Euro kan lo thleng ta reng mai! (Euro chanchin bihchianna) – Jipson S. Hrangate, AFC referee

Euro kan lo thleng ta reng mai!
(Euro chanchin bihchianna)
Khawvela football tour- nament ropui em em, thenkhatte phei chuan World Cup Football ai maha an ngaihsan leh hmuhnawm an tih zawk EURO, Europe khawmualpui (continent) chhunga ramte football intihsiakna ropuiber EURO 2024 chu June ni 14, 2024, Zirtawpni, zanin zanlai pelh dar 12:30 hian Germany ram Munich khawpuia stadium ropui tak mai Allianz Arena, mipui 78,000 zet mai thut theihna hmunah ropui taka tan a lo ni dawn ta.
Opening ceremony hi ennawm mawi tak tak chi hrang hrangin a zui ang a, UEFA president Alexander Cerefin leh official zahawm tak takte’n puithu takin an tawiawm bawk ang.
EURO theme song ‘Major Tom’ chu German popstar Peter Schilling-a’n a sa dawn a; official song ‘Fire’ chu Meduza, One Republic leh Leony-te’n an sa ve thung ang.
EURO official ball chu Adidas company-in a siam ‘Fussballlibe’ a ni a, chu chu ‘Love of Football’ tihna a ni. Tin EURO official mascot chu ‘Albart the Bear’ an tihin EURO trophy a dawm lai lim a ni bawk. EURO 2024 tournament-a match hmasaber inkhel turte chu a thlentu Germany leh Scotland an ni ang.
Tun tum EURO ‘24 chu kum dang anga ram pahnih/pathumin an thlen (host) kawp deuh nual leh khawpui chi hrang hranga play kual vel kha ni tawh lovin Germany ram hian an pumhmawm tawp mai dawn a ni.
Match-te hi Germany khawpui hrang hrang – Munich, Berlin, Stuttgart, Hamburg, Gelsenkirchen, Dortmund, Frankfurt, Leipzig, Cologne leh Dusseldorf-ahte hian khelh an ni ang.
Final match chu Berlin khawpuia Olympic Stadium ropui tak mai, mipui 70,000 zet mai thut theihna hmunah July ni 14, 2024 khian khelh a ni ve thung ang. Tu team (countries)-te’n nge final match hi khel ang tih ilo inrinsiak (bet) ang u aw!!
EURO ‘24 thlengtu Germany hi ram hausa leh changkang tak mai a ni a, EURO hi 1988 kum khan a lo thleng tawh a, tun tum hi a vawihnih thlenna tur a ni. Tin, World Cup football pawh hi kum 1974 leh 2006 khan vawihnih ngawt a lo thleng tawh bawk. Kum 1974 khan world Champion an ni nghe nghe.
Olympics Games ropui tak mai pawh vawithum lai thlengtu a ni dawn vei nen, 1916 kum khan Khawvel Indopui Pakhatna (World War I)in a thlenchilh tak a vangin Olympics Berlin 1916 chu thulh (cancelled) a lo ni ta… Germany hi World War I laia inhnamhnawih nasaber (a changtupa) a la han ni leh nghal!
Olympics 1936 hi World War II a thlen dawn tep khan Berlin khawpuiah nghah a ni a, Olympics 1972 pawh Berlin khawpui bawkin thleng lehin, hemi tum hian buaina nasa tak mai khawvelin a theihnghilh tawh loh tur chu a thleng tlat mai!
Israel Olympic Team-te chu Palestinian terrorist-hoin an rawn bei thut mai a, player 11 zet mai an that leh nghal! Hemi boruak chhia avang hian 1974 Word Cup Football Germany a neih pawh chu venhimna (security) thuah sarih vel zeta tihkhauh a nih phah nghe nghe.
EURO ‘24 thlengtu Germany hi khawvela football pet thiamber ramte zinga mi a ni a; EURO bikah hian vawithum lai a lo champion tawh a, a champion kumte chu 1976, 1980, 1996 a ni.
World Cup football-ah pawh vawili lai (1954, 1974, 1990, 2014) an lo champion tawh bawk. Kum 1972-1974 chhung phei kha chuan khawvela football tactics sangber ‘Total Football’ title an hmu nghe nghe.
Aw le, he lam chu duhtawk rih ila, kan thupui pakhat ‘EURO chanchin’ lamah lut tawh mai ila:-
EURO chanchin
EURO chanchin sawi tur chuan World Cup Football lamah tlem-a-zawng hawikir a ngai thin, a chhan pawh World Cup hmuchhuaktu/dintu zinga FIFA general secretary hlui Henri Delaunay ngei mai kha EURO rawn dintu bawk a nih tlat vang a ni.
