FA Cup 2025 champion Crystal Palace

May 17, Inrinni zan khan Wembley Stadium-ah FA Cup 2025 final khelh a ni a, Cystal Palace chuan mak tak maiin Manchester City an hneh a, tui let hnu lama a vawi khat nan trophy an chawi. FA Cup champion ni tura Palace hian zin kawng zawh a thuin a hautak a, a ngaihawm hle.
Inelna liana la champion ngai lo Crystal Palace hian team lian zawk leh champion tura rinkai zawk Manchester City hneh ngei tumin tan an khawh. City in season kal meka trophy a lak theih awmchhun a nih vangin champion ngei tumin tan an khawh a, bul pawh an tan tha hle. Inkhel tir lamah Wembley a goal thun hasat thin Erling Haaland chuan goal a thun teuh hle a, Palace keeper Dean Henderson a paltlang zo lo. City hian corner atangin goal a thun teuh zui leh viau a, si nghak Henderson chuan pui zeta dangin an team a chhanhim nawn leh.
Inkhel tir lamah ball chang tlem zawk niin, bet deuh reng mah se Palace an him hram hram zel a, rin loh takin goal thun hmasa zawkah an tang ta tlat zawk. Palace hian an goal bul hnaiah City player an pawt khawm te te a, fuh zetin an nawr let thut. Inkhel tan atanga minute 16-na lekah Daniel Munoz cross tha tak chu Eberechi Eze chuan fuh zetin a pet goal a, hmahruaina goal a thun. Hma hruaina goal an thun hnu lakah phur taka inlan City hian goal an thun belh teuh hle a, uiawm takin an hun tha neih an hlah ta thung.
Crystal Palace in goal an thun hmasa hi final tihmuhnawm zualtu a ni a, City in goal thun tuma an nawr let a hmuhnawm thei hle. City hian goal thun theihna hun remchang an nei a, penalty an hlawhchhuak. Bernardo Silva penalty hlawhchhuah hi Erling Haaland chuan pet a tum zet naa Haaland hian Wembley-ah penalty a thelh ngun deuh vangin an ringtawk zo lova, Omar Marmoush an pet tir. Marmoush hian pet chhe lem lo mah se si nghak chetha Dean Henderson chuan fuh zetin a dang a, Palace an chhanhim nawn leh.
Penalty thelh bawk mah se City an khel tha chhunzawm a, an hlauhwm zui zel bawk. Jeremy Doku chuan fuh zeta a khalh tlang hnuin tha zetin a shot zui. Doku pet hi goal ngei tura ngaih ni bawk mah se Henderson chuan ropui rapthlak takin a lo dang hman leh tlat pek a, City beiseina chu sarah a zam raltir nawn leh. City hian Josko Gvardiol leh Claudio Echeverri te hmangin hun tha nei zui leh bawk mah se Henderson an paltlang zo lo vek a, hun tawp thlengin an si phurh an sut thei lo. City in an si phurh an sut theih loh vangin Crystal Palace chu ropui takin FA Cup-ah an champion a, a vawi khat nan trophy lian an chawi.
Crystal Palace hian FA Cup final vawi hnih an lo lut tawh a, tlawm zawkah an la tang ve ve. FA Cup final an luh vawi thumnaah team lian City an hmachhawn a ngai a. City an hmachhawn hnuhnung pariatah chak an nei miah lo bawk nen Palace hmabak a hautak hle. Champion tura rin hlawh zo lo, tlawm ngei tura ngaih ni bawk mah se rin loh takin Manchester City an hneh teh mial a, an hun tawn tawha hun hlimawm leh ropui bik an tawng a. FA Cup-a an champion ni hi an tan ni ropui leh ni chhianchhiahtlak a ni kumkhua tawh ang.
FA Cup champion thar Crystal Palace hian manager Oliver Glasner enkawlna hnuaiah bul an tan chhe hle a, EPL-a an game hmasa pariatah vawi khatmah hnehna an chang zo lova, 1992-93 hnu lama bul an tan chhiat ber tum a ni hial nghe nghe. Che chhe viau mah se club thuneituten manager Glasner an ban mai lova, a lakah rinna an nghat chhunzawm. October ni 27-a an mikhual Tottenham an hneh nawlh a, heta tang hian hma lam an pan hret hret. EPL-ah pawh chetha vut lo mah se Manchester United leh Tottenham te chungah awmin 12-naah an awm mek a, team vangtlang an ni phak. Inelna dangah champion lo mah se FA Cup final an lut nawlh a, team lian Manchester City hnehin an champion ta hial bawk a. Tui let hnu lama a vawi khat nan rophy an chawi a, lawm vangin an mittui a luang ve ta nge nge. FA Cup-ah an champion vangin Crystal Palace hian season tharah Europa League an khel dwn nghe nghe.
Ropui tana Crystal Palace an champion laiin Manchester City erawh chu kum riat hnuah a vawi khat nan trophy chawi nei lovin season an khar ve thung. Pep Guardiola hnuaiah ropui taka inlan a, EPL-a vawi li champion zawn thei hmasa ber ni hian City hi an hun a liam ve taah ngaihna lian tak a awm mek. An midfielder pawimawh Kevin de Bruyne a chuai ve lam tawh a, Bernardo Silva leh Illkaay Gundogan te tha a lo thum ve ta bawk a, hliamin a tihbuai vangin an goal thun khawl Haaland-a’n beisei a phak lo bawk. Hei bakah hian an player pawimawh Rodri chu season tluanin an chhawr thei lo bawk a, hneh theih loh ang maia inlan thin City khan kut bengin season an khar ta hial a ni.
Wembley Stadium hi City forward Erling Haaland tan khelmual ngainatawm a ni lo chiang hle. Haaland hian Wembley Stadium a inkhel a hmachhawn hnuhnung vawi riatah vawi ruk ngawt goal a thun lo va, penalty a pet hnuhnung vawi sarihah vawi thum ngawt a thelh bawk. Penaly a thelh tam tak vang leh Wembley-a a goal thun a harsat tlat thin vanga penalty pawh pet lo a ni a. Haaland tan chuan Wembley Stadium hi khelmual ngainawm tak zawng a ni lo chiang hle.