahnih ten enmawn an lantir zui nghal. Hliamin a tihbuai nasat Liverpool in ngam takin Mourinho-a team te an nawr a. Mourinho-a team ten an tihdan ngaiin nawr let thuta goal thun an tum ve thung. Khelh dan inang lo tak a nih vangin inkhel hmuhnawmna a tizual zawk mahin a hriat.

Inkhel tantirh lamah Liverpool hian na takin an nawr a, Robertson siamsak atangin Roberto Firmino chuan goal a thun nghal teuh hle. Hma takah goal thun nghal lo mahse na takin an nawr zui zel a, minute 26-naah goal an thun ta tho thung. Mawi taka ball an inpekkual hnuin Mohammed Salah chuan goal thun tumin a pet a, a tum angin pet thei lo mahse sang takah ball a vir a, mawi zet, Hugo Lloros tan dan rual lohin a goal ta tho thung.

Goal an chhuah hnu lawkin Tottenham in an tih dan pangngaiin an khingpuite an nawr let thut a, an hlawhtling leh ta nge nge. Mawi zeta Liverpool tlarhnung an thiah hnuin Son Hueng-min chuan minute 33-naah a pet goal a, an si 1-1 a inhnehtawk chungin chawlhlawk an hmang.

Chawlhlawk hnu lamah inkhel a hmuhnawm leh zual a, Tottenham an khel tha a, goal thun theihna hun pawh an nei zauh zauh. Team hnihten hun tha an hloh ve ve a, chak zawk an awm mai thei lo. Spurs tan Berjwin leh Son ten goal an thun tak loh chu a uiawm tak zet. Chak zawk an awm thei lo mai tura ngaih a nih hnuin Firmino a inlan ta thung. Minute 90-naah Robertson corner atangin Roberto Firmino chuan tha zetin a tauh goal a, hma an hruai nawn leh a, hnehna pawimawh tak an chang zui ta a ni.

Inkhel pawimawh takah hnehna pawimawh tak an chan vangin Liverpool chuan table ler an luah thar a, hmahruaitu Tottenham chu point 3 in an lehpel. Champion lai Liberpool hi hliamin a tibuai nasa a, an tlarhnung player tha an hliam kimdeuh thawh hman hial. Chuti chung chuan EPL leh champions league lamah an chetha viau tho thung.

Reds an hmachhawn hmaa an khingpuite lo vau a, “Football-ah chuan hliam chhuanlam tur a ni lo, player hliam sawi reng tur a ni lo” titu Jose Mourinho chuan hun tha tam tak an hloh vanga tlawm zawkah an tang ta chu uiawm a tih thu a sawi a. Liverpool manager Jurgen Klopp hnenah EPL team tha ber an hneh tiin a hrilh zui nghe nghe.

Liverpool hian inrinni zanah Crystal Palace an hmachhawn zui leh ang a. Tottenham hian khingpui hautak tak Leicester City an hmachhawn zui leh thung ang a, fiahna hautak an hmachhawn leh ang.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy