Fai Inelna

Republic Day lawmna pui ber Aizawl sipai lammualah Mizoram khawpui fai Inelna lawmman sem a ni a. Fai inelna hi Mizoramah chuan 2017 atang khan kalpui ve tan niin, bawlhhlawh thliar hran leh sawngbawl kawnga hma la tha te, hman khat daih – single use plastic tihremna kawnga hma la tha te, faina kawnga sawrkar department hrang hrang, NGO hrang hrang leh mipui thawhhona tha te endik tel a ni a. Hei bakah hian environment humhimna kawnga sawrkar, khawtlang leh mimal anga hmalaknate pawh endikna tehfung zingah a tel.
Khawpui han tih hian, district tin khawpui theuh bakah, notified town 17 an tel a. Inelna a nih miau avangin heng zinga a ti tha zualte chuan lawmman an dawng lo thei lo a; chutih laiin, a kum tela faina lama hma kan sawn dan Rate san chhoh zel dan hi a chak lo hle a, eng eng emawah chuan hma chu kan sawn ve zel tho a, mahse kum 2017 atanga kalpui ve tawh si, kum 9 chhunga hma kan sawn dan erawh hi chu ‘faina lama hmasawn chak’ tia han sawi phu chu a ni hran awm lo e.
Kan chenna bul hnai, kan kawtkai leh khawpui chhung khawlaite hi chu han en thuak chuan a lang fai ve vukin a hriat a, mahse khawpui dai hnai tuiluankawr leh kawmkar, kawr ruam, kawngpui kamte hi chu bawlhhlawh paihna hmunpui emaw tih mai turin bawlhhlawh chi tin reng a inzam hnawk niaih nuaih reng tho a nih hi.
Inelna hi chu inelna ngang hi a ni a, a inel zinga a ti tha zual ten lawmman an dawng lo thei lo. Chutih rualin, kan lui tui tibawlhhlawhtu bawlhhlawh chi tin reng mai luia lang nuaih nuaih khawpa kan la awm miau avang hian, bawlhhlawh thehthang kawngah zir tur hmabak a la ko hle tih a lang a. Kan bulhnai a faia a thianghlim ang bawk hian, kan bulhnai piah lam hla tak thlenga fai thianghlim tur hian eng tin nge beihpui kan thlak ang tih ngaihtuah hi kan hmabak Agenda lian tak niin a lang. Fai inelna hi neih a tha, hma pawh kan sawn phah zel ang; mahse, kan bul hnai mita hmuh phak chin chauh ni lo, kan hmuh phak loh thlenga fai thianghlim tura tan kan lak loh chuan, khawpui fai tak, environment bal leh tawp tak kan ni mai ang tih a hlauhawm a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More