FA Cup – United in champion zia an lantir

Pathianni zan khan FA Cup-ah inkhel ngaihven hlawh tak a awm a, Emirates Stadium-ah FA Cup-a champion tam pahnih Arsena leh Manchester United te an inhmachhawn. Inkhel hmuhnawm takah hun rei tak chhung tlem zawk ni chunga inlan Manchester United in Gunners lakah champion zia an chhuah a, ropui takin hnehna an chang. United rual hian team lian Tottenham pawhin hnehna an chang ve bawk.
United an ropui
Emirates Stadium-a an mikhual United lakah Arsenal an khel tha viau a, ball pawh an chang tam zawk viau. Gunners hian penalty meuh hmuin goal thun theihna hun tha tak nei bawk mah se an hun tha neih an chhawr tangkai zo lova, mak tak maiin an mualah an tlawm. Penalty shoot-out hmanga Arsenal hnehtu United hian an khelh hnuhnung pahnihah team lian an hmachhawn zawn a, an khel tha zawn hle. Liverpool nen an inhnehtawk hnuah Arsenal an hneh zui leh vangin Ruben Amorim-a team te hian inrintawkna sang tak an neih phah ngei ang.
Inkhel hmuhnawm takah goal lut a awm theih loh reng hnuin chawlhlawk hnu lamah United an che fuh hmasa a, goal thun hmasa zawkah an tang. Arsenal defender tihsual vangin United hian fuh zetin an khingpuite an nawr tlang. Argentina rawlthar Garnacho siamsak tha tak chu captain Bruno Fernandes chuan pui zet maiin minute 52-naah a pet kual lut a, hmahruaina goal a thun. Ball chang tlem zawk United in goal an thun hmasa hi inkhel tihmuhnawm zualtu a ni a. Arsenal nawr let a hmuhnawm thei hle.
Nataka an khingpui nawrtu Arsenal hi an che fuh thuai, minute 61-naah United defender Diogo Dalot chu yellow card vawi hnih a hmuh vangin hnawhchhuah a ni. An mualah tam zawk an nih hnuin Arsenal in an mikhualte an nawr na leh zual a, goal pawh an thun thuai. Minute 63-naah defender Gabriel Magalhães chuan vanneihthlak ang reng takin a pet goal a, an si phurh a sut. An si phurh an sut hnuin Arsenal an khel tha zui viau a, goal pawh an thun teuh thei hle. Gunners hian penalty sawisel hlawh tak an hmu. Inhnial theih taka Kai Havertz penalty hlawhchhuah hi captain Martin Odegaard chuan pet chhe lem lo mah se si nghal chetha tak Altay Bayindir chuan fuh zetin a dang a, an team a chhanhim. Andre Onana aia lut Altay Bayindir hian pui zet zetin save a nei zawn a, an team a chhanhim tak zet.
Ball chang tam zawk Arsenal tan hian Kai Havertz chuan goal thun theihna hun tha zet mai tum hnih ngawt a hlah a. Midfielder Declan Rice shot tha zet leh a tauh tha zet mai chu si nghak Altay Bayindir chuan pui zetin a dang leh bawk. Arsenal in goal an thun theih hlawl loh vangin penalty shoot-out hmangin chak zawk zawn chhunzawm a ni. United tana pettu ten an pet goal vek laiin Arsenal tan Havertz pet chu Altay Bayindir chuan fuh zetin a dang a, United a chakpui ta a ni.
Arsenal mualah, chutah pawh tlem zawk ni reng chunga inlan chunga hnehna chang United hian champion zia an lantir tak meuh a. Sir Alex Ferguson enkawl thin United rau kha an kokir thar leh. Emirates Stadium-ah ngei Arsenal hnehtu United chet dan kha tute tan mah sawi nep theih rual a ni lo.
Tottenham an chak tlai
Pathianni zana inkhel dangah team lian Tottenham pawhin hnehna an chang a, beisei aiin hnehna an chang tlai tlat thung. Tottenham hian Non League team Tamworth hi hun pangngaiah an hneh thei bik lo. Hun pangngai tawp hnu; extra-time-ah Nathan Tshikuna-a own-goal bakah Dejan Kulusevski leh Brennan Johnson te goal thun hmangin hnehna an chang thei hram thung.
United hmachhawn tur Leicester
Pathianni zanah FA Cup third round khelh zawh a nih rualin fourth round a intum tur pawh fel nghal a ni a, champion lai Manchester United chuan Leicester City an hmachhawn dawn. Champion tura rinkai Liverpool in team lian an pumpelh a, Chelsea leh Brighton inhmachhwn tur chu inkhel ngaihven hlawh zual zingah a tel ang.
Arsenal lakah huaisen leh tha chungchuang taka inlan United hian EPL table hnuai ber dawta awm mek Leicester City chu Old Trafford-ah an mikhual dawn a, last 16 an luh theih ngei a beiseiawm hle. Season kal mekah United hi an champion leh a nih chuan FA Cup-a Arsenal champion zat tlukin, champion ngun ber an ni thar ve leh ang.
United ai mahin Liverpool khingpui tur an nem zawk dawn niin a lang a, Reds hian league hniam zawk a ni Plymouth Argyle an hmachhawn dawn a, Mimuala inlan tur mah nise hnehna an chan theih a beiseiawm. Hetihlai hian EPL club pahnih Brighton leh Chelsea te an inhmachhawn dawn bawk a, an ni hi inhnehtawk thawkhat viau tura ngaih an ni. An ni bakah hian Leeds United v Millwall or Dagenham and Redbridge, Preston North End or Charlton Athletic v Wycombe Wanderers, Exeter City v Nottingham Forest, Coventry City v Ipswich Town, Blackburn Rovers v Wolverhampton Wanderers, Mansfield Town or Wigan Athletic v Fulham, Birmingham City v Newcastle United, Everton v Bournemouth, Aston Villa v Tottenham Hotspur, Southampton v Burnley, Leyton Orient or Derby County v Manchester City, Doncaster Rovers v Crystal Palace leh Stoke City v Cardiff City te an inhmachhawn dawn bawk.