European-ten Trump-a’n a chuh mek Greenland-ah sipai tir

European-ten Trump-a’n a chuh mek Greenland-ah sipai tir
European ram dangte pawhin sipai tlem an dah angin French sipai tlem azawng pawhin Greenland khawpui, Nuuk an lut tih thuneituten an sawi.
US President Donald Trump-a’n Arctic thliarkar, Denmark hnuaia mahnia inawpna hran nei hi neih tuma hma a lak mek laiin Germany, Sweden, Norway, Finland, Netherlands leh UK te hian sipai tlem theuh an dah lut a ni.
French President Emmanuel Macron-a chuan ‘khawmual, boruak leh tuipui sipai’ dangte pawh dah belh an ni thuai dawn tih a sawi.
Palai hlun tak, Olivier Poivre d’Arvor-a chuan he thil hi politic-a hma an lakna lantirna a nih thu sawiin, “Tih hmasak berna a ni a… US hnenah Nato a awm tih lantirna a ni,” a ti.
Poivre d’Arvor-a hian French sipaite hi 15 an ni tih a sawi a, Denmark leh Greenland foreign minister-ten Washington-a US Vice-President JD Vance hmu tura an chhuah hnu lawkah an dah lut a ni.
An inkawm zawhah Danish Foreign Minister Lars Lokke Rasmussen-a chuan tha takin an indawr a, ‘inrem lohna lian tak’ erawh a awm tih a sawi a. A hnuah Trump-a’n Greenland lei a tum chu a sawisel zui bawk.
Trump-a hian Greenland hi US thuhnuaia dah a duh a, Oval Office-a thuthar lakhawmtuten an kawmnaah pawh ‘kan ram him nan Greenland hi kan mamawh’ tih a sawi a. Sipai chakna hman mai pawh a hnial lo va, Nilaini zanah erawh kha chuan Denmark nen hmalak tur an nei tih a sawi leh bawk.
Polish Prime Minister Donald Tusk-a chuan an ram chuan Greenland-a dah ve a tum lo tih a sawi a; mahse, US sipaite an chet chuan ‘politic thila chhiatna lian tak’ a thlen tur thu a sawi.
Belgium-a Russian embassy chuan Arctic-a boruak inlumlet chu ‘ngaihven ngai tak’ a nih thu sawiin Nato chuan ‘Moscow leh Beijing atanga hlauhawm awm thei nia sawi dik lo tak avangin’ sipai an dah niin a sawi.
European Nato ramten sipai an dah hi tlem tete chauh niin Danish kaihhruaia a huhova chet lakna, Operation Arctic Endurance an tih hnuaiah a ni a. Engtia rei nge an awm dawn pawh hriat a ni lo.
Finland-in military liaison officer pahnih a tir a, anni hi Arctic ram ve tho niin defence ministry-a policy department hotu, Janne Kuusela chuan ram tangrualte himna an ngai pawimawh a, invenna atan ti an ni tih a sawi.
Germany-in A400M transport plane an luhtir a, sipai 13 phur niin Inrinni thleng Greenland-ah hian an awm dawn tih an sawi.
Danish defence thuneitute chuan Greenland-a sorkarin an chhehvela Nato-in hnuhma an nei hi European leh Atlantic chhehvel thlenga himna turah a ngai niin a sawi.
US pawhin Greenland-ah hian sipai hmun nei sain 150 vel an awm a, Copenhagen nen inremna an neih sa angin dah belh theihna an nei.
Swedish prime minister pawhin Nilaini khan an sipai army officer-te Nuuk-ah an thawn tih a sawi a. Norwegian pahnih, British military officer pakhat leh Dutch naval officer pakhat an lut tawh bawk.
Danish Prime Minister Mette Frederiksen-a chuan Ningani khan him taka Greenland awmtir chu Nato tangrualte thil tum thuhmun a nih thu a sawi.