European Union-in Russia hnena ballistic missile pe-ah Iran puh

European Union chuan Iran-in Russia hnenah ballistic missile a pe ngei tih finfiahna tha tawk tak an nei tiin a sawi a, hei hi Tehran chuan hnawl nghalin mahse Kremlin chuan a pha tha duh hauh lo thung.
Kar kalta khan US media outlets te chuan Ukraine a hman turin Iran chuan Russia hnenah ralthuam a pe ni ngeiin Washington chuan a hria tiin an lo tarlang tawh a ni.
“Kan thawhpui tena Iranian ballistic missile in Russia a thleng ngei tih finfiahna tha tawk min pe a ni” tiin EU thupuangtu Peter Stano chuan a sawi a.
“Kan member state te nen kan chhui chiang mek a, kan hrechiang thei a nih chuan Iran in Russia-in dan kalha Ukraine a runnaah finfiahna tha tawk kan nei thei dawn a ni,” tiin a sawi bawk.
Stano chuan EU leaders te dinna chu a chiang em em tia sawi bawkin European Union chuan international partners te nen inberawnin hmalakna a nei nghal ang a, a tul a nih chuan Iran lakah hrekna nasa zawk kalpui a ni ang a ti bawk.
Iran Foreign Ministry chuan European Union thusawi chu hnawl nghal thungin, mahse, khawthlang ram te chuan Tehran chu thla tam tak chhung chu Russia hnena ralthuam pe lo turin an lo ti tawh a, EU chuan Iran chu Ukraine indona atan hman tura Russia hnena drone a pek avangin a lo hrek sa tawh bawk a ni.
“Iran-in ralthuam pe anga min puhna hi na takin kan hnawl a ni” tiin Iranian Foreign Ministry thupuangtu Nasser Kanani chuan weekly press conference a neihnaah a sawi thung a.
Kremin chuan Iran in missile a pe tia Wall Street Journal report chungchang zawhna chu a chhang tha duh lo thung a.
“He report hi kan hmu tawh a, hetiang information ang hi a dik vek e tihna a ni ziah lo” tiin Kremlin thupuangtu Dmitry Peskov chuan a sawi a.
“Iran hian kan thawhpui ram pawimawh a ni a, trade leh economic lamah inzawmna tha tak kan nei a, thil hrang hrangah thawhdunna tha leh inbiakna pawh kan nei zui zel a ni” tiin Peskov chuan a sawi bawk.
United States chuan Iran-in Russia hnena ralthuam a pe tih finfiah a nih ngat chuan chhanletna na tak pek a ni ang a ti bawk a, hetih lai hian Iran-in reformist Masoud Pezeshkian president thara a neih hnuah Khawthlang ramte nena inzawmna tha zawk a awm theih beiseina a sang thung.
Khawthlang ramin na taka an hrek avangin Moscow chuan Ukraine indona a kalpui zel theih nan Iran leh North Korea te chu ralthuam supply chungchangah biakbawr berah a nei tia sawi a ni.
Ukraine chuan Russia atangin ni tin Iran siam Shahed drone hmanga beih a tawk reng tiin a sawi a, hei bakah hian North Korean missile keh themte pawh an hmuh thu an sawi bawk a ni.