Facebook-a live laiin Mexico-ah mayor candidate that

Facebook-a live laiin Mexico-ah mayor candidate that
Mexico-a mayor thlan tura in-candidate mek leh a thuihhruai mi pathum chu an campaign laiin kah hlum an ni a, thil thlen lai hi Facebook-a live-a tihchhuah a nih lai tak a ni nghe nghe.
CNN-in a tar lan dan chuan he thil hi Pathiannia thleng kha a ni a. Yesenia Lara Gutierrez-i hi President Claudia Sheinbaum-i kaihhruai, Morena party aiawha Texistepec mayor thlan tura ding niin khawlaia amah bawrtute hmuh laiin thah a ni.
Amah lawmtute nen hlim taka an awm laiin silai a ri a, camera pawh a thim nghal a. Silai ri vawi 20 a lang a, a hnua thlalak thehdarhah chuan kawtthlerah ruang a lang.
Mexican President Sheinbaum chuan Thawhtanni tuk khan thuthar lakhawmtute a kawmnaah mayor atana candidate thah thu hi a puang zui niin CNN chuan a tar lang a. A sorkar chu Veracruz state thuneitute nen thawkhovin puih an tulnaah an pui zel dawn tih a sawi.
June 1-ah hian state pahnih, Veracruz leh Durango-ah an inthlang dawn a ni.
Thuneitute chuan an chhui zui nghal thu leh a titute hi man chhuah ngei an ni dawn tih an sawi.
Veracruz state Governor Rocio Nahle pawhin social media-ah inthahna a thlen thu hi a tar lang a. “Morena candidate leh a thlawptute Texistepec-a thahna hi kan chhui chhuak ngei dawn a, mi pali thiin pathumin hliam an tuar,” a ti.
Mexico-ah hian inthlan lai hian candidate thah hi a thleng fo va. CBS News chuan a hma ni hnih liam taah khan Mexico khawthlang lam, Jalisco state-a council member Cecilia Ruvalcaba pawh damdawi inah kah hlum a ni tih a puang.
Thla hmasa khan Teocaltiche khawpui sorkara mi pawimawh tak, Jose Luis Pereira chu Jalisco-a thingpui dawra zanriah a ei lai kah hlum a lo ni tawh a. May, 2024 khan chhim lam state, Guerrero-a mayor candidate tho a campaign laiin kah hlum a lo ni tawh a. A hnu lawkah Michoacan state-a Cotija mayor pawh a gym kal haw lam amah vengtu nen kah an ni bawk.
Kum 2006 atang khan Mexico-ah hian mi 4,80,000 thah an ni tawh.