Excise minister-in zu bikah kan dinhmun ngaihtuah chian a duh
Zu khap leh khap loh chungchangah kan ram dinhmun dik tak ngaihtuah chian tlan a ngai tih Excise minister Lalnghinglova Hmar chuan a sawi.Assembly Session neih zawh taka a department chan hoa sum ruahman sawihonaah Excise & Narcotics minister hian, zu chhe em em mai ina kan thalaite an thi zawih zawih mai chu engtin nge kan tih reh ang, tih ngun taka ngaihtuah a ngai tih a sawi a. Kan ram dinhmun dik tak sawi tlan a ngai, tiin, “A in lo thei lo an awm si a, zuar dawn ila a tha ber lo thei a, tun aiin a dan kengkawhtu lam intih chak tum dawn ila, kan ram dinhmun, tlawmngai pawlte nen theihtawp kan chhuah pawhin heti hi kan ni,” a ti.
Zu leh ruihhlo chungchangah kohhran thalai hruaitute leh tlawmngai pawlte an sawipui tawh a, kan state dinhmun dik tak an hrilh tih a sawi. Ruihhlo do kawnga an inthuam chak theihna’n state budget piahlama hma lak tumin an inbuatsaih mek tih a sawi bawk.
“Ruihhlo kan do kan tih hian a ruia te kan do hran lo, ruihhlo erawh kan do. Khawlai lun lai leh mipui vantlang hmunah ruiin ti lo ang u, tiin kan inchah. Khawpui lunlai leh hmun ualai lai chu police-te nen tangtlangin thenfai zel kan tum a ni,” a ti.
The Mizoram Liquor (Prohibition) Rules 2022 tlawhchhanin winery pahnih – Champhai leh Hnahlanah grape atanga siam wine siam phal a ni a, sawrkar atanga phalna neia zuar (vendor) 43 Mizoramah an awm tih minister hian a sawi. A bak zawng, wine siam leh zuar chu dan bawhchhia vek an ni tih a sawi a. Lakhuihthei, balhla, sunhlu leh a dangte atanga wine siam phalna pek ala ni lo, tiin, “Tunah rih chuan heng atanga wine siam hi dan bawhchhiatna vek a la ni,” a ti.
“Ngaihtuahna awm ta chu, grape atanga wine siam kan phal tho a nih chuan, lakhuihtheih, dragon fruit, balhla, sunhlu ah te wine a ni emaw beer a ni emaw, phalna siam ni ta se, kuthnathawktute tan a tha dawn mange, tih kan sawi ri feih feih tan tawh. Chutihrualin a kalpui dan turah fimkhur a ngai,” a ti.
Excise & Narcotics minister sawi thenkhat:
8 Excise & Narcotics enforcement staff post awm zat 559 atangin post luah mek 431 a ni , a ruak 128 a awm.
8 Kum 2023 ah rakzu litre 81221.885, zu bilh lai tin 194733, a senchi (IMFL) um puilting 20516, a chanve um 3134 bakah heroin kg. 76.058 leh ganja kg. 179.33 an man.
8 Investigating officer (IO) in kum khat chhungin zu kaihhnawih bikah chauh case 140 ziaklutin a bawhzui a. MLP Act hnuaiah nitin mi 16.35 man ziah ang a ni.
8 ND&PS Act hnuaiah IO-in kum khatah case 31.85 ziaklutin a bawhzui a. He dan hnuaiah hian nitin mi 2.98 man ang zel a ni.