Everton neitu thar tur 777 Partners
English Premier League club Everton neitu Farhad Moshiri chuan a chanvo hralh a remti ta a, kum 2023 chhung hian 777 Partners hnenah a hralh fel hman beisei a ni.
Everton neitu ni mek British-Iranian Moshiri hian kum 2016 atang khan Everton-a thuneihan 94% zet a lei a, sum a invest zat hi £750m vel bawr a ni. Everton neitu a nih chhungin club tantute lawm a hlawhchhuak zo lo. Kum ruk chuang zet a enkawl hnuin a chanvo 94% hi American investment fund 777 Partners hnenah hralh a remti. 777 Parners hnenah a thuneihna hlan fel a, Everton in rochun fel turin Premier League, Football Association leh Financial Conduct Authority approval lak fel a la ngaih vangin kum 2023 tawp hmain thuneihna an inhlan fel hman tura ngaih a ni.
Everton neitu thar tur 777 Partners hi US khawpui pakhat Miami a inbun an ni a, infiamna lamah an inrawlh thuk hle. Brazil club lian Vasco de Gama, Belgium club Standard Liege leh Germany club Hertha Berlin neitu an ni a. Europa League 2023 champion Sevilla-ah chanvo thahnem tak an nei bawk.