Euro 2024 khel tura tling tawh leh beisei la neite

Nakkum Germany rama Europe ram mipa team 24-te football-a inelna tur Euro 2024 khel tur zawnna qualifying group stage chu zawh fel tawh niin, a thlengtu ram nen chhiar telin team 21 an tling tawh a, ram pathumte’n nakkum Marh thla play-off kaltlangin an belhchhah ve leh dawn a ni.
Thawhlehnia Armenia hnehtu Croatia chu qualifier kaltlanga ticket pawtchhuak hnuhnungber niin, Great Britain atangin England leh Scotland an tling a, Northern Ireland leh Republic of Ireland beiseina a thamral laiin Wales-in play-off an khel thung ang.
Qualifying group stage kaltlanga tournament khel turte chu Albania, Austria, Belgium, Croatia, Czech Republic, Denmark, England, France, Hungary, Italy, Netherlands, Portugal, Romania, Scotland, Serbia, Slovakia, Slovenia, Spain, Switzerland leh Turkey niin, a thlengtu nih manah Germany an tel bawk.
Euro 2024 draw hi kumin December ni 2 khian neih a ni dawn a, tah chuan play-off atanga tling turte la lang hman dawn lo mah se ram pathumte awmna tur lo dahfelsa a ni ang.
Euro 2024 qualifying group stage-a tling zo lo langsar zingah Norway an tel a, kum 2000 hnu lama major tournament la khel leh ta ngai lo Norwegian-te hian Group A-ah pathumna dinhmun luahin, Spain lehd Scotland an pha lo a, Germany ramah tunlaia forward thaberte zinga mi Erling Braut Haaland kan hmu dawn lo.
Sweden pawh tling lo langsar zingah telin, kum 1996 hnu lama European Championship an khelh phak loh vawikhatna tur a ni.
Kum 2020-a a vawikhatna’na Euro rawn khel ve nawlh North Macedonia pawh an pil leh nghal a; Ukraine an run avanga hremna kal zelah Russia pawh hmuh tur an la awm dawn lo.
Euro 2020-a kan hmuh Finland leh Ukraine chu qualifying group stage atangin an inhamtang zo lo phawt a, play-off beisei tur an la nei thung.
Euro 2024 qualifying khelh zawh takah khan goal 14 thuntu Belgium striker Romelu Lukaku chu top scorer niin, goal 10 ngah tling Portugal captain Cristiano Ronaldo leh goal kaw thuntu France star Kylian Mbappe-te’n an dawt.
England captain Harry Kane chuan goal riat ngah ve bawkin, Manchester United player pahnih Rasmus Hojlund of Denmark leh Scotland innghahna lian Scott McTominay-te chu goal khung hnem top five zingah telin, goal sarih ve ve an thun tling.
Qualifying khelh lai khan team paruk laiin tlawm an pumpelh tluanchhuak thei a, chutih laiin an match khelh zawng zawnga chak vek awmchhun chu champion hlui Portugal chiah an ni.
Head coach Roberto Martinez-a hnuaiah Portugal khan game 10 chakin, goal 30 an thun tling a, goal hnih chiah chhuahin, a tumhnihna atana European Championship trophy hawn thei turin nakkum Germany ramah hian rinkai an ni leh dawn.
Nikum World Cup final-a chak zo ta lo France chu an game hmasa pasarihah chak fai vek mah se a hnuhnungberah Greece nen sihnih ve ve thunin an inhnehtawk.
Tlawm nei lo team danget chu England, Belgium, Hungary leh Romania-te an ni.
Spain pawh an match hmasa parukah chak vekin Scotland chungah Group A hmahruaitu an ni.
Play-off kaltlang hian pathum an tling dawn a, nakkum March ni 21 khian semi-final match ruk khelh a ni ang a, March ni 26-ah final khelh a ni ang.

Play-off fixture

Semi-finals – Path C: Georgia v Luxembourg & Greece v Kazakhstan
Semi-finals – Path B: Israel v Ukraine or Iceland & Bosnia & Herzegovina v Finland or Ukraine
Semi-finals – Path A: Poland v Estonia & Wales v Finland or Ukraine or Iceland