Euro 2024 last khelh hun a ni ta

Euro 2024 last 16 khelh hun a thleng ta a, zanin dar 9:30 atangin khelh tan a ni dawn. Inrinni zan hian inkhel pahnih a awm ang a. Pathianni zanah inkhel pahnih bawk a awm zui leh a. Tun tumah hian inrinni zan leh pathianni zana inkhel turte thlir lawkna kan nei ang.
Switzerland vs Italy
Champion lai Italy hmaa ding tur Switzerland hi Group A-ah awmin, pahnihna niin an tlang a, last 16 an lut. Group match an khelh hmasak berah 3-1 ngawtin Hungary an hneh nghal a, bul an tan tha viau. An khelh hnihnaah Scotland an hmachhawn a, chak tura rinkai zawk an nih laiin an chak zo bik lo. Scotland lakah beisei phak lo mah se inelna thlengtu Germany lakah tha zetin an inlan a, last 16 lut hmasa ber Germany hian Switzerland lakah tlawm an pumpelh thei hram. Last 16 an luh thlengin Switzerlandhian goal 5 an thun a, goal hnih an chhuah.
Switzerland hian player langsar fal an nei nei lo naa si nghak Yan Sommer, defender Manuel Akanji, midfielder Granit Xhaka leh Xherdan Shaqiri te thlamuanpui tham an ni. Inelna neih mekah star thar an neih belh a, chu an star thar chu Dan Ndoye a ni. Kum 23 mi Bologna player Dan Ndoye hi EPL club lian Manchester United in an hmu tai thar hle a. Serie A champion Iner Milan pawhin an ngaihven thar viau bawk. Italy an hmachhawn hunah pawh player hmuhnawm tura ngaih zingah a tel.
Champion lai Italy hian harsa takin group stage an paltlang thei hram. Harsa taka Albania an lehthal hnu lawkah Spain hneh lovin an tlawm a, dinhmun derthawngah an ding. Group match hnuhnung berah Croatia lakah an tlawm leh teuh viau a, hun tawp dawn tep, ball a tawh hnuhnung berah Mattia Zaccagni goal thun hmangin an si phurh an sut hram a, tlawm pumpelhin, last 16 an lut. Last 16 an luh thleng hian goal li an thun a, goal 3 lai an chhuah ve thung.
‘MHIP team’ an tih fiam mai thin Italy hian tun hma angin player langsar fal an nei hran lo. Si nghak Gianluigi Donnarumma, midfielder Jorginho, Nicolò Barella leh forward Gianluca Scamacca te chu an innghahna langsar an ni. Italy hian star thar an nei a, chu chu Bologna defender Riccarco Cala Fiori a ni. Defender tha, ball keng thei ni tel bawk Calafiori hi Paolo Maldininen khaikhin a ni der tawh. Star thar Calafiori hian khelh hnihah yellow card a hmuh zawn vangin Switzerland a hmachhawn thei dawn lo thung a. A hmunruak hi Gianluca Mancini in a hnawhkhat tura ngaih a ni.
Head to Head
Switzerland leh Italy hi inelna hrang hrangah vawi 60 zet an inhmachhawn tawh a. Vawi 29 chak zawka tang tawh Italy an chungnung fal. Vawi 24 zet an inhnehtawk tawh laiin Switzerland hian vawi 7 chiah Italy an la hneh. Kum 31 dawn chu Switzerland hian Italy an hneh thei lo tawh a. An intawn hnuhnung vawi 11-ah chak an nei lo. Hneh harsa an tih em em thin Italy an hmachhawn dawn a ni a, an chak nawlh thei a nih chuan a ropui dangdai viau ngei ang.
Germany vs Denmark
Inelna thlengtu Germany leh team hmuhnawm Denmark te hi BVB Stadion Dortmund-ah an inkhel dawn a, zanlai dar 12:30-ah an inkhel tan ang.
Euro final vawi ruk khel a, vawi thum champion tawh Germany hian an tualzawlah bul an tan tha viau a, Scotland leh Hungary an hneh zawn a, last 16 lut chiang hmasa ber an ni. Lst 16 an luh chian hnuin Switzerland lakah tlawm an pumpelh hram thung a, point 7 hmuin last 16 an lut. Group match-ah hian goal goal riat an thun a, goal hnih chiah an chhuah.
