Etihad Stadium atangin De Bruyne a inpuchhuak dawn

Manchester City midfielder ropui leh an captain ni mek Kevin de Bruyne chuan season tawp hunah Manchester City a chhuahsan dawn tih zirtawpni khan a sawi chiang ta.
A vanglaia midfielder tha ber zinga mi Kevin de Bruyne hian kum 2015 khan German club Wolfsburg atangin English club hausa thar Manchester City a zawm. Khawvela league harsa ber ang hiala sawi thin EPL-ah a insiam rem thuai a, City player pawimawh, an game khaikhawmtu pawimawh a ni thuai. Etihad Stadium-ah kum 10 a cham chhungin De Bruyne hian City tan inelna hrang hrangah vawi 413 zet a khel hman a, trophy 16 ngawt a chawi nghe nghe. City hi EPL-ah vawi ruk ngawt a champion pui a, League Cup-ah vawi nga a champion pui bakah FA Cup leh Community Shield-ah a champion pui a. Manchester City hi tui let hnu lama an la champion ngai lohna Champions League-ah a champion pui hial bawk.
City tan inelna hrang hrangah vawi 413 a khelh atang hian goal 106 zet a thun a, midfielder goal thun thei tak a ni, Goal 106 zet a thun bakah hian assist vawi 174 zet a nei cheu bawk a, hei hian player tha chungchuang a nihzia a nem nghet. Belgium midfielder De Bruyne hian Premier League season khatah assist vawi 20 a nei tawh a, EPL season khata assist ngah ber record siamtu Thiery Henry record a tluk hial a ni. City tan a khelh that theih em vangin Premier League Player of the Year award vawi hnih ngawt a lo dawng tawh nghe nghe.
Kum 33 mi De Bruyne hian season tawp rualin City-a a contract neih mek a hmang zo tawh dawn a. Contract thar ziak leh turin sawmna dawng tho mah se chona thar hmachhawn a thlang a, nipui bazar inhawn hunah free transfer a chhuak turin thutlukna a siam. Nipui bazar leh thlasik bazar liam taah pawh khan Saudi Pro League club leh Major League Soccer club te chuan De Bruyne hi an hnen pan turin an lo thlem tawh a. Hlawh tam uchuak tak pek an huam vangin a chhuak teuh hle nghe nghe. Sum tam tak hnarin City-ah a rinawm a, a cham chhunzawm ta zawk. Etihad Stadium-ah cham chhunzawm mah se hliamin a tibuai bawk nen player pawimawh a ni phak lo ta fo va, bench atanga luh a nei ta nual. A hma lam hun tur uluk taka a ngaihtuah hnuin City chhuahsan a thlan tak thu a sawi. De Bruyne hian a club thar tur pawh a tihchian theih thuai a ring.