Euro 2016 final rematch ; Portugal vs France

Zan dar 9:30-ah Spain leh Germany in Euro 2008 final rematch an khelh zawh hnuin zanlai dar 12:30-ah Euro 2016 final rematch hmuh tur a awm chhunzawm leh nghal zat dawn a. Portugal leh France te chu Volksparkstadion, Hamburg-ah semi-final luh inchuh in an inhmachhawn dawn.
2016 champion Portugal hi inelna nei mekah an khel tha hluai lo naa khelchhia tia sawi tur an ni lo. Group F-ah vawi hnih chak zawnin group champion an ni chiang nghal. Group leader an nih chian hnuin an B team in Georgia an hneh lo tlat thung. Last 16-ah Slovenia an hmachhawn a, minute 120 chhungin goal an thun thei lo. Tie-break-ah 3-0 a chakin quarter-final an lut a, France lakah fiahna hautak zawk an hmachhawn zui a ngai dawn.
Player nei tha France hi Euro 2024 khelh mekah beisei phak lo ber pawl an ni. Group D-ah pahnihna an ni a, an chungah Austria an awm. Last 16-ah Belgium an hmachhawn a, own goal hmanga chak leh hramin quarter-final an lut. Quarter-final an luh thlengin France hian goal thum chauh an thun a. Goal thum an thun pawh hi own-goal pahnih leh penalty atanga Mbappe thun a ni. Portugal lakah goal thun an harsat chhunzawm a nih chuan tlak a hnaih viau dawn tihna a ni.
Portugal leh France te hi vawi 28 an inhmachhawn tawhah France an chungnung viau a, vawi 19 ngawt an chak. Portugal hian vawi ruk hnehna an chang tawh a, vawi thum an inhnehtawk. Chak tur zawk rin thiam har khawpa team inbuk tawk an ni.