Fabrizio Romano – Here We Go!

Infiamna hian khawvel a luah a, mihringin kan ngaihluin Infiamna chanchinthar atangin exam zawhna leh chhanna pawh a lo kal ngei ngei zel a nih hi. Infiamna chuan sum leh pai tam tak a keng tel a; sumdawnna lian tak a ni tel tawh a. Hmingthanna leh hmingthatna, hmingchhiatna leh ram leh hnam indona pawh a keng tel vek tawh a nih hi. Infiamna vanga lar te chuan khawvel an deng chhuak a; media leh chanchinbu mite sumdawnna lian tak pawh a ni ta bawk. Chutiang zingah chuan tun lai infiamna khawvela chanchinthar rintlak ber ber min hrilhtu leh Football khawvelah phei chuan a thu leh hla kan chan thup, ‘Here We Go’ tih kan hmuh ruala lawmna tam tak min thlen thin Italian journalist Fabrizo Romano chanchin hi kan sawi dawn a ni.
Pian leh murna
Fabrizio Romano hi Ramtuk Thla ni 21, kum 1993 khan Naples, Italy-ah a piang a; a tirah chuan football khela eizawng nih tumin tan a la nasa ve hle thin. Mahse chungte chua ‘talent’ a ni lo tih hriain a tum a thlak a; infiamna chanchinthar buaipuituah a tang zui ta a ni. Catholic University of the Sacred Hearts, Italy atangin infiamna khawvelah chanchinbumi ni turin lehkha a zir ve a, mahse a kal tluan lo thung. A eizawnna atan hian tawng chi hrang hrang thiam a pawimawh tih hriain English, Spanish, Portuguese leh a pianpui tawng Italian te a thiam a ni. Sky Sports Italia-ah hian a thawk pah mek bawk a ni.
Bul tanna tlawm
Kum 2009 khan High School-a la kal lai, kum sawmpariat chauha upa nih lai atangin Italian chanchinbu tenauah a thlawnin infiamna chanchin thar a ziahte chu a thawn ve thin a. Ni khat chu Barcelona khawpuia Italian chanchinbu mi hian Fabrizio chu amah pui turin a sawm a. Chu hun remchang leh hlu tak chu bawhpelh tum loin Fabrizio chuan phur takin a thawk ta a. FC Barcelona Football Club, La Masia an tiha inkhelh zir naupang tak takte chanchin chu a ziak ta thin a. La Masia –a awm inkhel thiam nih tuma inzir mek te nen chuan an inpawh hle bawk.
Mauro Icardi, Argentina goal thunkhawl chanchin chu football transfer chanchin a ziah hmasak ber a ni a. Hetih hun lai hi kum 2013 niin Icardi hian Sampdoria FC tan a inkhel thin a, La Msaia chhul chhuak a ni bawk. Chanchinbu lian leh rintlak zawk, journalist senior zawkte hriat hmain Icardi hian Inter Milan FC a zawm dawn tih hi Fabrizio hian a tarlang hmasa ber a ni.
Samuel Eto’o
Africa khawmualpui atanga footballer tha kan sawi apianga a hmasa ber pawl luah ziah tawh tur chu Samuel Eto’o hi a ni ngei ang. A vanglai chuan he Cameroon striker hian khawvela football club tha Real Madrid FC, FC Barcelona, Chelsea FC leh club dang dangah pawh sulhnu ropui tak tak a lo hnuchhiah tawh a ni kha. Chutianga Footballer lar tak leh mi hriat hlawh tak a nih lai chuan, tu khawkha mahin kan la hriat lutuk loh leh rintlak takah pawh kan la ngaih loh Italian journalist tuaitir Fabrizio Romano nen an inkawm a. Hetianga Footballer lar leh mi ngaihsan rawn a kawm atang hian sang takah a invawrh phah tih hi Fabrizio Romano pawh hian a hai hauh lo a. A Facebook page cover photo-ah pawh Samuel Eto’o nen an awm dun lai thlalak a hmang a nih hi.
“Engtikahmah ka Facebook cover photo hi ka thlak ngai dawn lo a. Ka hming hi tumahin an la hriat loh lai pawhin footballer ropui Samuel Eto’o hian inkawmna hun tha tak min siam sak a. Chumai ni lo Eruo 3000/- man hu Sana tha tak min pe a. Amah avang hian infiamna khawvela chanchinbu mi hlawhtling tak ka nih phah ta ni” tiin a sawi a. He a thusawi hi Social Media hrang hrangah hmuh tur a awm a, dawt hlawm tawp chu a nih a rinawm loh.
Here We Go!
Kum 2019 khan footballer tawngthei leh mahni induhtawk tak Zlatan Ibrahimovich chuan AC Milan a zawm dawn tih media hmaah a puangchhuak hmasa ber a. Football Coach hlawhtling leh ropui, tuna Barzil ram coach ni mek Carlo Ancelotti chuan Everton FC a enkawl dawn tih chu a sawi lang hmasa leh ber bawk a nih kha.
Tin, infiamna khawvel barakhaiha Leicester City FC champion puitu Claudio Ranieri chuan Sampdoria a enkhawl dawn tih chu Ranieri-a’n a sawi hmain a lo sawi khalh tawh bawk a, hemi tum hian “Here we go!” tih chu hmang tanin hei hi a larpui ta zel a nih hi.
Footballer ropui leh coach ropui nikawp thei Zinedine Zidane khan Real Madric FC a chhuahsan dawn tih kha mipui hriata puangchhuak hmasabertu chu tuna a chanchin kan sawi mek Italian chanchinbumi bawk hi a nih kha.
Chutiang chuan vawiin infiamna khawvelah chuan ‘Here we go!’ tih chu thu rintlak leh chanchinbu lamin an chhuah chhawn a ni ta zel a; infiamna khawvela chanchinbumi rintlak ber a lo nita a ni.
Zanah i muhil ve ngai em?
A bik takin Football khawvela transfer hun lai pahnih – Nipui transfer leh Thlasik transfer lai hian darkar tin, minute leh second tinin chanchinthar a awm reng a. Chung hunah chuan Fabrizio hi “I muhil ve ngai em?” tih chu zawhna a dawn tamber a ni a. Ani chuan darkar li vel a muhil thin tih a sawi a. Infiamna chanchinthar a tarlan tur reng reng chu zaah zaa chiang a nih loh chuan a tarlang ngai lo tih a sawi. July leh Agust thla hi phone call a dawn tam lai niin ni khatah darkar sawmpali te phone call a dawng thin niin a sawi bawk.
Hetiang hian tumruh leh taima takin a thawk a; vawiin infiamna khawvelah chuan a thu leh hla kan ngaichang ta thup mai a nih hi. Lo dam zel se la, infiamna chanchinthar rintlak leh dik min hlui zel turin duhsakna sangber kan hlan e.
Ziaktu : Rinfela Zadeng