Europe a inlan tur Aston Villa

EPL table-ah pasarihnaa awm mek Aston Villa chuan Villa Park-a an mikhual Brighton & Hove Albion chu 2-1 in an hneh a, kum 13 hnuah European Competition khel turin an tling. Villa hian Europa Conference League an khel ang.
Pasarihna ni chunga season khar tura chak mamawh Aston Villa hian Europa League khel tur Brighton lakah bul an tan tha a, goal an thun thuai. Inkhel tan atanga minute 8-na lekah Douglas Luiz chuan Jacob Ramsey siamsak chu lei hrulah fuh zetin a pet goal a, hmahruaina goal a thun. An mualah goal an thun thuai vangin inrintawkna sang zawk nen Villa an inlan chhunzawm a, darkar chanve an khelh tlin hmain goal dang an thun belh leh hman.
An mualah phur tana inlan Villa hian fuh takin an khingpuite an nawr tlang a. Ollie Watkins chuan Jacob Ramsey siamsak tha tak chu minute 26-naah awlsam takin a pet goal a, an goal hnihnaa thun. Hma takah goal hnih an thun vangin Villa in European competition an hnaih leh zual. Season kal meka team tlo, Europa League hmachhawn tur Brighton hi goal hnih an chhuah zawn vangin an hnual ngawt lova minute 38-naah Deniz Undav chuan goal thunin an si phurh a sut then. Chawlhlawk hmain goal thum ngawt lut hman mah se, chawlhlawk hnu lamah goal dang a luh belh thei lova, an mualah 2-1 a chak Aston Villa chu Europa Conference League khel turin an tling ta a ni.
City an tlawm
EPL 2022-23 khar zanah champion chiang tawh Manchester City chu Brentford lakah an tlawm. Pakuanaa awm mek Brentford tan hian Ethan Pinnock chuan hun tawp dawn tep munute 85-naah he inkhela goal awmchhun hi a thun a, an mualah hnehna lian an sualchhuak. Brentford lakah tlawm mah se Manchester City hi pahnihna Arsenal aia point ngaa sang zawk chungin season an khar tho thung.
Arsenal an cham nuamsa
Uiawm taka champion zo lo Arsenal chuan Emirates Stadium-ah Wolves an mikhual a, pahnihna ni chiang tawh Gunners hian si nga fai ngawtin hnehna an chang.
Hun pawimawh laia che fuh thei lo Arsenal hi inkhel awmze nei thui tawh lo a Wolves an hmachhawn tumin an chetha viau a, goal nga ngawt an thun. Wolves an sawp tum hian Arsenal chhuahsan tura ngaih Granit Xhaka chuan goal hnih a thun a, hnuhma tha tak nen a hun tawp a khar.
Arsenal hian an mikhual Wolves lakah bul an tan tha viau a, minute 11-na lekah Granit Xhaka chuan Gabriel Jesus siamsak chu near post-ah awlsam takin a tauh goal a, hmahruaina goal a thun. Byer Leverkusen pan tura ngaih Xhaka hian hmahruaina goal a thun atanga minute thum hnu lekah mawi takin a pet kual lut leh a, minute 14-naah an goal hnihna a thun zui leh nghal. Xhaka-a’n goal hnih a thun hnu hian Bukayo Saka chuan minute 27-naah Trossard siamsak atangin an goal thumna a thun a, si thum faia hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, tum hnih ngawt laipui a puak nawn leh. Minute 58-naah Gabriel Jesus chuan Tossard siamsak atangin an goal lina a thun a. Minute 78-naah Jakub Kiwior chuan Smith Rowe siamsak atangin an goal ngana a thun zui leh a, an mualah si nga fai an chak zui ta a ni.
Champion theihna hun tha an neih chhawr tangkai zo lovin, Arsenal hi champion zo lo mah se pahnihna ni chungin season an khar a. Season hnih chhung Champions League an khelh phak loh hnuah EPL-a pahnihna an ni leh ta hi an tan chanchin lawmawm, hmasawnna lawmawm tak a ni tho thung.
United in Fulham an lehthal
Pathumna ni chunga season khar ngei tum Manchester United chuan Old Trafford-a an mikhual Fulham lakah goal an chhuah hmasa a. United hian chawlhlawk hmain hmahruai let thei lo mah se, chawlhlawk hnu lama Fernandes goal thun hmangin Fulham an lehthal. An muala hnehna chang United hian pathumna ni chungin season an khar.
Old Trafford-a lenglut Fulham hian bul an tan tha viau a, minute 19-na lekah Kenny Tete chuan hmahruaina goal a thun. Minute 19-na leka goal an chhuah hi Jadon Sancho chuan minute 39-naah a sut a. Minute 55-naah Bruno Fernandes chuan hma an hruai letna goal a thun a, an mualah 2-1 in an chak zui ta a ni. An mikhual Fulham an lehthal vangin United hian pathumna an luah nghet a. Inkhel dangah Newcastle United leh Chelsea te an inhnehtawk vangin United hian pathumna an luah nghet leh zual.
Liverpool an chak zo lo
Pathianni zana inkhel dangah Liverpool chuan tlahniam chiang tawh Southampton an hmachhawn a. St Marry’s a lenglut Liverpool hian goal li ngawt an chhuah a, tlahniam chiang tawh lakah hnehna an chang thei bik lo.
St Marry’s a lenglut Liverpool hian bul an tan tha viau a, minute 14 chhungin goal hnih an thun hman. Minute 10-naah Diogo Jota chuan hmahruaina goal a thun a. Anfield chhuahsan tur Roberto Firmino chuan minute 14-naah an goal hnihna a thun zui ve leh zat. Hma taka goal hnih an thun zawn vangin Reds hi awlsam taka chak thei tura ngaih an ni hman naa goal li ngawt an chhuah vangin an chak zo bik lo.
Championship a tlahniam tur Southampton hian tlawm chunga EPL chhuahsan an tum bik lo va, huaisen takin an mikhual team lian an nawr let. Minute 19-naah club lian pan ngei tura ngaih James Ward-Prowse chuan goal thunin an si phurh a sut then a. Minute 28-naah Kamaldeen Sulemana chuan goal thunin an si phurh a sut zo va, 2-2 a inhnehtawk chungin chawlhlawk an hmang.
Chawlhlawk hnu lamah Saints an khel tha chhunzawm a, goal hnih an thun zawn. Minute 48-naah Sulemana chuan hma an hruai letna goal a thun a. Minute 64-naah Adam Armstrong chuan an hmahruaina tizauin an goal lina a thun belh zui leh nghal.
Si hnih ngawta an hnufual hnuin Liverpool in tan an khawh thar leh a, goal hnih an thun belh ve leh. Minute 72-naah Cody Gakpo chuan goal thunin an si phurh a sut then. Gakpo goal thun atanga minute khat hnu lekah Diogo Jota chuan an goal lina a thun zui leh nghal mai a, an si phurh a sut zo. Hun tawp thlengin goal dang a luh belh tawh lova, championship khel tur Southampton leh pangana Liverpool chu 4-4 in an inhnehtawk zui ta a ni.