Euro 2024 khelh mek chu zanah khelh chhunzawm niin quarter-final khelh zawh a ni dawn. Inrinni zan dar 9:30-ah hian boruak nei lian England an inlan dawn a, Switzerland nen semi-final luh an inchuh dawn. England leh Switzerland inkhelh zawh zanlai dar 12:30-ah Netherlands leh Turkey inkhel en tur a zawm zui dawn bawk. Football ngainatute tan zanin hi menrei zan a ni satliah lo, football ngainatute mit tlai zan a ni dawn.
England hmel thar?
Football ta neih, football a boruak nei lian em em reng England hi Euro 2024-ah an khel tha lova sawisel an hlawh. Beisei phak lo leh sawisel hlawh chungin an tlawm em lova hma lam an pan hram hram zel thung. Beisei phak lo chungin group champion an ni a. Slovenia lakah tlawm teuh viau mah se hun a tawp meuh chuan lawm zawkah an tang a, quarter-final an lut. Football ngainatuten beiseina sang taka an thlir Three Lions hian insiamtha in Switzerland lakah hmel thar lantir an tum dawn.
Quarter final an luh thlengin England manager Gareth Southgate-a’n an that dan ber turin player a la rem fuh thei lova, enchhinna a la kal zel. Si nghak leh defender-ah buai lo mah se a buaina ber chu defensive midfield-ah a ni. Arsenal tana khel tha thei tak, defensive midfielder tha ber zinga tel mek Rice chu khawih chet thiang loh a ni a. An buaina ber chu Rice tana kawppui awm mi, hei zet chuh tih tur a la hmu fuh thei lo. Southgate hian Kalvin Phillips hmunruak luahtu tur a zawng hmu zo lova, Liverpool wing back Alexander Arnold a chhwr a, sawisel a hlawh. Sawisel hlawh tak chhungin Arnold a chhawr zawn a, a vawi thumnan chhawr zawn em turin a luhlul zo tawh lo. Southgate hian Slovenia an hmachhawn tumin Conor Gallagher a luhtir. Last 16-ah Slovakia an hmachhawn tumin a tidanglam leh a, Kobbie Mainoo a luhtir ve leh.
Southgate hian Rice kawppui tur a zawng zak zak a, Switzerland an hmachhawn hunah inthlakthlengna lian a thleng leh dawn niin a lang, 4-2-3-1 formation hmang thin khan quarter-final-ah 3-4-2-1 formation a hmang dawn niin tarlan a ni. England lineup thlirlawknaah chuan si nghak chu a ngai Pickford niin, tlarhnungah Kyle Walker, John Stones leh Ezri Konsa te an intlar ang a. An hmaah Rice leh Bellingham an inkawp ang a. A sirah nawr hun remchangah rang taka nawr a, tawlh hnun hunah rang taka tawlh hnung thei turin Kieran Trippier leh Alexander Arnold te awm in, Foden leh Saka ten hmunawl zau zawk thei an nei ang a, a hma berah Harry Kane a awm ve thung dawn. Hetianga an inrem a nih chuan an game-ah hmasawna a awm emaw, awm lo emaw pawh nise England team hmel thar chu a ni sa pang mai.
Southgate hian 3-4-2-1 formation a hmang a nih ngat chuan an khingpui tur Switzerland hlauhawmzia a hre chiang viau a, an chhutchhah theih dan turin a insiam rem niin a ngaih theih ang.
Player tha leh lar tak tak an neih vangin England hi hmuhnawm taka khel a, chak pur pur tura tlang rin an ni. Chak pur pur tura beisei an ni miau maia an chak hram hiam mi beisei an pha tlat lo. Beisei phak lo mah se quarter-final an lut hial tawh a ni a, bei tidawng erawh an la ni lo. EPL player tha ber Phil Foden a khel tha lo a ni thei, La Liga player tha ber Jude Bellingham a hmuhnawm tawk lo a ni thei a, Bundesliga top scorer Harry Kane a hmuhnawm tawk lo pawh a ni thei e, Saka pawh telin. Mah se, heng player ropui pali te hi ball vawi khat an tawh fuh keuha danglamna thlen thei, result tidanglam dawrh thei a ni tih erawh hai theih a ni lo. Inkhel a tawp a, England an tla fel zet a nih loh chuan an ni ang player theihna nei sang hi chu tangkai lo tia sawi theih an ni tak tak lo.