Germany tana player pawimawh ber chu Toni Kroos a ni. Euro 2024 zawh ruala football chawlhsan zui mai tur Kroos hi Germany team khuang bengtu a ni. Game muang an mamawh hunah khuang a beng muang a, game rang an mamawh hunah khuang a beng rang leh mai a, tempo vawngtu pawimawh tak a ni. Julian Nagalesmann-a team hi an tha rual viau a, position tinah world class player chhawr tur an awm. Denmark lakah hian an defender pawimawh Jonathan Tah an chhawr thei dawn lova, hliam vangin Antonio Rudiger dinhmun a chiang lo mek bawk. Tlarhnunga inkawp fuh tak Tah leh Rudiger te an awm lo a nih chuan Denmark tan zuih var varna tham chanchin lawmawm a ni ang. Jamal Musiala leh Florian Wirtz te pawh inelna neih meka player hmuhnawm an ni.
Germany in awlsam taka last 16 an luh laiin Denmark kawng a harsa viau thung. An awmna Group C-ah hneh an nei lova, hneh loh pawh an nei chuang lo. Khel thum atangin point thum an hmu hram a, an Slovenia nen an point hmuh inzar mah se, yellow card hmu tlem zawk an nih an chhawr tangkai a, pahnihna hi chungin an tlang. Denmark hian group stage-ah goal hnih an thun a, goal hnih vek an chhuah. Player langsar filawr awm lo mah se team work nei tha tak, team anga khel thiam leh hmuhnawm an ni.
Head to head
Germany leh Denmark te hi inelna hrang hrangah vawi 28 an inhmachhawn tawh a, vawi 15 chak tawh Germany an chungnung. Denmark hian vawi 8 hnehna an chang tawh a, vawi nga an inhnehtawk tawk tawh bawk. Kum 2007 hnu lamah Denmark hi Germany lakah an la chak leh ta miah lo. Heti a nih vang hian Germany hmachhawn hi an tan hmachhawn chakawm a ni hauh lo ang.
Euro 2026 champion Portugal kha group stage-ah chak nei miah lovin last 16 an lut a, harsa taka chak chho hram hramin an champion zui ta hial a ni. Denmark hian Portugal hnungzuiin champion an tum ang.
England vs Slovakia
Team boruak nei lian tak, last 16 an luh thlenga beisei phak lo taka inlan lawi bawk si England hian khelh thum atangin point nga an hmu a, group champion niin last 16 an lut. Group Stage-ah team lian hmachhawn lo mah se goal thum chiah an thun a, goal hnih an chhuah. England hian position tinah player lar tak tak an nei a, an tha em em vek. Team angin an la khel tha tawk lova, manager Gareth Southgate-a’n a rem fuh loh vang pawh a ni mai thei tute mah chetha fal an la awm lo. Last 16-ah tha zawka inlan an tum ang.
Slovakia hi point li vek hmuhna group, Group E atangin an tlang a, pathumna ni chungin last 16 an lut. An group a langsar ber Belgium hnehin bul an tan a, Ukraine lakah an tlawm hnuin Romania nen an inhnehtawk zui leh. Khelh thum atangin goal thum an thun a, goal thum vek an chhuah. Player langsar fal han sawi ful chuk tur an awm lo naa team angin hmuhnawm takin an khel.
Head to head
Pathianni zan dar 9:30-ah Arena AufSchalke a intum tur England leh Slovakia te hi an la inhmachhawn tam lova, vawi ruk chiah an la inkhel. Slovakia hian England an la hneh ngai lova, vawi khat an draw ve hram tih loh chu vawi nga dang tlawm zawkah an tang tawh. Team boruak nei lian tak England hmachhawn hi Slovakia tan thil chakawm a ni dawn lo. Chutihlai chuah England hi last 16 a an hmachhawn tur duh thlan tir ta ila, Slovakia hi an thlan nalh a rinawm. Slovakia an hmachhawn dawn vangin quarter-final lut turah an inngai ang.
Spain vs Georgia:
Euro 2024 khelh meka team hmuhnawm ber chu Spain hi an ni a, group match ah chak vek a, point 9 hmu thei awmchhun an ni bawk. Luis de le Fuente team te hian khelh thum atangin goal 5 an thun a, team 24 zingah group stage a goal chhuah lo awmchhun an ni bawk. Player an nei tha rual hle a, an B team pawhin Albania an hneh thei. Rodri chu an game control tu pawimawh tak a ni.
Georgia hi Euro an khel hmasak berah last 16 lut nghal thei an ni a. Huai takin Spain an hmachhawn ang.