Euro 2024 thlir zauna – Group B

Group stage-ah chuan Group B hi group ngaihven hlawh ber tur an ni a, champion tura rinkai Italy, Spain leh Croatia te an awm tlan vangin ‘Group of death’ an ni. FIFA ranking-ah top 10 luah phak thiau; Spain (8), Itlay (9) leh Croatia (10) te karah Fifa ranking a 66-naa awl Albania an awm ve nawlh a, point box an nih dawn vangin Albania hi an rethei hle dawn. Albania laka goal thun hnem apiangin group champion nih theihna hun tha an nei tura ngaih a ni. Group B hi ‘group of death’ tih ni bawk mah se ram lian pathumte hi last 16 lut rual thuau thei dinhmunah an din ve tho vangin ‘Group of life’ an ni a tih theih tho bawk.
Italy
Football thiam ram, Mizoram atang pawha tantu ngah em em reng Italy hi Euro-ah hian champion lai an ni a, champion leh tura rinkai ber zinga mi an ni bawk. Italy hi Euro-ah vawi hnih an champion tawh a, World Cup-ah vawi li ngawt an champion tawh bawk. Goal ven thiam ram an ni a, player tha tak tak an neih vangin an goal nawr pawh a hlauhawm viau thin bawk. Football ram ropui an ni bawka engtik lai mahin player an nei chhe tak tak ngai lo. Euro 2024-ah an champion leh nawlh a nih pawhin thil mak a ni hauh lo ang.
Italy manager hi Luciano Spalletti a ni a, an captain chu Nicolò Barella a ni. Italy hian inkhel an hmachhawn hnuhnung vawi 12-ah vawi sarih hnehna an chang a, draw vawi thum neiin, tlawm zawkah vawi hnih an tang ve bawk.
Spain
Spain hian player an nei chhe tak tak ngai lova, Euro 2024 ah pawh hian champion tura rinkai zinga mi niin, inkhel hmuhnawm chhawpchhuak thei tura ngaih an ni. Manager Luis de la Fluente hi khingpuite nawr nuam ti mi a ni a, 4-3-3 formantion a hmang uar viau thin. Goal an chhuah ve fo vangin tlarhnung phui zawk an neih theih nan 4-2-3-1 formation a hmang uar thar a. An khingpuite a zirin formation hi a thlak kual tura ngaih a ni. Spain player zingah rawlthar Lamine Yamal chu mi hmuh chak, player ngaihven hlawh a ni ang.
Spain hian Euro-ah hnuhma an nei tha viau a, vawi thum champion tawhin, Germany nen champion tam ber an ni dun mek. Euro-ah champion tam ber an nih bakah Euro-ah champion zawn thei awmchhun an ni bawk. Player tha tak tak kawl khawmtu an ni miau mai a, an champion a nih pawhin a awm ve renga ngaih a ni ang.
La Roja hi an khelh hnuhnung vawi 12-ah vawi khat chauh an tlawm a, vawi 10 chakin, draw vawi khat an nei bawk.
Croatia
Zlatko Dalic enkawl Croatia hi tha vul chuk leh champion tura rinkai langsar vut ni lem lo mah se an tlo nek zel a, World Cup-ah meuh pawh team tlo pawl tak an ni thei zel. Croatia hi World Cup 22-ah khan pathumna an ni hial a, Euro 2020-ah last 16 paltlang zo lo mah se team tha pawl an la ni reng. Croatia player te hi an huaisen a, ram tan an inpekna a thuk em em a, team boruak a tha viau thin bawk. Midfielder ropui Luka Modric ho khawmna hnuaiah fiahna hautak an hmachhawn dawn a ni a, knock out round luh ngei tumin tan an khawh ang.
Croatia hi inkhel an hmachhawn hnuhnung vawi 12-ah vawi kua an chak a, tlawm zawkah vawi thum an tang. An khingpui tur Spain leh Italy te deh an khirh viau dawn a, team lian lakah point hlawhchhuah hram tumin tan an khawh ang a. Italy emaw, Spain emaw zawk zawk an hneh thei a nih chuan pahnihna ni chungin last 16 an luh theih a rinawm.
Albania
Albania hi Fifa ranking-ah 66-na daih an ni a, Group B-ah Fifa ranking a top 10 luah phak pathum ngawt an awmpui si a, an rethei dawn ngar ngar khawp mai. Croatia, Italy leh Spain te an ineltawk hlawm viau tura ngaih a ni a. Albania laka goal thun hnem hnemin goal difference hmangin dinhmun tha an luah thei dawn a, Albania lakah hian goal thun teuh an tum vek dawn. Group B-a an awmpui team liam pathumte zinga pakhat lekah pawh hian tlawm an pumpelh thei a nih chuan Albania tan hian result tha a ni ang.
Fifa ranking ah 66-naah daih ni mah se Albania hi inkhel an hmachhawn hnuhnung vawi 12-ah vawi sarih lai an chak a, draw vawi hnih neiin, tlawm zawkah vawi hnih chauh an tang. Result an neih chhiat lem loh vangin inrintawkna leh phurna sang tak nen inelna lian an hmachhawn ang. Team lian pathum an awmpui a, an khingpuiten pressure na tak an neih laiin an ni erawh chuan pressure an nei ve dawn lem lo. An tlawm pawhin awm renga ngaih a ni dawn a, an draw in result tha a ni a, an chak phei chuan inlehthalna lian a ni dawn bawk si a.. Albania hian hahdam takin Euro 2024 an hmachhawn ang.
Rinlawkna
Euro 2024-ah hian Group tina pakhatna leh pahnihna in last 16 an lut dawn a. Group hrang hranga pathumna zinga titha zual paliin last 16 an lut zui ve leh dawn bawk. Group B atang hian team thumin last 16 an luh theih a rinawm.
Euro a vawi 3 champion tawh Spain (Group winner) leh Italy (runners-up) ten last 16 an lut ang a. Pathumna Croatia in goal diference hmangin last 16 an luh zui ve leh a rinawm.