Europe ramten Ukraine indo tihtawpna tura indawrnaah Kyiv a tel ngei an phut

Ukraine thlawptu European-te chuan an thlawpzia tilang thar lehin Russia nena inremna atana inbiaknaah Kyiv chu a tel ngei tur a ni tih an sawi.
Zirtawpnia Alaska-a Donald Trump-a leh Russian President Vladimir Putin-a inbiak tuma ruahmanna a awm lai mekin hei hi an puang.
“Ukraine-a remna kawng zawhnaah hian Ukraine tel lovin thu tihtluk theih a ni lo,” tiin UK, France, Italy, Germany, Poland, Finland leh European Commission hruaituten thuchhuah intawm ansiam.
Inremna a awm theih nana inbiakna turah Ukraine sawm loh a nih chuan President Volodymyr Zelensky-a chuan eng inremna pawh lo awm se ‘thutlukna thi’ a nih tur thu a sawi.
Inrinni zan khan White House hotu chuan Trump-a’n Putin leh Zelensky tela pathuma inbiak a rawt a; mahse, Russian hruaitu duh dan angin an pahnih chauhvin an ni rih dawn.
Trump-a hian a hmain inremna chu Putin-a nena an inbiak atanga tan a ngaih thu a lo sawi tawh thin a, US president hian Putin-a leh Zelensky-a tela trilateral meeting neih pawh a tul thu thuthar lakhawmtute hmaah a sawi.
Putin-a hian hei hi a pawm dawn em hriat a ni lo va, a hma chuan hmaichhana inbiak hi a hnar zel a, kum thum chuang liam taa thapuiua Ukraine a rûn atangin Zelensky-a nen hian an la inhmu lo.
Zirtawpni khan Trump-a hian Moscow leh Kyiv inrem theih nan ‘ram bung eng emaw zat inthleng a ni dawn’ tih a sawi a, hei hi Zelensky-a chuan a duh lo hle bawk.
“Russia hi engmah kan pe dawn lo,” tiin Telegram-ah a tar lang a. “Kan duh loh dana thutlukna emaw, Ukraine tel lova thutlukna siam emaw chu muanna dodalna a ni,” a ti.
“Russian-te hian Ukrainian ram hmanga Ukrainian ram vek ‘thleng’ a la tum reng a, he duhthlanna hi an la kalpui zel a nih chuan Russian hian indona an la duh a ni mai,” a ti.
CBS chuan White House-in Europe-a a thawhpui ramte chu Russia-in Ukraine khawchhaka Donbas region pum leh Crimean Peninsula an la chan zui theih nana hmin tumin a bei niin an tar lang bawk.
European hruaituten Inrinni zana thuchhuah an siamah erawh ‘ramri chu tihluhnaa sawn a ni dawn lo’ tih an tar lang thung.
“Ukraine hian an duh anga thutlukna siam turin zalenna an nei a ni,” an ti a, Ukraine chu palai, sipai leh suma an thlawp zel tur thu an sawi bawk.
Trump-a leh Putin-a hi Russia-in kum 1867-a US hnena a hralh, Alaska-ah an inbe dawn a, hei hi June, 2021-a Geneva-a Joe Biden-a’n Putin-a a biak hnua US leh Russian president tang lai an inbiak lehna hmasa ber tur a ni.