Euro 2024 – Champion lai Italy an tla

Euro 2024 khelh mekah inrinni zan khan last 16 khelh tan a ni a, last 16 hmasa berah champion lai Italy chu Switzerland lakah si hnih faiin an tlawm a, quarter-final lut zo lovin an tla. Euro-ah champion laiin last 16 pal tlang an harsat chhunzawm. Italy an mualpho laiin Champion lai hnehtu Switzerland erawhin fak an hlawh a, thleng sang turin rin an kai lehzual hle.
Champion zia pu lo Italy
Euro 2020-ah hmu-hnawm taka inlan a, champion zui ta hial Italy hi an player langsar tak takin an chawlhsan a. Player naupang tha an chawrchhuah rih bawk si loh vangin an tha tawk lo hle a, Euro 2024-ah champion tura rinkai zingah an tel phak lo. Manager lai Jose Mourinho chuan Italy hian last 16 paltlang tura an that tawk loh thu a lo sawi tawh a, a dah sang lo hle. Italy manager Luciano Spaletti ngei pawhin champion tura rinkai an nih loh thu a sawi a, rinkai an nih lohna chu an chhawr tangkai tur thu a sawi tel bawk.
Champion lai an nih vanga ngaihven hlawh Italy hian bul an tan tha lova an khelh hmasak berah Albania an lehthal thei hram. An khelh hnihnaah Spain hneh lovin an tlawm. Dinhmun derthawngah an din laiin Croatia lakah vanneihthlak takin tlawm an pumpelh a, pahnihna ni chungin last 16 an lut. Last 16-ah team lian zawk pumpelh a Switzerland an hmachhawn vangin quarter-final luh theih beiseina sang tak an nei. Switzerland lakah champion zia pu lo, champion lai ni awm lo takin an inlan a, an tlawm zui ta hial a ni.
Group stage-ah Hungary hneh a, Scotland leh Germany inhnehtawkpuitu Switzerland hi Italy lakah inringtawk takin an inlan a, chak phu zawk an nih ang ngeiin an chak a, champion lai hnawtchhuakin quarter-final lut hmasa ber an ni.
Olympiastadion Berlin-ah Switzerland hian ngam takin Italy an hmachhawn a, inkhel tan tirh phat atangin khel tha zawk an ni a, hlauhawm zawk an ni reng bawk. Forward thahrui nghah leh hnawksak tak Breel Embola chuan goal thun theihna hun tha zet mai a neih a chhawr tangkai thei lova, Italy si nghak Gianluigi Donnarumma chuan pui zeta dangin Italy a chhan him. Swiss hian free kick atangin goal an thun zui leh teuh hle a, Donarumna bawkin pui zetin a dang leh hman hram a, Italy an him nawn leh.
Vanneihthlak takin him hram thin mah se Italy an him reng seng lova, goal an chhuah ta nge nge. Veilam sir atanga Ruben Vargas siam tha zet mai chu Remo Freuler chuan box chhungah fuh zeta a dawn hnuin minute 37-naah chiang zetin a pet goal a, Switzerland hmahruaina goal a thun. Goal thun hmasa zawk an nih vangin Swiss an phur a, an khel tha zui viau bawk. An si phurh sut mamawh viau mah se Italy hian awm ze neiin an khingpuite an nawr hleithei lova, si khata hnufual zawk chungin chawlhlawk an hmang.
Chawlhlawk hnu lamah Switzerland an khel tha chhunzawm a, goal an thun leh thuai. Second half tan tirhteah Swiss player ten fuh zetin Italy an nawr tlang. Mawi taka ball an inpek kual hnuin khel tha tak Ruben Vargas chuan top corner ah pui zetin a pet goal a, minute 46-naah an goal hnihna thunin an hmahruaina a tizau. Champion lai Italy hian goal thun tuma tan khawhin, an player thlakkual chiam mah se goal thun tur khawpin an khingpuite an nawr tlang thei lo. |um hnih chu goal thun teuh viau mah se Italy an vanduai a, goal post in Switzerland a chhanhim ve ve. Khel tha rual leh inringtawk tak Switzerland hian thlamuang leh nghet tha takin Italy an hmachhawn tluan a, goal chhuah lova hnehna changin hun rei tak hnuah Italy an hneh ve ta nawlh a, Euro 2024-ah quarter-final lut hmasa ber an ni.
Football ram ropui Italy hian player langsar fal, hruaitu nih tling, mualchhunga team ho khawmtu tha nei lova, chu chu an tuar hle. Player tha vang tlang tak tak nei bawk mah se danglamna thlen tur khawpa filawr an awm lo. An star thar Riccardo Calafiori khelh theih loh an tuar bawk a, Swiss lakah hian chak phuin an inlan phak lo. Quarter-final lut zo lova an tlak vangin an manager Luciano Spaletti an ruai chhunzawm zel dawn em tih a chiang lo a, thu thar an nei thuai tura ngaih a ni.
Italy hnehtu Switzerland tan hian Yan Sommer, Manuel Akanji, Rodriques, Granit Xhaka, Embolo, Dan Ndoye leh Vargas te an hmuhnawm hle a. Tute pawh hmachhawn dawn se inrintawkna sang tak nen an inlan thei tura ngaih a ni. Germany lakah team tha an nihzia an lantir hnu lawkah Italy an hneh zui leh a. He Switzerland team hian final an lut nawlh a nih pawhin thil mak a ni lo ang. Switzerland hian England leh Slovakia te inkhela chak zawk zawk an hmachhawn zui leh ang.
Euro 2012 champion Spain chu Euro 2016-ah last 16 paltlang zo liv lovin an tla a. Euro 2026 champion Portugal pawh Euro 2020-ah last 16 paltlang zo lovin an lo tla tawh bawk. Euro 2020 champion Italy pawh Euro 2024-ah last 16 pal tlang zo lo bawkin an tla zui ve leh a. Champion team tan inelna dawt lehah chetthat a harsa viau thin. Hei hi Euro harsat zia tifiahtu a ni.