Fa neih tam…

Chief minister Lalduhoma chuan fa neih tam a pawimawh tih sawiin, pun chu sawrkar policy a ni, a ti a. Fa pathum leh a aia tam nei nupa chu sawrkarin hamthatna siamsak hial a rilruk mek tih a sawi bawk. He thu hi West Phailenga Zofest 2024 a hmanpuinaah chief minister hian a sawi a ni.
India hi khawvela mihring tam berna China dawttu a ni thin. (Tunah chuan mihring tam berna a ni tawh). India-in mahnia rorelna a kalpui tan tirh (1951) atangin family planning (birth control) kha First Five-Year Plan-ah a telh nghal a; khawvela population programme kalpui hmasa ber a ni ta hial awm e.
Birth Control hmalakna a han kal tak tak a, indanna (contraceptive) hman nasat avangin total fertility rate (TFR) ding lai 5.2 (1971) ni thin chu a hnu kum 47 (2018) a han vei leh meuh chuan 2.2 a ni ta dawrh mai a. Kum 2019-2020 chhung khan 2.0-ah a tla thla leh a. Hei hi mithiam ten polpulation maintenance level 2.1 (nu pakhatin fa pahnih zel hrin tur) ni tura an chhut aiin a hniam ta a, 2023-ah phei chuan 1.9 a ni tawh. Hei vang hian India chuan ‘two child norm’ a kalpui leh ta a ni.
Mihring tlemna ber state Mizoram hian birth control kha kan la na ber a. Radio lamah uar takin puanzar reng a ni a, lemchan hmangtein campaign a ni bawk a, ration card mawng lamah ‘chhungkaw hlim nan fa nei tlem rawh’ tihte kha a chuang kiau kuau reng a. State kan nih rualin ‘Family Welfare Award’ te kha kan dawng ta hial a nih kha. Fa nei tlem tura kan inzirtirna rah kha tunah chuan kan tuar chho leh ta mek niin a lang a. Siamtuin ‘chi tam tak thlaha lo pung tur leh leilung luah khat tura’ thu min hnutchhiah kha kan bawhchhe nasa hle tihna a ni.
A taka tawnhriatnain min beng harh a, tunah chuan pian pun dan kan buaipui leh ta luai luai mai. Mizorama kohhran lian pahnih Presbyterian leh Baptist te pawhin fa nei tam tura inzirtirna an kalpui mek a. Tualchhung kohhran thenkhat chuan fa nei tamte tanpuina tur sumfai an bituk ta hial mai. Pawl hrang hrangte pawhin fa neih tam an sawimawi ve mek bawk a. Tunah chuan state sawrkar hotu lute pawhin national policy ‘two child norm’ te pawh nawr tawm tawk tawkin, ‘fa pathum leh a aia tam nei nupa chu sawrkarin hamthatna siamsak a rilruk’ tiin ualau takin an puang ve ta hial. NE state zingah Mizoram (1.9) leh Sikkim (1.1) chiah hi population maintenance level 2.1 pha lo kan awm, state dangte chu 2.2-2.9 te an ni hlawm.
Kan ram hi kan la luah zo lo hle; square Km-ah mi 52 chauh kan la ni, kan la thawl hal hal hle. State dangah chuan sqkm-ah 300 chuang daih te an ni. Kan TFR hi kan dawm kan loh chuan hnam ral tur kan ni tihna a ni mai awm e.