FA Cup – Team liante chak zan

Football a inelna upa leh ngaihhluthlawh tak FA Cup chu Inrinni zan khan khelh chhunzawm a ni a, team lian ten awlsam takin hnehna an chang hlawm. Inrinni zana FA Cup result langsar zual kan thlir kual ang.
City 8-0 Salford City
EPL champion leh FA Cup-ah pawh champion tura rinkai ber zinga mi Manchester City chuan an mual Etihad Stadium-ah League Two team Salford City an mikhual. An mikhual te hi 8-0 ngawtin an lo sawp a, awlsam takin fourth round an inhlangkai.
Mualneitu City hian an mualah bul an tan tha hle a, goal pawh an thun thuai. Inkhel tan atanga minute riatna lekah Jeremy Doku chuan hmahruaina goal a thun. Belgium forward Doku hian minute 69-naah penalty atangin goal a thun leh bawk a, an mikhual lakah goal hnih a thun. Doku goal thun hnu hian Divin Mubama chuan minute 20-naah an goal hnihna a thun a, Nico O’Reilly chuan minute 43-naah an goal thumna a thun a, 3-0 a hmahruai chungin chawlhlawk an hmang.
Chawlhlawk hnu lamah City an khel tha lehzual a, goal nga ngawt an thun belh. Si thum faia hmahruai tawh City hian second half tan atanga minute lina lekah penalty an hmu. He penalty hi Jack Grealish chuan harsatna tawk lovin minute 49-naah a pet goal a, an goal lina a thun. Goal thun malh malh hnuin James McAtee a inlar. McTee hian minute 62, 72 leh 81-ahte goal thuin hattrick a siam a. League Two team Salford City lakah hian 8-0 ngawtin hnehna an chang zui ta a ni.
Liverpool 4-0 Accrington Stanley
Season kal meka chetha tak; Champions League leh EPL-a hmahruai kawp mektu Liverpool chuan an mualah League Two-a 19-na ni mek Accrington Stanley an mikhual a, si li faiin hnehna an chang.
Anfield-ah chak tura rinkai zawk Liverpool hian an khel tha mar viau a, chawlhlawk hma leh chawlhlawk hnuah goal hnih ve ve an thun. He inkhelah hian minute 29-naah Diogo Jota chuan hmahruaina goal a thun. Jota goal thun hnu hian Real Madrid pan tur anga sawi Trent Alexander-Arnold chuan minute 45-naah an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah Reds an khel tha chhunzawm a, goal hnih an thun belh leh. Chawlhlawk hnu lamah beisei anga goal lut a awm lawk loh hnuin Jayden Danns chuan minute 76-naah an goal thumna a thun a. Hun tawp dawn hnaih minute 90-naah Federico Chiesa chuan an goal lina a thun zui leh a, an mualah si li faia chakin fourth round an inhlangkai zui ta a ni.
Chelsea 5-0 Morecambe
London club lian Chelsea chuan Stamford Bridge-ah League Two team Morecambe an mikhual a, 5-0 a hnehna changin fourth round an inhlangkai.
Chelsea hi League Two team Morecambe lakah awlsam taka chak tura ngaih ni bawk mah se beisei angin goal an thun hma thei lo. Darkar chanve chuang zet goal an thun theih loh hnuin Tosin Adarabioyo chuan minute 39-naah hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Chelsea an khel tha leh zual a, goal li an thun belh. Second half tan atanga minute 5-na lekah Christopher Nkunku chuan an goal hnihna a thun. Felix goal thun hnu hian goal hmahruai thuntu Tosin Adarabioyo chuan an goal thumna a thun zui leh a. Hemi hnu hian Joao Felix chuan goal hnih a thun zui leh a, an mualah 5-0 in hnehna an chang zui ta a ni.
Result dang
Tarlan tawh angin Inrinni zana FA Cup-ah inlehthalna lian thleng a awm lova, team lian ten hnehna an chang hlawm. EPL-ah table hnuai ber dawttu-a awm mek Leicester City pawhin an mikhual Queens Park Rangers chu 6-2 ngawta sawpin fourth round an inhlangkai ve bawk. Foxes tan hian James Justin chuan goal hnih a thun a, Stephy Mavididi, Facundo Buonanotte, Jamie Vardy leh PenWout Faes ten goal khat theuh an thun bawk. Mikhual team QPR tan hian Jonathan Varane leh Rayan Kolli ten goal an thun ve bawk.
Inkhel dangah AFC Bournemouth chuan an mikhual West Bromwich Albion chu 5 – 1 in an hneh a. Brighton & Hove Albion chuan mikhual an nihna hmunah Norwich City chu 4-0 in an hneh a. EPL-ah beisei phak baka chetha Nottingham Forrest pawhin an mikhual Luton Town chu si hnih faiin an lo hneh ve bawk.