FA Cup last 8 draw: City vs Liverpool, Arsenal vs Southampton
FA Cup last 8 draw:
City vs Liverpool, Arsenal vs Southampton
FA Cup quarter-final draw tarchhuah takah Manchester City chuan Liverpool an mikhual dawn a; Championship team Southampton FC khelmualah Premier League hmahruaitu Arsenal an lut ve thung ang.
|um 14 tehreng champion tawh chunga FA Cup trophy hawn hnem ber Mikel Arteta team Gunners hian tun season-ah title pali an la beisei thiang zui zel a, Premier League leh FA Cup bakah hian League Cup final lut tawhin, Uefa Champions League last 16 an chuangkai tawh bawk.
Pep Guardiola team City chuan Inrinni khan 3-1-a mualneitu Newcastle United hnehin, season riat chhung teh meuh a zawn zatin FA Cup quarter-final an lut tling ta a, a zawna FA Cup final tum li lut tling turin vawi hnih chiah chak an mamawh leh tawh a; Arsenal ang bawkin season kal laiah trophy pali beisei tur an la nei ve mek.
Anfield club pawh-in Etihad stadium-a lut thei turin Wolverhampton Wanderers FC lakah 3-1 hnehna an chang ve bawk.
Third-tier division-ah pawh a mawngphah luah mek Port Vale chuan Inrinni fifth round inkhel pakhatah rin loh tak maiin an Premier League mikhual Sunderland chu si khat faiin an lo barakhaih nawlh a, semi-final luh inchuh match pakhatah top flight team dang Chelsea an luhkhung dawn a, Stamford Bridge-ah upset ropui an beisei leh ang!
West London club Blues hian Inrinni fifth round inkhel dangah mualneitu Wrexham tankhawh an paltlang awlsam mai thei bik lo a, extra-time an khelh ngial hnuah 4-2 hnehna an chang hram a, Port Vale pawhin Premier League palian hmaa khup nghal ngawt an tum bik lo turah ngai ang!
Quarter-final match dangah West Ham United chuan Leeds United an mikhual dawn a; London club Hammers hian last eight lut turin Thawhtanni penalty shoot-out-ah mikhual Brentford an paltlang hram a ni.
Team pahnih hi extra time zawhah pawh 2-2-a an la inhnehtawk cheu avangin penalty hmanga pawhthen an ngai a, West Ham player Konstantinos Mavropanos chuan chakna goal pawimawh a chhuihlut zui ta a ni.
FA Cup quarter-final match-te hi April ni 4-5 chhunga khelh tur a ni.
Quarter-final draw:
Southampton v Arsenal
Chelsea v Port Vale
Manchester City v Liverpool
West Ham United v Leeds United