Euro 2024 thlir zauna – Group A

Football a inelna ngaihhlut hlawh zual zinga mi European competition – Euro 2024 chu Zirtawp zanah khelh tan a ni dawn a. Football khawmpui lian thleng turin Germany a inpeih viau tawh a. Inelna hmachhawn turin ram hrang hrangte pawhin German an thleng tan tawh bawk. Group hrang hrang dinhmun kan thlir kual thin ang a, Group A atangin bul kan tan an ang.
Group A-ah hian inelna thlengtu Germany bakah Scotland, Hungary leh Switzerland te an awm. Group A-ah hian Germany an lian fal a, Switzerland, Scotland leh Hungary te hi an inel tawk hlawm viauin a rinawm. Group A a team pali zingah Germany hi FIFA ranking-a sang ber an ni a, No. 16-naah an awm mek. 19-naah Switzerland an awm a, 26-naah Hungary awmin, 39-naah Scotland an awm ve thung.
Germany
Football ram ropui Germany hian Euro-ah hnuhma an nei tha viau. Final vawi ruk an lut tawh a, vawi thum an champion a, Spain nen Euro a champion tam ber an ni dun mek. Kum 1972 atangin Euro an hmachhawn tan a, heta chin hi inelnaah an tel zawn ta zat zat a, Euro-ah a zawna vawi 14 inlan thei awmchhun an ni. Euro-ah hnuhma nei tha tak an ni a, an rama inelna hmachhawn tur an nih bawk vangin champion turin rin an kai hle. Tuna inelna an thlen tur hi Germany lei lungin Euro a thlen vawi thumna tur a ni a. Vawi thum champion tawh bawk mah se an ramah an la champion lo teh tlat thung.
Germany hian player tha leh tawnhriat ngah tak tak an kawl khawm a, an squad a chhah tha tawk hle. Manager Jullian Nagelsmanm hian 4-2-3-1 formantion a hmang leh tura ngaih a ni. Nagelsmann si nghak tawnhriat ngah Manuel Nuer chu a si nghak duhthlan a nih thu a sawi a, thlak kual a tum lem lo. Si nghak dang tha tak tak Ter Stegen leh Oliver Baumann te awm bawk mah se Nuer bawk a chhawr leh ngei dawn niin a lang.
Nagelsmann hian tlarhnung laiah Real Madrid defender Antonio Rudiger leh Bayern Leverkusen defender rinrawl Jonathan Tah te a inkawptir in a rinawm. Rudiger thatzia sawi tam ngai lo. A kawp pui tur Tah hi a khelh that vang lai a ni a, season liam taah khan ‘Bundesliga team of the season’ leh ‘Europa League team of the season’-ah a tel ve ve a. Bundeliga leh German Cup-a an champion bakah Europa League final a khel bawk a, tun hi a inrintawk vanglai a ni ngei ang. Ding lam sirah tawnhriat ngah, khawvelin defender tha tia a hriat Joshua Kimmich a ding dawn bawk.
Kimmich hian Germany tan vawi 86 khelin goal 6 a thun tawh a, Germany nation player of the year-ah vawi hnih (2017 leh 2021) ah thlan a lo ni tawh a. UCL defender of the year, 2019-20-ah thlan a nih tawh bakah Bundesliga team of the season-ah vawi nga ngawt a tel tawh bawk. Vei lam sirah RB Leipzig defender David Raum a din a rinawm bawk a, Germany hi defender nei tha ber an nih hial a rinawm.
Defender tha tak hmaah hian midfielder ropui Toni Kroos a ding ang a, Troos leh Robert Andrich an inkawp tura ngaih a ni a. Kroos te hmaah hian Ilkaay Gundogan, rawlthar duhawm Jamal Musiala leh Florian Wirtz te an inrem a rinawm a. Arsenal a vul thar leh Kai Havertz leh Niclas Füllkrug ten hmun an inchuhna viau tura ngaih a ni bawk. Bench a thu tur pawh an nei tha hle.
Germany hian 2024 ah tlawm an la nei lova, France, Netherlands leh Greece te an hneh a, Ukraine nen goal awm lovin an inhnehtawk thung. Euro 2024-ah champion tura rinkai zinga mi France leh Netherlands te tunhnaia an hneh hian champion thei an nihzia an titlang chiang hle.
Scotland
Group A-ah ranking a hniam ber Scotland hian player an nei chhe hran lo. Manchester United midfielder Scot McTominay chu an player pawimawh a ni ang. Scotland hian Euro ah hnuhma an nei tha lo viau a, Group Stages an la paltlang miah lo. Euro 2021 (2020)-ah khan hneh an nei lo. Hun rei tak hnuah a zawna Euro an khelh lehna tur a ni naa thleng sang turin beisei san an har.
Scotland manager Steve Clarke hian May, 2019 atangin Sotland hi a enkawl tan a. Inkhel vawi 57 kaihruai tawhin, vawi 27 a chakpui a. Hnehna an chan zat hi 45.45 % a ni a, a chhe hran lo.
Hungary
Hungary hian Euro hi vawi li an lo hmachhawn tawh a, tun hi an vawi nga hmachhawn na tur a ni. Kum 1964 khan semi-final an lut nawlh a, semi-final-ah Spain an hneh lo. Hetihlai hian pathumna an la zawng thin a, Denmark hnehin Hungary hi pathumna an ni. Hei hi Euro-a an thlen san ber tum a ni a, hemi hnu hian hnuhma ropui an nei zui tawh lo. Euro 2020 ah khan Group F mawngphah an ni. Group B-ah hian Scotland nen an inel tawk viau tura ngaih a ni.
Switzerland
Germany tih lohah chuan Switzerland hi Group A-a player nei tha ber an nih a rinawm. Manchester City defender Manuel Akanji a awm a, Bayer Leverkusen a vul thar leh tak Granit Xhaka bakah player hriat hlawh tak tak an awm nual. An si nghak Yan Sommer ngawt pawh hi inrintawkpui tham a ni.
Group A-ah hian inelna thlengtu Germany hi Group champion an nih a rinawm a, pahnihna niin Switzerland an tlang a rinawm a. Scotland in Hungary lakah point thum an hmuh a rinawm a, Hungary hi table mawngphah an nih a rinawm.