Eye Care Hospital kum 25 tlin lawm

Eye Care Hospital kum 25 tlin lawm
Eye Care Hospital, Dawrpui South chuan Inrinni khan an kum 25 tlinan lawm a. Aizawl East-II bialtu MLA, minister B Lalchhanzova’n a hmanpui.
Mmipui rawngbawl nana thiamna bik neite chu sawrkar hmanraw tangkai tak an ni tih B Lalchhanzova hian sawiin, Eye Care Hospital-a thawktute inpekna fakawm a tih thu a sawi a. Mipui min mamawhtute leh mi harsa zawkte ban phaka awm hi rawngbawlna pawimawh ber zing ami a ni tih a sawi.
Mizoram State Medical Association president Dr Lalbiakkima leh Global Eye Hospital Kolkata director Dr Aniruddha Maiti te chu khualzahawm an ni a. Dr Aniruddha Maiti leh a team-ten ‘Live Surgery on Retinal’ leh ‘Live Surgery on Anterior Segment’ tih thupui hmangin a zirtir a. Civil Hospital Aizawl, Zoram Medical College, Synod Hospital Durtlang, Agartala Govt. Medical College, Global Eye Hospital Kolkata, Chandraprabha Eye Hospital Jorhat leh Amulya Jyoti Eye Foundation Kolkata atanga mithiamten mit natna leh a enkawl dan thupui hrang hranga hmangin an zirtir a ni.
Eye Care Hospital (Eye Care Centre tia hriat bawk) hi 1999 August 1 khan din a ni a, a tirah chuan eye clinic anga bul tan, niin, a hnuah Eye Hospital ni tura tihchangtlun chhoh a ni. 2020 September 19 khan Christian Hospital Serkawnah Satellite Vision Centre an hawng tawh bawk.
Eye Care Hospital hi member 4 awmna Board of Directors-in a enkawl a. Thawktu eye surgeon 2, staff nurse 3, optometrist 5, IV grade 2, optician 3, administrative staff 4 leh visiting surgeon (Mizoram pawn atanga lokal doctor thiam bik) 4 an awm a; B.Sc optometrist intern 4 an awm mek.
2015 July 1 atanga kumin September 31 inkarah Eye Care Hospital-a mit entir 60841 an awm a, cataract surgery vawi 3643 tih a ni a (small incision cataract surgery 115, phacoemulsification cataract surgery 3528); LASIK surgery vawi 1815 tih a ni. Keratoplasty vawi 7, retina treatment vawi 904 nei tawhin, free eye camp leh school eye screening an buatsaih thin bawk.