Euro 2024 semi-final Spain vs France

Euro 2024 khelh mek chu zanin hian semi final hmasa zawk khelh a ni dawn a, team lian pahnih; Spain leh France te an inhmachhawn dawn.
Spain kal kawng
Euro ah vawi thum champion tawh a, Euro a champion zawn thei hmasa ber ni bawk Spain hi Euro 2024 ah an khel tha hle a, team hmuhnawm ber an ni. Quarter-final ah inelna thlengtu Germany an hneh vangin champion turin rin an kai leh zual. Luis de la Fuente enkawl Spain hi mi mit fukna ber an ni. Team lian pahnih; Croatia leh Italy an hneh zawn hnuin Spain B team in Albania an hneh zui leh a. Georgia sawpa quarter-final an luh hnuin inelna thlengtu leh Euro a hnuhma nei tha ber Germany an dahtha zui leh bawk.
Euro ah vawi li champion thei hmasa ber ni thei dinhmuna ding mek Spain hi champion lai an hneh kumin an champion thei riau. An champion hmasak ber 1964 ah khan 1960 champion USSR chu final ah an hneh a, a vawi khat nan an champion. 2008 a an champion tum khan 2004 champion Greece chu group stage ah 2-1 in an hneh a, an champion zui leh. An champion vawithumna kum 2012 ah kha chuan an mahni hi champion lai an ni thung. Euro 2024 ah hian Spain hian champion lai Italy an hneh tawh a, an champion kum a nih hmel riau.
Spain hian World Cup leh Euro ah a thlengtu ram hneh an harsat thin a. Quarter final ah a thlengtu an hmachhawn apiangin tlawm zawkah an tang zel thin. Euro 2024 ah erawh an mutan an khengthla a, inelna thlengtu Germany hnehin semi-final an lut. Champion lai Italy an hneh bakah a thlengtu ram Germany an hneh bawk vangin Spain inrintawkna in par a chhuang mek. Player an nei tha rual em em a, team angin an thawk ho tha bawk si a, champion phuin an inlan mek.
Germany an hneh tum khan Spain player pawimawh Pedri chuan hliam a tuar a, Luis de le Fuente player pawimawh hi Euro 2024 ah a inlan thei tawh dawn lo. Pedri awm lo hi Spain tan chuan channa lian tak a tling dawn. Pedri hmunruak hi Dani Olmo an a luah tura rin a ni a. Ani hi Germany an hneh theih nana thawhhlawk em em a kha a ni.
Pedri an chhawr thei dawn loh bakah hian an defender rinrawl Dani Carvajal chu Germany lakah Red Card a hmuh vangin chhawr theih a ni dawn lo bawk a. Centre back Robin Le Nordman pawh yellow card a hmuh zawn vangin chhawr theih a ni dawn lo bawk. An aiah hian Nacho leh Navas te an lut tura ngaih a ni. De la Fuente hian 4-3-3 formation a hmang leh tura ngaih a ni.
Spain tan inelna neih meka khel tha tak Nico Williams leh Lamine Yamal te an hmuhnawm leh ngei dawn. Euro khel thei naupang ber Yamal hian inelna neih mekah assist vawi thum ngawt a nei tawh a, Germany lakah a khel tha tak zet a nih kha. Rawlthar hmuhnawm pahnih Williams leh Yamal te hi defensive midfielder tha bera ngaih ni mek Rodri an a ho dawn a. Spain game tempo vawngtu pawimawh tak Rodri hi a hmuhnawm piahah a pawimawh leh ngei dawn. France hian ar ven taka Rodri vengtu tur an dah lo a nih ngat chuan muallaiah harsatna tawkin, hna hautak leh khirh tak an thawh a ngai ngei ang.
Beisei phak lo chunga thleng sang France
World Cup hnuhnung pahniha final khel ve ve France hian Euro 2024 ah beisei an phak lo va, beisei phak lo chungin semi-final hial an thleng tawh tho thung. Khel tha tia sawi hluai tur ni lo chungin an tlang hram hram zel a, Spain an paltlang leh thei hram a nih chuan an champion kum a nih hial a rinawm tawh ang.
Player hrawl tak tak kawl khawmtu France hian own goal hmangin Austria an hneh hram a, Netherlands lakah vanneihthlak taka tlawm an pumpelh hram hnuin Poland an inhnehtawkpui leh ringawt bawk. Last 16 ah Belgium an hneh hram a, quarter final penalty shoot out ah Portugal hnehin semi-final an lut. Semi final an luh thleng hian goal thum chauh an la thun a. Heng goal thum an thunte pawh hi own goal pahnih leh penalty atanga Kylian Mbappe thun a ni.
Manager tawnhriat nghah Didier Deschamps in an thatpui ber tur formation a la hmuchhuak rih lova, a la thlakthleng kual zak zak. Quarter-final ah Portugal an hmachhawn tum khan 4-3-1-2 formation a hmang a, inelna neih mekah an khelh that ber tum a ni hial mai thei. Portugal an hmachhawn tuma player a rem danin a rem nawn leh mai thei a. Adrien Rabiot a chhawr thei dawn lova, a aiah Eduar Camavinga a luh a rinawm. Camavinga bak hi chu player thlak danglam a awm kher lo mai thei.
France buaina chu an tlarhma player ten goal an thun thei tlat lo mai hi a ni. Goal thunna hun tha nei bawk thin mah se an inthelhsiak a ni ber mai. Beisei phak lo bawk mah se Kylian Mbappe leh N’Golo Kante an nei miau mai a, tu tan mah zuam ngawt chi an ni lo thung.
Head to head
Spain leh France te hi inelna hrang hrangah vawi 36 an inhmachhawn tawh a, an inthlau tam lo hle. Chak hnem zawk Spain in vawi 16 hnehna an chang a. France hian vawi 13 hnehna chang tawhin vawi sarih dang an inhnehtawk. An intum hnuhnung ber chu 2021 Uefa Nations League final ah a ni a, France hian 2-1 a hnehna changin a vawi khat nan Nations League ah an champion.
Team lian pahnih Spain leh France te hi zanlai dar 12:30 ah an inkhel tan dawn a. Football ngainatute tan hmaih phal chi a ni lo ang.