Inelna lianah hian beisei phak baka bul tan tha, chak pup pup maite hi kawng zawh thui lovin an tla hma duh phian a. Beisei anga bul tan tha lo, derthawng taka chunga chak hram hram, inham tang tawl tawk a, hma lam pan hram hramte hi an thleng sang duh teh tlat bawk. Quarter-final an luh thlenga beisei phak lo England hi Switzerland lakah beisei ang taka tha an khel chhuak ta emaw, beisei phak lo chunga an chak leh hram emaw a nih chuan an champion kum tiin an sawi ngam hial tawhin a rinawm.
Swiss… an lo kal a lawm hei!!
Khawthlang lama Mizoram, Switzerland of the West hi champion tura rinkai vut ni si lo, team khawng leh player nei tha tak si an ni a. Euro 2024 ah hian champion nawlh pawh nise thil mak tia sawi hluai tur ni chuang hauh lo an ni. Inelna thlengtu Germany lakah team tha an nihzia an lantir hnuin last 16-ah champion lai Italy chu 2-0 in an hneh zui leh a, England hmachhawn turin an lo kal a lawm hei!
Swiss si nghak Yan Sommer hi a khelhpuite tan thla timuang khawpa thiam leh inringtawk a ni. Si veng turin a kut a hmang thiam a ni ngawt lo, a keah ball a nghet a, ball a thiam a, team tan a tangkai hle. Sommer hmaah EPL champion Manchester City defender rinrawl Manuel Akanji a ding a, Akanji hian Newcastle United defender Fabian Schar leh Ricardo Rodriquez a kawppui a, an inkawp fuh cher cher hle. Italy lakah tlarhnung ban rinawm an nihzia chiang takin an lantir theuh hlawm.
Muallaiah Arsenal captain hlui, Bayer Leverkusen champion puitu, inelna reng rengah chak tuma engkim hlan thin Granit Xhaka a awm a, a ni hi team phuar khawmtu pawimawh tak a ni. Xakha kawppui fuh tak Remo Freuler khelh that theihzia kan hmu theuh tawh hlawm. England nen an inhmachhawn hunah free kick atanga goal thu an awm a nih chuan Freuler thun hi a ni ang. Inelna neih mekah Swiss hian star thar an nei a, chu chu Dan Ndoye a ni. Ndoye hi EPL lamah kan hmu zui nawlh a nih pawhin a mak lo ang. Ndoye leh player tawnhriat ngah Reuben Vargas ten thahrui ngah, ball thiam tel bawk si Breel Embola an chawm rawn dawn a ni a, England tlarhnungte tan thlamuan an har fu ang. Inelna neih meka khel tha tak Switzerland hian England an paltlang a nih chuan final lut turin inrintawkna sang tak an nei ang.
Head to head
England hian Switzerland lakah record an nei tha viau a, vawi 27 an inhmachhawn tawhah vawi 19 zet an chak a, vawi thum chauh tlawm zawkah an tang a, vawi nga an inhnehtawk tawh. An intum hnuhnung vawi ngaah England hian hnehna an chang vek nghe nghe. Record en chuan England hian Swiss an zuam hle a rinawm. Mahs e, Swiss hian Italy kha hun rei tak chhung an hneh thei lo tawh a, an lakah record an nei chhe hle. Record nei chhe viau mah se phu taka hnehin an puanthuah an teltir tlat thung. Hun kal tawhah record leh result nei tha lo mah se zanin hian hnuhna thar hnutchhiahin, histry thar ziah an tum ang.
Netherlands an vannei nawn
Team lian dangte ang bawka beisei phak lo Netherlands an vannei zui zel a, quarter-final-ah team lian pumpelhin Turkey an hmachhawn dawn. Last 16-ah Romani an hmachhawn vangin Dutch ho hi an lo vannei tawh a, Turkey an hmachhawn dawn vangin an vannei nawn leh. Turkey an hmachhawn tur hi an vanneihna pakhat chu Group stage-a an hneh loh, an mahni zuam em em tur Austria hnehtu an ni hi a ni. Turkey nen hian inhnehtawk thawkhat tura ngaih ni bawk mah se player an inneihhrawl hleih a, palian zawk chu Netherlands an ni.
Netherlands leh Turkey te hi vawi 14 an inhmachhawn tawh a, Dutch ho hian vawi 6 hnehna an chang a, vawi li an inhnehtawk laiin tlawm zawkah vawi li an tang ve tawh bawk.
Euro 2024 ; England inlan zan
Get real time updates directly on you device, subscribe now.
Prev Post
Next Post