Everton-a number 18 shirt ha tur Grealish

Everton-a number 18 shirt ha tur Grealish
England midfielder Jack Grealish chu Manchester City-in Everton lamah loan-in an chhuahtir a, season khat a khelh phawt chhungin kum 29 mi Grealish hian Everton club great pahnih Paul Gascoigne leh Wayne Rooney-te hak thin number 18 kha a ha dawn a ni.
Grealish hian Thawhtanni daih tawh khan medical test paltlangin, Thawhlehniah Everton training ground-ah hun a hmang tawh a; a kawr hak tum number chungchangah hian Rooney nen pawh an inbiak tawh thu a sawi.
Kum 2021 khan City hian Aston Villa atangin Englishman hi pound maktaduai 100 (USD 135.08 million) zetin an leichhuak a, mahse, manager Pep Guardiola hnuaiah duhsak a hlawh zawh tak loh avang leh nakkum lam World Cup-a ram aiawh tur chuan club level-a inkhelhna hmun chang tam nih a pawimawh bawk si avangin hmun a chan phakna tur Everton lamah a chhuak ta a ni.
Thla thar maia kum 30 tling chho ve tawh tur Jack Grealish hian season liamta khan City tan league-ah vawi sarih chiah bul a tan a; kan hnung deuha City Club World Cup squad-ah pawh khan telh a ni lo.
Club lama hmun a chan phak meuh loh avang hian England 2024 European Championship squad-ah pawh khan a tel ta lo reng a, mahse, ram tana match 39 a lo khelh ve tawh belhchhah turin Thomas Tuchel-a rin hlawh a tum ruh hle a ni.
Media report-a a lan danin season liamta Premier League-a 13-na luahtu David Moyes-a team Everton hian loan period zawh hunah an lungawi a nih chuan a nghetin City player hi pound maktaduai 50-in an kawl zui thei ang.
Grealish hian tun dinhmunah City atangin sum a hlawh hnem hle a, chawlhkar khata pound 300,000 hlawh kai pha a nih avangin City hian chhawr mumal loh laka chuti zat sum sen reng ai chuan hralh ngheh mai an duh a, loan-a hlawh pek chhawktu Everton tana a chetthat leh that lohah a innghat ang chu!
Karleh Thawhtanni hian Toffees-in league season thar bul an tan tawh dawn a, kai thar Leeds United an tum hmasaber dawn a ni.