Euro 2024 – Ropuia ngamtu Spain

Football hmanga ram inelna ngaihhlut hlawh ber zinga mi Euro 2024 chu Pathianni zan khan Olympiastadion Berlin-ah khelh zawh a ni a, 2-1 England hnehtu Spain chu ropui takin an champion. Spain in Euro a champion ngun ber record thar an siam laiin England erawh an vanduai zui zel a, Euro-ah champion an tumna an la puitlin thei lo.
Final-ah hian Spain manager Luis de la Fuente leh England manager Gareth Southgate ten an that dan ang berin an player te an remthei a, hliam thar lam an nei lo. Spain manager De la Fuente chuan a formation hman than 4-3-3 formation a hmang nawn leh a. Semi-final-a inlan thei lo defender pahnih; Daniel Carvajal leh Robin le Normand te an kir a, England lakah tha zawkin an inlan thei. Three Lions manager Gareth Southgate pawhin Euro 2024 tawp dawn hnaih lama a formation hman thar 3-4-2-1 formation a hmang nawn leh a, Luke Shaw-a’n bul a tan tih loh chu inthlak thleng lian a awm lo.
Final ngaihven hlawh takah hian rin lawk ang ngeiin Spain in an khel tha a, an hmuhnawm leh viau bawk. Thiamna leh finna hmangin an khingpuite an hmachhawn a, tlang rin ang ngeiin ball chang tam zawk an ni tluan zak bawk. Final kal kawngah football ram ropui Croatia, Italy, Germany leh France te lo paltlang vek tawh an ni bawk a, inrintawkna sang tak nen England hmaah an inlan. Final an luh thleng hian goal 13 thunin goal thum chiah an chhuah a, hei hian goal thun thei tak an ni tih a lantir rualin, an tlarhnung a phui tha viau tih a tilang tel bawk. A vawi khat nan Euro-a champion tum England lakah goal an thun thei lawk lo thung.
Beisei anga khel tha vut lo chunga result tha nei thin, team tlo England in fimkhur takin Spain an hmachhawn a, pumraw lian zawk leh tharum nei tha zawk an nihna an chhawr tangkai a, hun rei tak goal an chhuah lo. Player lar leh tha tak tak, danglamna dawrhna thlen thei an neih tam vangin an khingpuite an rum thaih reng a, an nawr let a hlauhawm em em reng. Three Lions hian an khingpuite chak lohna lai an hrechiang hle a, ball kang an vawrh hnem. Ball kang an vawrh hnem chhawr tangkaiin goal an thun teuh thei hle nghe nghe.
Inkhel hmuhnawm takah chawlhlawk hmaa goal lut a awm theih loh hnuin chawlhlawk hnu lamah goal a lut ta thuai thung. Second half tan atanga minute hnihna lekah Spain hian fuh zetin an nawr tlang a, vei lam sira awm Nico Williams chuan si nghak Jordan Pickford dan rual lohin lei hrulah a pet goal a, minute 47-naah hmahruaina goal a thun. Game thunun zawk an nih bakah goal thun hmasa zawk an nih vangin Spain hian champion theihna hun tha leh zual an nei. Hmahruaina goal an thun hnu lawkah goal an thun belh zui teuh hle a, si nghak Pickford chetthat zarah goal chhuah belh em lovin an him.
Spain goal thun hian Three Lions a chhaih kawlh a tha zetin an khingpuite an nawr let. Hun tawp dawn hnaih lamah Gareth Southgate a chefuh nawn leh a, substitution fuh zetin a siam nawn leh. Bench atanga a luhtir Ollie Watkins leh Cole Palmer te hmuhnawm takin an inlan. Bench atanga lut Cole Palmer hian minute 73-naah mawi zetin a pet goal a, an si phurh a sut zui ta nghe nghe.
Goal khat ve ve an thun hnuin inkhel a hmuhnawm zual sauh a, goal thun tumin an innawr tawn nasa hle. Final boruak sang leh hun pawimawhah Spain an hmuhnawm zui viau a, goal thun theihna hun tha nei zawn mah se si nghak Pickford an paltlang mai thei lo. Extratime khelh a ngai ngei tura ngaih a nih hman laiin Spain an che fuh ta nge nge. Bench atanga lut Mikel Oyarzabal chuan minute 86-naah goal pawimawh zet a thun a, Spain in hma an hruai nawn leh.
Hnufual zawka an tan thar leh hnuin England in an si phurh sut ngei tumin thapui an thawh a, goal an thun teuh hle nghe nghe. An ball tauh hlauhawm tak chu si nghak Unai Simon-a’n a save hnuin an tauh nawn leh chu Dani Olmo chuan goal line atangin a tauhchhuak leh hlauh bawk a, Spain an him nawn. An him nawn hnu lawkah hun a tawp a, Spain chuan 2-1 a England hnehin ropui takin an champion zui ta a ni.
Champion thar Spain hi kum 1964, 2008 leh 2012 khan an lo champion tawh a, Euro-ah champion zawn thei hmasa ber an nih tawh bakah vawi li champion thei awmchhun an ni bawk. Spain champion tam record an siam lai hian England an vanduai zui zel thung a. Three Lions hi Euro hnuhnung pahnihah final lut zawn mah se vanduai zawkah an tang ve ve a, Euro-ah an champion thei lo zui zel.
Euro 2024 khelh zawh takah hian Spain midfielder ropui Rodri chu Best player ah thlan a ni a. Spain rawlthar hmuhnawm Lamine Yamal chu rawlthar tha berah thlan niin, France si nghak Mike Maignan chu si nghak tha berah thlan a ni ve thung.
Euro 2024 ah hian match 51 a awm a, match 51 atangin goal 117 a lut a, match tinah goal 2.29 lut zel ang a ni.