World Cup Football dintu FIFA president hlui Jules Rimet leh Delaunay (French mi ve ve)-te’n kum 1920-1928 chhung zawnga World Cup Football din tuma hma nasa taka an lak reng lai khan an rilru chhungril taka an lo tumruk ran chu an ram ngeia World Cup hmasaber nghah ni mah se la November ni 18, 1928-a FIFA executive committee final meeting chuan World Cup hmasaber neihna hmun turin France chu an thlang ta lo tlat!
Henri Delaunay chu lunghnur takin a awm a, a aihnahphahpui Jules Rimet lah chuan World Cup Football lam a tinzawn a lo tul tak avangin a thianpa lunghnurna chu a tawmpui hman tawh bik si lo!
Henri Delaunay chuan World Cup ang tluk thoa football tournament ropui tak mai France ram ngeia bul intan tur chu buaipuiin hma a rawn la tan ta a, a chipuite’n nasa takin an tawiawm nghal a; Henri hi chutih lai chuan French Football Federation-a general secretary a ni bawk.
Europe ramte tlawhkualin continent pum huapa football tournament neih a nih theihna’n nasa takin a campaign a, mahse, vanduaithlaktakin, Indopui II-na khan a rawn nanchin leh tak hlauh avangin hma lak mumal theih a ni leh ta lo.
World War II zawh veleh kum 1948 vel atang khan hma a la tan leh chat a; kum 1954 khan Union of European Football Association (UEFA) chu din a ni a, Henri Delaunay chu general secretary hmasaber niin, UEFA chuan Europe khawmualpui chhunga ram hrang hrangte football-a inelna ropuiber chu France ram ngeia nghah turin a rel ta nghal a, nimahsela, vanduaithlaktakin, Delaunay chuan kum 1955 khan fam a chang ta hlauh mai a, a mangphan ram a dai hman ta lo!
A ram mi French mipuite leh UEFA member-te chuan an ui em em a, kum 1958-1959 khan amah hriatrengna turin European Nations Cup (Sir Henri Delaunay Trophy) tih hming pu Europe continent huapa football tournament ropui tak mai huaihawt turin hma an la tan a, kum 1960 khan UEFA huaihawtin Henri Delaunay duhthusam ngei mai chu tihpuitlinin a awm ta a, a ram (France) ngei chuan ropui takin EURO hmasaber a thleng a, vawiin thleng hian World Cup ang thoin kum li dan zela khelh zui a lo ni ta zel a ni.
Kum 1968 atang khan European Championship tih hming a rawn pu tan a, kum 1976 vel bawr atang khan Europen Soccer Championship tia koh a lo ni leh a, kum 1996 atanga vawiin thleng hian EURO tia mawi taka laktawi a lo ni ta ni.
EURO hi khawvel football fans tam takte chuan World Cup ai mah hian an ngaisang zawk emaw tih tur a ni a, a chhan chu EURO-ah hian European football tactics (style)-te hi a sang thei ang ber (zenith) hman a nih thin avangin zirtur a tam hle. European tactics hmang Europe ramte hian World Cup hi vawi 12 lai an lo la (win) tawh a ni.
Tin, Europe ramte hi hausa tak tak an nih hlawm avangin facilities an nei tha a, – stadium, technical arrangement leh a dangte chu a tha leh mawi thei ang bera cheibawl a nih thin a vangin thlirtu khawvel mipui mit a tlai thei hle.
Tun tuma EURO hi ram (team) 24-in an khelh vawithumna tur a lo ni ta a, a hma kha chuan team 16 te, 14 leh team riat chauhte’n an lo khel thin a ni.
EURO tihmelhemtu Covid-19
EURO hi World Cup ang thoa kum li dan zel a khelh a ni thin a, mahse, China ho suahsual ninhlei vanga khawvel mihring maktaduai tel suatna hripui hlauhawm Covid-19 vang khan EURO 2020 chu 2021-ah neih/sawnhlat a rawn ni ta daih mai a, kha vang khan kum li dana nghah tihin EURO chu a rawn kum nga ta dawrh mai a; chutiang deuh chuan tun tum EURO 2024 hi kum thumnaa neih a lo tul phah ta a ni!
China-ho suahsual vangin a kum diktaka kan nei thei ta lo kha a pawi khawp mai a, EURO timing a tihmelhem zo vek!
Euro 2024 match-te hi keini lamah chuan Sony Sports Network live telecast kaltlangin a en theih dawn a, live stream pawh Sony Liv lamah a duh leh remchang zawk tan ngaihven theih a ni ang.