Euro 2024 ah record thar pakua

Pathianni zanlaia khelh zawh tak Euro 2024-ah khan Euro record thar 10 chuang zet a awm a, Euro 2024-a record thar langsar zual kan tarlang ang.
1. Vawi li champion hmasa ber Spain
Euro-ah hian ram 11 an lo champion tawh a, vawi thum champion pahnih; Spain leh Germany ten champion tam lamah record an siam dun reng a. England hnehna Spain an champion tak vangin Spain hi Euro-ah vawi li champion thei hmasa ber niin champion tam lamah record thar an siam.
Spain hian Euro-ah hnuhma an nei tha hle. Kum 2008 leh 2012 khan an champion zawn a, Euro-a champion zawn thei hmasa ber record an lo siam tawh. Euro-ah champion tam ber leh champion zawn thei hmasa ber an nih bakah group stage leh knock out round-ah chak vek chunga vawi hnih champion thei awmchhun ni bawkin, kum 2008 leh 2024-ah chak vek chungin an champion. Euro 2024 champion Spain hian goal 15 ngawt an thun a, Euro vawi khata goal thun hnem ber record siamin, France record goal 14 an khum bawk.
2. Player naupang ber Yamal
Spain rawlthar Lamine Yamal chuan kum 16 leh ni 338 chauh ni chungin Croatia a hmachhawn a, Barcelona rawlthar duhawm Yamal hi Euro khel thei naupang ber a ni. Euro 2024-ah rawlthar tha bera thlan zui tak Yamal hian kum 16 leh ni 362 niin France lakah goal a thun a, Euro ah goal thun thei naupang ber record thar a siam leh bawk. Inelna neih zawkah takah record thar pahnih ngawt siamtu Yamal hi a chetha hle a, goal khat a thun bakah assist vawi li ngawt a nei. Euro chanchinah assist ngah ber chu assist vawi riat nei tawh Cristiano Ronaldo a ni a. Spain rawlthar Yamal hian C Ronaldo record a hnaih nghal kuarh.
3. Goal lut rang ber
Albania player Nedim Bajrami chuan Italy an hmachhawn tumin inkhel tan atanga second 23-na lekah hmahruaina goal a thun a. Hei hi Euro-a goal lut rang ber niin, a hma record lo awm tawh 2004-a Dmitri Kirichenkoa record siam second 67-a goal thun chu second 40 ngawtin a khum.
4. Player upa ber Pepe
Portugal defeder rorum zet mai Pepe chuan kum 41 leh ni 130-a upa ni chungin Eur0 2024 a hmachhawn a, Hungary goalkeeper Gabor Király (40 yrs & 86 day) record siam khumin Euro khel thei upa ber record a siam.
5. Euro vawi ruk khel thei C. Ronaldo
Portugal player ropui Cristiano Ronaldo chuan a vawi ruk nan Euro 2024 a hmachhawn. Ronaldo hi Euro 2004, 2008, 2012, 2016, 2021 leh 2024-ahte a inlan vek a, Euro vawi ruk a inlan thei awmchhun a ni.
6. Goal thun thei upa ber Modric
Croatia midfielder ropui Luka Modric chuan kum 38 leh ni 289 a upa ni chungin goal a thun a. Ballon d’Or hial pawh lo dawng tawh Modric hi Euro-a goal thun thei upa ber a ni.
7. Goal thun tlai ber Csoboth
Scotland nen an inkhelh tumin Hungary player Kevin Csoboth chuan hun pangngai minut 90 tawp hnua hun pek belh minute 10-naah goal a thun a, Euro-ah extratime ni lova goal thun tlai ber record thar a siam.
8. Match khata card phawrh tam ber
Group F-a inkhel hmuhnawm zet Czech Republic leh Turkey te an inkhelh tum khan card a leng chum chum a ni ber mai. Kha inkhelah khan player 17 ngawtin yellow card an hmu a, player pahnihin red card an hmu hial bawk. Inkhel pakhatah mi 19 zetin card an hmu a, Euro-ah match khata card hmu hnem ber record an siam a. A hmaa record lo awm tawh inkhel pakhata player 10 in card an hmuh chu a let dawna tamin an khum chiang hle.
9. Penalty save tam Costa
Portugal leh Slovenia ten penalty shoot-out a chak zawk an zawn tumin Portugal si nghak Diogo Costa chuan vawi thum ngawt a dang (save) a, Costa hi penalty shoot-out tum khata save nei hnem ber a ni. Hetihlai hian Slovenia hi Euro-ah penalty shoot-out tum khata thelh hnem ber an ni ve thung.