Eptu lam chakna…
2-Dampa (ST) Assembly Constituency by-election result chu nimin November ni 14, 2025 khan puan fel niin rorel lai ZPM official candidate Vanlalsailova chu a tling zo ta lo a.
Eptu lam MNF official candidate Dr. R. Lalthangliana chuan vote 6,981 (40.15%) hmuin tlinga puan a ni a; Vanlalsailova hian vote 6,419 (36.92%) a hmu a, an inthlauhna hi 562 niin, an vote hmuh percent inthlauhna pawh 3.23% a ni.
Candidate dang, INC candidate John Rotluangliana chuan vote 2394 hmuin pathumna a hauh a, BJP Mizoram candidate Lalhmingthanga pawhin vote 1,541 hmuin palina a ni a, MPC candidate K. Zahmingthanga chuan vote 50 a hmu bawk.
Dampa bial by-election result hian inthlanpui lo awm tur (2028)-ah nasa taka nghawng nei zui thei tura ngaih a nih avangin party tin an tang hlawm hle a, by-election awm tawhah chuan boruak nei lian ber pawl nia sawi a ni nghe nghe a; sawrkar laipui atangin union minister-te pawh an lo thleng zak zak a nih kha.
Rorel laiin by-election ah chakna an chang zo ta lo a ni a, hei hian eng nge nghawng a neih zui zel dawn tih chu mipui lamin ring fan chunga an thlir tur chu a ni ta. 2023 inthlanpuiah khan ZPM leh MNF inthlauhna kha vote 292 a ni a, tunah hian a hmaa an inthlauhna let thuakin an chak lo zui leh ta si a, helai bialah hi chuan an tla salh salh zel a ni ber a, ‘an tla na ta lo hle’ a tih theih bawk awm e.
Polling station tina vote tlak dan atang hi chuan, Vanlalsailova hian Dr Thangtea aiin polling station a hui tam zawk a, 21-ah chakna a chang a; polling station pakhatah vote inang an hmu a, Dr. Thangtea hian PS 19-ah chakna a chang ve thung a, PS hi a vaiin 41 a ni.
Vanlalsailova hi Dampa bial mi leh sa niin vote tamna ber West Phailenga khawsa a ni a, chuti chung chuan bial pawn lam mi Dr Thangtean West Phailengah hian vote a hmu tam zawk a, vote 116-in an inthlau a. West Phaileng khaw mipuite hian ZPM-ah rinna an nghat ngam ta lo tihna nge, an khaw pa Vanlalsailova chungah zawk hian rinna an nghat ngam ta lo zawk tih chu zawhna awm thei a ni awm e. Hetih rual hian, Vanlalsailova ngawr ngawr lam ni chuang lovin, rorel lai khawsa zia (development etc.) emaw, hruaitute khawsak dan emaw vangte a ni thei ang em? tih pawh zawhna awm thei bawk a ni.